الاخوة الاعزاء :

نعلم ان الكل منا يسعى لخدمة بلده .. بجهده .. بفكره .. بماله .. باتصاله بالاخرين وحثهم وتزكيرهم ..
وان المنتدى حشد كل ابناء الهدى .. ووفر فرص التلاقى والتفاكر .. وقرب كل المسافات والخطى التى باعدتها السنين ..
كل ادلى بدلوه فى شأن الهدى العام ..
وهناك من الافكار ما وجدت حظها من التنفيذ والتفاعل السريع والاستجابة .. ومنها ما ينتظر .. ومابدل ابناء الهدى تبديلا ..
وصفحات المنتدى تعج بالافكار البناءة والجميلة .. والمتصفح للمنتدى منقباً فى صفحاته القديمة يجد ذلك ..
الافكار التى نفذت اوالتى يجرى تنفيذها وساهم فيها المنتدى مساهمة كبيرة هى الآن بصفحات هذ المنتدى ولكنها تائهة فى كل الاقسام ..
او جلها فى المنتدى العام ذو ال44 صفحة حالياً..
ولو حاول احدنا ان يقف على احدها يصعب عليها ايجادها بسهولة ويسر .. لتفرق دمها فى صفحات المنتدى .. !!
لذا اقترح ان يفرد باب اومنتدى مخصص لاقتراحات ومشاريع خدمة وتطوير مدينة الهدى او اي آخر مسمى يحمل المعنى ..
مع بذل قليل من الجهد لتجميع ونقل كل مقترحات الاعضاء والتى تختص بأعمال خدمية للهدى الى المنتدى او الباب المقترح ..
حتى تكون مادة فى متناول الجميع يمكن الرجوع اليها عند الحوجة .. والتى يمكن ان تكون عوناً لكل اجسام العمل الطوعى بالهدى
لجان شعبية .. روابط .. اندية .. منظمات .. وغيرها
نعلم ان هنالك باب مخصص باسم منتدى الاقتراحات والشكاوى .. لكنه يختص فقط بمقترحات مرتبطة بالجوانب الفنية والتفنية للمنتدى ..
نسأل الله التوفيق والسداد ..

سلام وليد
كان هناك مقترح من الأخ الصادق عكاشة بنفس المضمون
يلا ساعد باسم اسمين من للمواضيع المختارة
عشان نشوف صاحبك بتاع القرع داك يختها كلها في قفة كبيرة عشان نلقاها ساهلة
ده لو مالقينا القفة مرقت في السوق
ماتقول اليوم الاتتين سوق حار مابتفوت

نحييك عادل على المرور الجميل ,, وكذلك نحيى الاخ الاستاذ الصادق عكاشة ..
وادل شيئ على اهمية المقترح عدم مرورى على مااقترحه الاخ عكاشة ..
مررت على بعض الصفحات القديمة ووجدت كنوز جميلة وافكارة نيرة جداً ومفيدة ..
من دربى دا على الترزى عوض الله .. !!

نعم الاقتراحات يشد بعضها بعضا :

الصادق عكاشه كتب:

الافكار والمقترحات التي تبناها المنتدى من أجل الهدى كثيرة جدا....ربما لم ينفز منها ولا حرف !
هناك أجسام رسميه وطوعية في الهدى ...لجأن شعبيه والمنظمة ..والجمعيات ..ورابطة الطلاب بالجأمعات..ووالاندية الرياضيه . وروابط المراءه(عييييييك)ماشاء الله..!
لذلك اقترح من الاخوة الاعضاء ان يقترحوا اي مقترح يفيد المنطقة ويشارك بافكاره وتكتب هذه المقترحات تحت مسى اقتراحات المنتدى تطلع عليها اي مؤسسة وتحاول ان تفذ بقدر المستطاع ...ويكون المنتدى ساهم بفكاره في بناء المنطقة.
لوكان العضؤ صاحب المقترح ان يوجه المقترح الي جهة معينه يطلب منها التنفيذ فاليفعل...!
وبهذا يكون المنتدي قام بدور البلاغ .....اللهم فاشهد.
ولكم مني خالص الود....ودمتم للهدى.

اكيد

ترزى وجزار
نفصل ليكم بالاول القميص
بعد داك نعمل القطيع والسلخ
اها انا منتظركم تدونى المقاسات
اقصد العنوان
واقترح ان يكون بنفس عنوان البوست
ورايكم مهم

نحييك يا عز على المرور .. !!

وهو كذلك ...

عوض خيارى كتب:

ترزى وجزار
نفصل ليكم بالاول القميص
بعد داك نعمل القطيع والسلخ
اها انا منتظركم تدونى المقاسات
اقصد العنوان
واقترح ان يكون بنفس عنوان البوست
ورايكم مهم

سلامات ياعوض ..
انت ياخوى فصل سااااى بدون مقاسات الساعلك منو .. ؟؟
ونثنى اقتراحك .. !!
والموضوع محتاج منك لى جكة شوية .. !!

