المشاطة أو كما يدلعونها الماشطة
هي التي تعمل عمل الكوافيرة في هذاالزمن .. غير أن الأخيرة تعمل بأجهزة كهربائية
حديثة وداخل صالون مجهز لهذا الغرض ..
أما المشاطة التى هي ضيفتي في هذا البوست .. أمرأة عادية .. بسيطة لكنها ماهرة تجيد هذه الشغلة دون سواها من النساء على الرغم من أن هذه الشغلانة بسيطة
وليست صعبة ولاهي كيمياء ولا فيزياء .. لكن في الزمن الماضي
المتعلمة والأمية تجلس للمشاطة لتمشيط شعرها .. وهي لمة في الحقيقة .. للونسة وشرب القهوة والقطيعة البريئة
ومن العادة لما المشاطة تكون موجودة في أي بيت من البيوت .. ترفع فيه درجة الإستعداد درجة زيادة يعني فطور مدنكل .. وغذاء لايقل من الفطور
ويتخلل مابيهما الشاي والقهوة .. غير لمة الجيران والتي تكون فيها ذواقة من الطعام المتوفر مشاركة لوجود المشاطة في ذلك البيت
ومن العادة ..أن يستمر المشاط فترة طويلة خصوصا إذا كانت الفتاة أو السيدة عروس جديدة
المشاطة بعد إنقضاء فترة المشاط .. هي كالداية ( القابلة ) لها قفة تسمى قفة المشاطة .. تحتوي على البن والقهوة والحلاوة وفتيل ريحة وعلبة سجائر ( برنجي ) هذا خلاف ماتعارق عليه الناس وهو العطية المادية والتى من العادة تكون مبلغ وقدره يدفعه الرجل وذلك بعد تزيين زوجته بالمشاط
إختفت هذه المناظر وإندثرت من حياة الناس .. وايام المشاطة .. غير أنها عادت ولكن هذه المرة في المدن .. واصبحت من ضمن
الكوافير ومحلات التجميل التي كثرت .. وهو مايعرف بالمشاط الحبشي .. بعد دخول الحبش بكميات كبيرة
رحم الله ايام المشاطة وايام السودان والزمن الجميل

طرووق يا حبيب انا شفت بى عينى ديل فى الازهر هنا فى مصر سودانية ماسكا لى ولد مصرى تمشط فيهو فى نص السوق ما قدرت اضحك ولا ابكى ولا اتحسر
لكن دة طبعا شغلها وعلى فكرة لمن سألت لقيتها لىك غالية جدا من اى حلاق او كوفير

ايام زمان كانت ايام حتي نحن كنا ننهل من خيرها الاكل المدنكل يعني لما تكون في بيتكم زمن

على بالطلاش
البوست دا مما شفتو جار بى فوق القيف ..
قلت الشعرو منكش دا إلا طارق مامون ..
مشاط تمام بالودك المعتق ..
رحم الله الزمن الجميل و الملمات البريئة
لمة ماقبل الاعراس ولمة الآبرى ولمة المشاط والقوقاية وتقشير الفول و و....................
سلامات طارق ,, لك وحشة وشوق ..

سلام طارق
بخصوص ونسة المشاط وقظيعتو واضح تماماً أنها ماجادة
لذا صاحبتها منرادفات ويقول ليك ده كلام مشاطات ساي

موضوع شيق ولطيف
فهو يوثق لعادات جميلة تكاد تندثر ..
مهنه قديمه مهمتها تمشيط الشعرباداة اسمها (المخراز)
لك التحيه الاخ طارق وعلى ذكرقفه المشاطه او صينيه المشاطه
فى مثل مشهور يطلق لولدها (عينو زى عين ود المشاطة)

سلام سيد البوست وضيوفه الكرام
سين سؤال اخت روضة

اقتباس :

(عينو زى عين ود المشاطة)

دي ماادونا ليها
كيف يعني وقصتها شنو ؟

جيم جواب الاخ عادل يطلق هذا المثل
للولد العينو طائره اى منحرف
(عينو ذى عين ود المشاطه)
ودا بسبب الصوانى الكتيره البتجى لمو

سلام تاني وشكر للاخت روضة

اقتباس :

ودا بسبب الطوانى الكتيره البتجى لمو

بختو والله تفسير لطيف هههههه
يعني اولاد المشاطات والدايات الله اداهم
صواني وكراع الخروف الورانية ده غير الحاجات التانية

ود المامون انت والباشمهندس وليد
انتو كبار خلاص كنتو بتترسلو تجيبو ليهن السجاير ولا شنو ههههههه