*21 مارس من كل عام عيد أغلى الحبايب *

كل سنة وإنتِ طيبة يا أمى ، أدام الله عليك نعمة الصحة والعافية .
كل سنة وإنتِ الخير والبركة ، ربنا يطول فى عمرك .
كل سنة وإنتِ لنــا كل الحنان والعطف والدعاء الصادق .
شكراً بكل ما تحمله هذه الكلمة من معانى طيبة .
امى الغالية والعزيزة : ربنا يقدرنا ونرد ولو قليل من كثير أمام عطائك .
اطيب التمنيات فى عيدك نورالشام بت محمد زين ود سعيد



أعالى الجنان مع الصديقين الشهداء فى الفردوس الأعلى لكل أم رحلت عن دنيانا جسداً

يا يمة رسلي لي عفوك ينجيني من جور الزمان


شوفي الزمن يا يمة ساقني بعيد خلاص
جرعني كاس
دردرني واتغربت واتعذبت
يا يمة وريني الخلاص

يا يمة يا نور الصباح وكتين يطل
يا يمة يا بدري البشع دايماً بهل
يا يمة يا فيض الحنان الما كمل
وا شري يا زينوبة ولدك في دروب الشوق قتل
محروم من الحب والمحنة وراك هبل

يا يمة يا نغما حنين بالشوق يجن
وأفكاري فيهو بيرتعن
ودمعة شاري بينزلن
بذكرك يا يمة في الدغش النسايمو يهبهبن
قايمي الصباح متكفلتي وشايلة الحليلة على المراح
جبتي اللبن لي بي انشراح
والساعة ديك يا دابو ديكنا بدا الصياح
والطير صغارو يغردن

بتذكرك يا يمة في ساعة الهجير
صالاكي نار الدوكي عست لنا الفطير
رشيتي قلتي بجوهو خير
بتذكرك يا بسمة الطفل الغدير
وقت الخلوق ترقد تنوم أسهر براي أرعى النجوم
والشوق يلف جنحينو بي فوق لي يحوم
وأحلف بي اسمك في الخيال
طيفك كمان بي فوقو جال
اتمنى لو لحظات يدوم
لكني فجأة ألقاهو زال

يا يمة يا بحر المودة وكت يفيض
يا يمة يا شعلة أمل زادت وميض
يا يمة يا عنقود كلام منضوم غليد
بتذكرك يا يمة وقت الناس يجونا من البلد
ناعم ترابها على بسيماتكم رقد
ريحة التمر فوق الهدوم دول الخضار خالص لبد
والشوق أوانو بيشتعل كان ظني فيهو يكون خمد
بتذكرك يا يمة عند ناس قالوا قايمين البلد
رصو الهديمات عدلو ركبو اللواري وقبلوا
خلوني وحدي بلا أنيس كيف انفرادي اتحملو
شالوا السلام انا مني ليك
يا يمة ساعة يوصلوا ويقولو ليك شفناهو في بلد الأمان
يا يمة رسلي لي عفوك ينجيني من جور الزمان

أمى الله يسلمك ترباس وود الصادق
اليك يانور الشام والى كل الأمهات فى الدنيا
[ندعوك للتسجيل في المنتدى أو التعريف بنفسك لمعاينة هذا الرابط]

نورالشام يابحر المودة الما كمل
[ندعوك للتسجيل في المنتدى أو التعريف بنفسك لمعاينة هذا الرابط]

التحية لكل الامهات - امى يافيض الحنان الدافى ياوردة نبتت على حسن بنانى

فأنك مهما بلغت من منصب وجاه ومال فيدك ولسانك ودمك من أحشائها ولولا الله وأمك ما جئت لهذا العالم فأن كنت تقدر من علمك ومن رفعك ومن كان سبب في رزقك من المال والجاه فحق عليك ان تقدر وتقدس وتسجد احتراما لمن جاء بك لهذا العالم

لك التحية اخي صديق وربنا يطول في عمرها ويديها الصحة والعافية وامهاتنا وجميع امهات المسلمين الاموات ربنا يرحمهن برحمته الواسعة وفي اعلي الجنان والموجودات ربنا يطول في عمرهن ويديهن الصحة والعافية والام هي ينبوع يتدفق ليروي ظمأ العطشا ومهما فعلن من أجلهن لانوفيهم حقوقهن ولو قليل تعبت وساهرت وربت ومرضت من اجلنا ربنا يديها الصحة والعافية (امي يادارالسلام الله يسلمك يديك لي طول العمر في الدنيا يوم مايألمك ) صاغها شعرا استاذنا التجاني حاج موسي واداها بالروعة والصوت العذب الاستاذ كمال ترباس .. هي الام وكفي

