القرارات السليمة سليمة

كل بنت تولد سليمة

دعوا كل بنت تنمو سليمة

اعلان علي النيل الازرق من خلال حملة منظمة (ضد ختان الاناث ) .. اللافت للانتباه انو الحملة قوية

من خلال تنوع الوجوه .. والاعلانات علي الطرق الرئيسية .. بالامس وانا داخل علي امدرمان شدتني صورة (نسرين النمر ) بكل ابداعها

داعمة لخط الحملة ..

**

الحملة كانت موازية (لليوم العالمي للقضاء علي ختان الاناث ) ... فى السادس من فبراير من كل عام

**

مادعاني لكتابة هذا الموضوع

هو عملية التارجح فى مجتمعنا بين حقيقة (خطورة الختان ) وبين (ماجبلت عليه الطبيعية النسوية التقليدية من لابد من ماليس منه بد )

**

القرارات السليمة لما تكون انت سيدها

لكن لييييه مرات بتحس انو حبوبتك صاحبة قرار مناهض .. وناسف حتي لقراراتك

**

القناعات الداخلية بتحتم عليييك انو تكون مع هذه الحملة (ضد الختان ) ..

لكن فى تداخلات اخري ..

بررري يابنات امي .. ماهديل بناتنا من زمااان .. شديدات ولضيضااات ...!!

سلام ياودمدثر
نتمنى ان تندثر هذه الظاهرة الخطيرة على حياة البنات من حيث المضاعفات التي تصاحب ذلك في كل مراحل البنت
والغريبة ياعبدالرحمن حتى البنات المتعلمات ومرن بكل المراحل الخطرة والحافظ الله مازلن يكررن التجربة مع بناتهن واخواتهن الصغار
حسب اعتقادي ان الختان للاولاد
والخفاض للبنات تصحيحا للكلمة
شكلك ياعبدالرحمن زايغ من كلمة ادينا العادة لي بت فلان هههههه
جيتا جيت بي شرمة وليد ولا بالباب المابجيب الريح

ادينا طاقة اسكايب قبل مانمشي ننوم
عايزك

لا لختان الاناث

لك التحية الحبيب عبدالرحمن مدثر
وعبرك لكل الأخوة المتداخلين

ونشيد بهذا البوست الرائع وعلى هذه الحملة الجميلة
التى أمهما نفر من وجوه المجتمع السوداني لمحاربة هذه العادة الضارة
وجميل جدا ان نجعل من المنتديات منابر لتوعية الناس بأهمية مثل ها العادات للقضاء عليها
وماعلى الناس إلا أن يكونوا بقدر هذه القرارات السليمة على الرغم من القرارات المناهضة

عبد الرحمن..
موضوع مهم للغايه مع الاسف الشديد مازالت
هذه العادات على مستوى السودان وخصوصا منطقتنا
مع علم مايؤديه ختان الاناث من اضرار عضويه ونفسيه
نتمنا ان تكون هناك توعيه فى ارض المنطقه بدايه انطلاقها
هذا المنتدى.....تحياتى ام رؤى

تشكر يا ابو مزن
سليمه مولوده سليمه
تحلم تكبر ذي الغيمه
بتكون في البيت زي الانسام
وضل الغيمه
بت الاحلام زي الايام
تنعس تنوم
تصحي وتحوم
لابسه تميمه
تضحك مع دا
وتسرح مع دا
ليها نغيمه
اهلا جايين لاميين داخل الخيمه
قطعو الخلقه
سنه وبدعه
عاده قديمه
سليمه تصيح
ولا حد نصيح يفصح ويصيح
هذي جريمه ..هذي جريمه
تكبر عاهه فاقده دواها
ساعه التوليد من شاش لحديد
الجرح يزيد والرحم ينشق
كم تتوفي في المستشفي
واحلام الناس من جرح جديد
ترحل غيمه تنصب خيمه
لحظه نديمه يلا عليها
يلا عليها
عاده زميمه.

(مصطفي حسب الرسول)