تعنى إعادة تصنيع

إعادة إستخدام

إعادة تدوير

وبمعنى أوضح إعادة إستخدام بعض الإشياء المستخدمة بعد عمل تعديلات

طفيفة عليها او تنظيفها ..

وهنالك أمثلة كثيرة .. كإعادة تصنيع علب المرطبات والمشروبات

وإعادة صناعتها في أشياء أخرى ..

سقت هذه المقدمة .. وتذكرت زمان .. عندما كنا صغار

كان الدواء .. يتم عادة تركيبه داخل صيدلية المستشفى

وعندما تمد الروشتة بشباك الصيدلية ..

إما أن يعطيك الصيدلي حبوب .. أودواء شراب ..وفي هذه الحالة يسألك امشي اشتري قزازة

عشان يعطيك فيها الدواء ..

غالبية القزاز المستخدم .. يكون بتاع المشروب الكحولي الشهير ( بيرة ابو جمل )

لونها أخضر .. وعادل عارف هذا الشيء كويس

اما أن تشتريها من عمك ود الشم .. أو تلقى واحد ببيع القزاز قاعد قدام الصيدلية

وشوف بالله التخلف الذي كنا فيه ..

قزازة فيها مشورب كخولي .. تغسل بالماء والصابون

ليعيد إستخدامها في تحميل دواء ..

والله تخلف شديد .. يجعل الواحد يضحك ..

سؤالي للدكتور محمد الطيب : هل مازالت هذه العادة موجودة أم إختفت ؟

سلام طارق
رجعت بينا أيام كشك المستشفي أبوي اشتراه من عمك ودالشم الله يرحمو
وطبعا الإجازة كلها في الكشك ومافي كورة ومرقة ودخلة كتيرة عشان كدة بنكون
زهجانين من الكشك
اها لما يجيبوا ليك قزاز نشتريه تقوم تغسلو بدون نفس يعني قزازة او فتيل الدوا زاتو مانضيف
ربنا حافظ عبيدو بي لطفو بس
ونادرا مايكون في قزازة بيبسي لانها ما بتطلع من الدكان إلا بي أمنية
ولو فتحت البيبسي بي كراع العنقريب وترمت خشم القزازة الأمنية راحت عليك دي الحالة الوحيدة البتبيع بيها نوع الفاضي ده
تحياتي طارق ياقديم

اقتباس :

يتم عادة تركيبه داخل صيدلية المستشفى

وعندما تمد الروشتة بشباك الصيدلية ..

إما أن يعطيك الصيدلي حبوب .. أودواء شراب ..وفي هذه الحالة يسألك امشي اشتري قزازة

عشان يعطيك فيها الدواء ..

غالبية القزاز المستخدم .. يكون بتاع المشروب الكحولي الشهير ( بيرة ابو جمل )

لونها أخضر .. وعادل عارف هذا الشيء كويس

اما أن تشتريها من عمك ود الشم .. أو تلقى واحد ببيع القزاز قاعد قدام الصيدلية

وشوف بالله التخلف الذي كنا فيه ..

قزازة فيها مشورب كخولي .. تغسل بالماء والصابون

ليعيد إستخدامها في تحميل دواء ..

والله تخلف شديد .. يجعل الواحد يضحك ..

سؤالي للدكتور محمد الطيب : هل مازالت هذه العادة موجودة أم إختفت ؟

______________________________________________________

ود المامون سلام وكل عام وانت بخير
حليل زمن الدواء المصنع بالصيدليه
الصيدلي بكون حريص شديد علي الكميه وطريقه التركيب والمواطن يصرفه مجانا حامد شاكر (دي ما اسم هههههههههه) جرعه جرعتين ويكون تمام .
اما الزمن دي كل الادويه مغلفه وشرابات مصندقه لكن باهظه الثمن تشرب وتبلع وتاني تجي للدكتور والله الدواء دي ما نفع معاي والشركات اصبحت تلف بعرباتها مثل عربات المشروبات الغازيه . عندنا كدا وكدا الماشي معاك شنو بنديك ليهو بسعر مريح .
الصيدليات التجاريه اصبحت تجاره والا القليل منها ينصحك بالذهاب للطبيب لشكوي المرض والعيب الثاني المواطن داير يختصر الطريق ياخي ولدي عندو حمي اديني جرعه ملاريا انا بعرفها مما يابي الشاي اكيد عندو ملاريا . يشيل فانسدار ويحنطر بيها شافعو والالم موجود . والثقافه الطبيه للادويه غير موجوده تتحدث مع المريض اذهب للطبيب واشكي مرضك وهو بدوره يجري لك الازم ياخي اديني ما علي مسولئيتك مشينا عليك الله كان ما اديتني بمشي اي صيدليه بدوني . والكلام كتير داير بوست كامل
لك ودي

يا حليل ياطارق اخوى لما الحكيم اديك سفوفة للحموضة او بلدونا قلوى
او يفشخ ليك حبوب للاسهال قدامك
الدواء يسقوك ليه فى العيادة مر مرارة شينة تشرب وانت مغمض