أول واحد عز الدين بعد المتاوقات وكل سنة حميع الامهات بخير

التحية لكل ام
القدال قال
اماتى القبيل بى حنهن لجنى
كرفة وقدلة كيف ... شوق اللبن رجلنى
اطلع من يا حزنا بقى مكجنى

لك التحية اخي صديق انت عارف انا المنتدي من ماسجلت ماحصل تاوقت بس ظروف العمل والضغط هي الابعدتنا عن المنتدي

مهند الأمين عبد النبي كتب:

التحية لكل الامهات - امى يافيض الحنان الدافى ياوردة نبتت على حسن بنانى

فأنك مهما بلغت من منصب وجاه ومال فيدك ولسانك ودمك من أحشائها ولولا الله وأمك ما جئت لهذا العالم فأن كنت تقدر من علمك ومن رفعك ومن كان سبب في رزقك من المال والجاه فحق عليك ان تقدر وتقدس وتسجد احتراما لمن جاء بك لهذا العالم

بقول اسم الله فوق اسمك يا مهند
تنوم والعافية فوق جسمك يا مهند
مناى تصبخ رئيس بلدم يا مهند
دى اغنية شايقية قديمة ماعارف قايلها لكن اكيد ام بتغنى لى ولدها مهند
نعتذر منك مداخلتك الأولى ولم ألحظها
شكرا مهند

لك التحية الحبيب صديق الماحي ياراقي
وأنت تتضامن مع العالم الراقي إحتفاءا بالأم
وإننا نحي أمهاتنا وماقمن به من دور كبير وعظيم ومقدر
لانستطيع مهما عملنا أن نرد ولو جزء بسيط منه

وإننا إذ ندعو بطول العمر لأمهاتنا الأحياء ..
وبذات القدر نترحم وندعو بالمغفرة على من إنتقلن جوار الله
أجدد لك التحية ولكل المتداخلين

لك التحية يا حبيب
والتحية لكل الامهات
ونحية خاصة لامهاتنا بنات الزين شامة وام سلمة وزهراء وامنه وخالصة
وتحية خاصة الى الخال الفاضل محمد زين
وفى خصوصية نخص الوالدة الخالة شامة بت الزين
وكنت قد سعدت بلقائها فى الثورة (التاسعة ) فى اول يوم عند وصولى للخرطوم
من المطار مباشرة الى اسرة خالتى ام سلمة ثم الى خالتى شامة
وقد امضيت معها وقتا جميلا كنت فى امس الحاجة اليه بعد طول غياب
والحمد وجدتها كما هى حاضرة فى كل شئ تسمع وتستمع
ووثقت كل ذلك بصور متعددة
اتمنى ان تعيننى الشبكة والتقنية على تنزيلها فى البوست
ولن اضيف جديدا لو اسررن لك انها ما زلت تسال عنك وعن هيبات
ونور ووحيد ووليد بشغف وحب عظيم عهدناه فيها
لك ولها حبى وشوقى

نامي في روضتك سعيدة برضى من ربّك.. وإنّا لله وإنا إليه راجعون.. وسلامٌ عليك يا مؤمنةيا صالحةً يا عابدةً لله..

يا من ربّيتني والدتي على الإيمان والخُلق الحسن.. سيجزيكما الله بالاحسان كما أحسنتما لي ولإخوتي ولأولادي….

*اللهم ارحم والدتي كما ربتني صغيرا*

لن أنساك يا أمي.. وإنّي بحاجةٍ إليكِ.. وسأذكرك وأفتقدك أكثر كلما ماجت بي الحياة واحتارت خُطاي بين طرقاتها الموحشة بدونك…

فما زالت فتيلة شمعتك تشتعل في قلبي نورا من نور حُبّك.. وأماناً من أمن رضاك.. ومحبّةً مما زرعت في قلوبنا لبعضنا وللناس…

فبوركت من أم محمد.. وتباركت روحك الطاهرة ونفسك العفيفة والكريمة…



وإلى اللقاء أمي الحنونة في جنة الرحمن باذنه تعالى…

اللهم ارحم أمّي وأكرم نزلها..

اللهم ارحمها واغفر لها..

اللهم لا تحرمنا أجرها ولا تفتنا بعدها يااا ربّ العالمين.. وصلى الله على سيدنا محمد وآله وصحبه أجمعين إلى يوم الدين..

آمين آمين آمين
[img][ندعوك للتسجيل في المنتدى أو التعريف بنفسك لمعاينة هذه الصورة] [/img]