معروف السودان بلد تكافلي بالفطرة وقت الحارة تلقاهم قدامك اهل جد او اكتر من اهل لانهم جيران واحباب
عشان كدة اخترعوا المثل جارك القريب ولا ود امك البعيد لانو اول زول ح يجيك جاري للوقوف بجانبك وقت الحوجة
نخلي الافراح شوية
تعال شوف وقت المصائب كفانا واياكم الله وهي ماضية فينا طالما دامت الحياة وهي التي تظهر معادن الناس
اذا كانوا فعلا اتوا ليخففوا عنك ويواسونك من قلبهم ام بس جايين خايفين من اللوم وفي الاتراح بكاهم ودموعهم دموع تماسيح
وعيونهم زايغة تبحث عن اللاشئ في اركان المنزل
عندنا عينة زي دي
البكاء حار بس في منطقة تانية الراجل ابو المرة مات والناس اتلملوا من كل حدب وصوب وحتى القرى المجاورة
منهم من اتى على اربع عجلات او حوافر وفيهم من اتى على اتين كارو صغيرة ومنهم من اتى مشيا كل حسب موقعه الجغرافي
المهم واحدة ماهاميها الموضوع شديد ولم تفكر في الذهاب مخصوص
وانتظرت الى ان جاء يوم السوق وموضوع اخر يوديها منطقة البكاء والكلام ده بعد شهر تقريبا
هنا ناس الفراش كل ذهب الى حال سبيله حال الدنيا
طيب صاحبة القصة جات السوق ومشت الدكتور ومشت المجلس وانتهت من كل اغراضها الدنيوية وبعد ان انهت مهمتها الاصلية
احست بالجوع هي يابنات امي اكل هنا في السوق بي 15 ريال
بري ها الخمستاشر ريال يجيب لي دستة كبابي وفناجين والله آبخسرن لبتاع المطعم
انا اصلي ماشة لبت المرحوم اعزيها في ابوها واكل معاها بالمرة واديها فد طرادة
توووووش على البيت لقت ليك بت المرحوم في المطبخ ياداب نزلت حلتها من النار وخلتها كاشفة عشان الملاح يبرد

الايد في الراس وهييي هييييي ومخير الله ياحليل ابوكي الكان وكان وياحليلو الشنو كدة ماعارف والعين تدور في ارجاء المطبخ والوصف
يزداد كلما لم تجد شئ يشد الانتباه
وفجأة تعالي يالجدادة الصغيرة الحمراء بي سواسيوها داخلة المطبخ وطلعت في نشافة العدة وحاول السوسيو الشقي محاكاة امه الا انه لم يوفق
وجاء على اعقابه جوة الحلة لقربها من نشافة العدة
وفي غمرة الوصف وحليل وحليل تشوف المنظر كور عليك وياحليل ابوكي وآآآآآآآآآي انا والسوسيو وقع في الملاح
ياجماعه اصلا البكاء قالو بعذب الميت
وطالما البكاء ماواجعك شديد مافي داعي تعذبو وتنافق ساكت
احسن ترفع الفاتحة وتدعوا للمتوفي بالرحمة والمغفرة
وخلي السوسسيو يلحق امو

عادل يا عجوز
في سرادق العذاء والبكاء حار والضيوف كتار والنسوان جاعن جوع شديد واحد بسكت فهن خلاص اكلو الضيوف
الاكل جاهز والكامشه تحت الزير وواحده جيعانه شديد يا نسوان ما توكلن الضيوف يا عمي الكامشه ما لقيناها ودي تبكي حليل ابوكم حليل ابو البسند الضيوف حليلو وكامشتكم تحت الزير حليل ابوكم هديك ليها وب علي انا

سلام محمد الطيب
تشكر على المرور والاضافة

اقتباس :

في سرادق العذاء والبكاء حار والضيوف كتار

قال ليك الناس كتار دي مرات كتيرة كبابي الشاي بتقصر فيهم
عمك حريف شاي كورك للولد البجيب الشاي
ياولد ماتملا الكباية نص بس
خلاص معروفة الكباية النص دي حقت عمك اب طاقية حمرة
اول مامسك الكباية
ها جنا كبايتكم دي صغيرة كدة مالها تمها تمها الله يخليك

لك التحية اخي عادل دائما ماتتحفنا بروائعك فدمت اخي واطال الله عمرك