لك التحيه اخى طارق المامون وعبرك احى جميع اعضاء المنتدى واتمنا التقدم والازدهار للمنتدى واشكر كل من وضع بسماته بافكاره النيره وخطاه باقلامه الذهبيه لنجاح هذا المنتدى الذى هو فخر لنا.. احيك مره اخرى وانت تحى زكريات الماضى الجميل من عبق التاريخ العريق رغم الحياة البسيطه التى عاشها اهلنا الا انها كانت حياة جميله لها مزاقها الخاص خاليه من كل امراض كم سعت وانا اتزكر هذه الايام وكاننى كنت فيها اتمنا من جميع اعضاء المنتدى توثيق كامل شامل للحياه التى عاشها اهلنا حتى يكون المنتدى بوابه ربط بين الاجيال القادمه ولكم تحياتى ..ام رؤى

ازيك يا ابومؤمن
زمن التدوير(بتاع زمان) راح واندثر
زمان كان الزمن أبيض
بسيط وبدائي في نفس الوقت
وبما أن التدوير كان حول المستشفي أكيد يا طارق فاكر زمن الحقن كانت تعقم بواسطة بابور تعمل بالجاز والناس عاملين زحمة في حجرة الحقن لأن عدد الحقن محدود والحقنة كانت سخنة وسخنة (سخنة الحقنة لأنها من الماء الذي يغلي) وسخونة الدواء أما الآن يا حناكيش الحقن disposable
تحياتي

لقطات جميلة ازمن اجمل وماشين نحن نرجع ابعد من كدا رجعنا تاني للعسل والكمون والتوم والليمون ومنتجات الطبيعة الساحره تحياتنا طارق وارجع تاني انكت لينا حاجات من الزمن السمح

هاها

بوست تحفة .. ودايرين اعادة تدوير .. وانعاش لذاكرة الماضي والايام الجميلة يابن زياد

**

خارج النص .. قريب من حكاية الفتايل .. واعادة التدوير

في عادة ماعارفها اعادة تدوير ولا حشو ساااي .. بهتمن بيها نسوانا .. برطمانية المركبة قاعدة فى المطبخ بكمية

جركانة زيت السمسم .. باقة العسل .. قزازة البارد .. علبة الكريم والمسوح .. الحاجات دي كلها تلقاها مردومة فى

المطبخ .. وبكميات تستاهل بس يجي زى ودالشم يخمها

اها انا حيرتي انو اللمة دي اعادة تدوير مستقبلية .. ولا مرات النسوان عقلهمن برررركن سااااى

ياسلام عليك ياراقي ودالمامون دايما مواضيعك ذات دلالات ومعاني وين اسي الكلام دا زمن ولي ولن يعود الان كل واحد بقي طبيب نفسو يجيب الدواء بدون استشارة الطبيب والمصيبه لو جاء واحد شكي ليك نفس الاعراض العندك طوالي تدي الوصفه او لو الدكتور كتب ليك وصفه طبيه ونفعت معاك خلاص تواصل فيها علي طول لمن يجيك سرطان يوديك التوج ياخي اقول ليك حاجه علاج زمان وهسع زاتو اختلف نحن زمان لو ادوك حقنة بلهارسيا لمن زراق عينك دا يروح وتجلس ساعه يلا تستعدل زمن

الأخو الأعزاء الكرام
عادل خياري
محمد الطيب ابراهيم
تقوى الماحي
مصطفى البلة
روضة مهدى
صديق خالد عوض الكريم
كباشي خياري
عبدالرحمن مدثر
عزالدين حسن


لكم التحايا الخالصة ..
وشكرا لكلماتكم الرقيقة .. التى أعدتم بها دائرة الزمن الى الوراء
الى أيام الصفاء الجميل .. والبساطة في كل شىء ..
إننا نبكي ذاك الزمان االجميل .. ونجتر فيه الذكريات الجميلة في زمن لاتعرف الهموم طريقا للقلوب
سرعة ايقاع الحياة وتغيرها .. زاد من كثرة أمراض كانت لاتعرف في ذلك الزمن
وكل شىء بسيط .. الغذاء بسيط .. غير معقد .. وباالتالي كانت حياة الناس بسيطة وبصحة جيدة
والنظام الصحي نفسو كان مرتب ..
يعني أتذكر تماما .. يوم الأحد من كل اسبوع .. صرف لبن التربية
وهو لبن مخصص للأطفال حديثي الولادة .. الى عمر سنة تقريبا يصرف
على الأقل مرتين شهريا .. وإتخيل منظر النسوان كل تحمل مولودها ومعها علبة أو كيس لصرف اللبن
كما يتم قياس الطفل وطوله ووزنه لمعرفة نومه وتسجل كل هذه المعلومات
ويعطي جرعات تطعيم عن طريق الفم
كما لا أنسي يصرف أيضا للأطفال حبوب على شكل كبسولات للمساعدة في التسنين ولتخفيف
لونها أحمر باصفر ودي صدفة سااااي مامقصودة يامريخاب
رغم بساطة الحياة وتخلفها من ناحية صرف الدواء .. إلا أن هنالك نظام صحي ..
الكشف على الحوامل ومتابعة الحمل ..
مما يعني بأن هنالك عيادة صحية عائلية .. وهذا الآن هو قمة التطور في المستشفيات
وهو طب الأسرة