المجتمع لمن يكون جاهل ممكن عادي تتصيدو
ممكن يكون اصبع في خاتمك اقصد خاتم في اصبعك
الجهل يولد كتير من نقاض الضعف في المجتمع
نسبه التوعيه كلما زادت كلما كان مجتمعنا خالي امراض جهليه
غاايتو العندنا في السودان ده ما اسمو مجتمع
سموهو اي حاجه تانيه
قال مجتمع قال
ياخ ديل ممكن تنشر فيهم اشاعه في اقل من نص ثانيه وصلت البيت الابيض
شعب بمووت في الاشاعات
ماقلت ليكم جهل واميه ميه فولت كمان
تعريف الاشاعه بسيط جدا
الإشاعة هي خبر أو مجموعة أخبار زائفة تنتشر في المجتمع بشكل سريع و تُتداول بين العامة ظناً منهم على صحتها
اها نحن ماعندن وقت نعرف بيهو صحيحه ولا لا
طووووووال نشيل الخبر ونمشي بيهو
قالو ليك 70% من قيمه الخبر بتتغير لمجرد انتقاله لشخص اخر
يعني لو قلت ليكم بكره رمضان ( اشاعه)
الخبر ده لو وصل مدني بتتغير 70% من كلماتو وتتحول
بكره عيد الانقاذ هههههههههه
الهدف اساسا من الشايعات متنوع
قد يكون للفتنه
للمكيده
وقد يكون للربح السريع
اي تجاره
قالو ليك في السعوديه قريب ده في الالفينات دي
واحد فك ليك اشاعه انو مكنات الخياطه فيها ماده الزئبق الاحمر
تعال شوف بعد داك
عيونك ماتشوف الا النور
سعر المكنه الخرده بس وصل الالاف الريالات
في اغراض سياسيه كمان
دي بتكون لاثاره شغب او احداث بلبله او ربكه بين المواطنين
وما بعيده عليكم اشاعه اصابه الريس ( الله يديهو العافيه ) بسرطان الحنجره
غاااااايتو الناس لمن تكون فاضيه بتعمل اكتر من كده
ممكن في اشاعه واحد يموت الزول تسعين موته
مره بدفار
ومره ببص الوالي
ومره بقطر
الموت واجب علينا مامشكله بس كعب البهدله
ماقلت ليكم اي شعب متخلف غير واعي وجاهل بكون ارض خصبه للاشاعه
وكمان اللوم ماعلي المواطن براهو
احم احم عندها دور كمان
بدل وزاره الاعلام الكلها كندشان دي
وناطق رسمي باسم الاحم احم
مفروض المعلومات تملك للمواطن بالتفصيل
ادق المعلومات باستثناء الامني منها
كده بنكون حاصرنا وضيقنا الخناق علي الاشعاعات
اي قااصدا ماتقولو كاتبا غلط
انتو قايلين في فرق يعني بين الاشاعات والاشعاعات
كلو في النهايه بودي لاحمد شرفي
اهم حاجه في الاشاعه انو ماعندها مصدر
مابتعرف القالا منو اصلا
في زمنا ده الاشاعه بقت حرفه
فن وذوق
زمن الفيس والتويتر والقوقل
بزره كبس ممكن تطلع اشاعه
ممكن هسي اكتب في صفحتي انا شاهدت بن لادن في سوق ليبيا
وبكره تقرا الخبر في الجرائد
بالصوره والقلم بن لادن في السودان
مفاجاه من العيار التقيل بن لادن حيا يرزق
مراسل الصحيفه الفلانيه يقول انه شاهد بن لادن في سوق الناقه
وهكذا ...
مع انو انا اللي قايل الاشاعه دي
لكن الجرايد تبنتها
مافكرت تتاكد من المصدر او تسال من المعلومه
صفقه صحفيه والسلااااام
ههههههههههه المشكله مابقولو انو الخبر ده شايلنو من الفيس بوك
اي واحد يقول ليك قالت مصادرنا
من مصدر موثوق به
موثوق به في عينك ياخ
بس كمان ما اي خبر ممكن ينتشر ويلقي الاهتمام
يعني شائعه موت مواطن في سنار .. مابتمشي متر لقدام
معناها لابد للشائعه من توفر خاصيه الاثاره في الخبر
ومع الاثاره عاوزين شويه توم وشمار والخبر لازم يكون مهم طبعا
وكمان ماتنسو لازم تكون الادله علي الاشاعه غامضه
يعني ماعندها دليل صحه
بمعني يصعب نفيها .. عشان تنفيها حتتعب تجيب ادله النفي
ولحدي ما تحاول نتفيها تكون خلاص ادت الغرض المصنوع لاجله الاشعاعات
وزي ماقلت ليكم 70% من الخبر يحرف بمجرد انتقاله من فرد لفرد
توم وشمار وكزبره
اي واحد لازم يضع بصمته علي الخبر
غااااااايتو جنس غااايتو
كمان الشايعات بقت عندها علماء واساتذه وبروفات
ماقلت ليكم بقت علم عديييييييييييييل كده
ممكن تلقي فلان الفلاني اختصاصي اشاعات
وممكن تلقي بروف فلان استشاري امراض الاشاعات
فلان العلاني رئس قسم الاشاعات المستوطنه
وقيس علي ذلك
ممكن تعمل ماستر ودكتوراه في اشاعه واحده بس
ويجيبوك في القنوات تحلل وتقطع وتطبخ وتشوي وتفرتق في الاخبار
عااااااااااااااالم غريب بشكل
للشائعات آثار نفسية وحسية بالغة
فبمقدورها القضاء على مجتمعات كاملة في حين أنها لم تُواجه من قِبل الأطراف الواعية
هههههههههههه المشكله الاطراف الواعيه ديل هم سبب البلاوي ذااتا
قال واعيه قال

واخيرا اذا عاوزين نحارب الشايعه فلابد من توعيه المواطن
المنطقية في التعامل مع الأخبار
التأكد من المصدر خصوصاً مع الأخبار الحساسة و المهمة .
التوعية , ومحاربة الصفحات و المنتديات التي تنشر ( تنسخ وتلصق ) أخبار بلا مصادر .

اها عاوزين لينا شااااايعه قويه كده نقزقز بيها في شهر رمضان
يلا ورونا
افاركم ... ابداعاتكم ... عارفكم كلكم بتاعين شمارات
هههههههههههههههههههههههههه

قال عايز شايعة يقزقز بيها قال ..!!

امشى خليهم يقزقزوا بيك ..!!

هههههههههههههههههههههههههههههه