جكة وجك ليمون من ليمون ود المامون
انتا عارف بس الشبكة عاملة شبكة
المسهامات بى يالطيف

الاخ وليد
بسواعدنا نبني بلدنا
ونثني الاقتراح
لكن لكنه حفيفه وثقيله في الميزان بتاع التخريب
اللجان الشعبيه الما عندها ضمير

عوض خيارى كتب:

جكة وجك ليمون من ليمون ود المامون
انتا عارف بس الشبكة عاملة شبكة
المسهامات بى يالطيف

الجكة مهمة ياعوض .. ممكن نغيرها ليك .. دايرة مجهود .. اها برضو فى عندك عصير مجهود ..

عشان تملأ جك ..

زمشكلة شبك الشبكات حاصلة لينا كلنا .. بس اتشمر وخت ليكا سفة (سكر ) .. وقول يالطيف ..

محمد الطيب ابراهيم كتب:

الاخ وليد
بسواعدنا نبني بلدنا
ونثني الاقتراح
لكن لكنه حفيفه وثقيله في الميزان بتاع التخريب
اللجان الشعبيه الما عندها ضمير

نعم بسواعدنا بنبنى بلدنا مهما كانت المتاريس .. وكل العقبات سوف تزلل ..

والجنة الشعبية تحتاج من الناس الوقوف والنصح والمشورة .. والسعى نحو تصحيح المسار ..

المقتلرح جميل وفيهو نوع من التنظيم الذى نبحث عنه وايضا يساعد على لم انجازات المنتدى فى حتة واحدة

صديق الماحي كتب:

المقتلرح جميل وفيهو نوع من التنظيم الذى  نبحث  عنه وايضا يساعد على لم انجازات المنتدى فى حتة واحدة

نحييك صديق على المرور ورفع الشـــــــارة بالتثنية على المقترح .. !!

ولجعل النظام عنوان المنتدى نهيب بكل الاعضاء المشاركين .. وضع مشاركاتهم فى الابواب المخصصة لها ..

الرياضة فى المنتدى الرياضى .. الشعر فى منتدى الشعر والنثر .. السياسىة فى المنتدى السياسى .. وهكذا ..

الاستاذ مضوى سلامات

نحييك على المرور الجميل والمداخلة الاجمل ..

القصد من العنوان هو جمع كل المقترحات التى قدمها الاعضاء بالمنتدى والمختصة بشان تطوير الخدمات بالهدى فى صحن واحد ..

يسهل التناول منه للحادبين على تطوير المنطقة ..!!

بمعنى ان هناك اعضاء باعدتهم المسافات والازمنة عن الهدى ولهم رؤى ممتازة يمكن ان تخدم المنطقة ولكن كيف يتم ايصالها للجهات المنفذة

فالمنتدى هو الصحن الذى توضع فيه مثل هكذا وجبات .. وتكن مرجع سهل لكل من اراد الاطلاع عليها ..

المنتدى بوابة مفتوحة تدعو كل من تنفس هواء الهدى للدخول عبرها .. ومنظمة الهدى الخيرية جل اعضاءها ناشطون بالمنتدى ويعكسون

انشطتها باستمرار.. ويكون جميل جداّ إفراد صفحة تختص بالمنظمة ويكن احد الاعضاء مشرفاً عليها .. على غرار صفحة المنظمة

بالفيس بوك .. والتى تعج بالمشاركات والمقترحات الجميلة .. نثنى ويرفع الاقتراح لإدارة المنتدى ..

سلام لسيد البوست ولاخوة المتداخلين
رمضان كريم وكلامكم سمح واسمحوا لي ان اقول
وليد والصادق عكاشة
انسب من يقوم بهذه المهمة
جمع المواضيع التي كتبت لخدمة المنطقة وان شاءالله ستكون في بوست مثبت منفصل يحوي كل المقترحات ماتم منها وماكتب يبحث عن ابن الحلال اللي يفتتح المزاد

التحيه بل والتجله(التجله دي جأت في خشمي ساي) لك اخي عادل ..مابيني وعزيزي وليد توارد خواطر . فقد اقترحت ما اقترحه هو لذلك انا اترك له المهمه و (ارشحه)لها (الخواطر واحده ).....(الكلام الاتي لي وليد صاحبك بتاع البواسير قال نحن.........في.... ) فنحن ياوليد خاطر واحده والكوره في ملعبك (باصي) معاك لي عوض خياري..استاذ الزراعيه والحاسوب والجزار والترزي ....لكم (التجله) جميعا

عادل خياري كتب:

سلام لسيد البوست ولاخوة المتداخلين
رمضان كريم وكلامكم سمح واسمحوا لي ان اقول
وليد والصادق عكاشة
انسب من يقوم بهذه المهمة
جمع المواضيع التي كتبت لخدمة المنطقة وان شاءالله ستكون في بوست مثبت منفصل يحوي كل المقترحات ماتم منها وماكتب يبحث عن ابن الحلال اللي يفتتح المزاد

شنو يا ملكا .. تانى ما نقترح ولا شنو .. !!

طواااااااااااااااااالى كدا لبستونا الطوق .. ماعندك مشكلة يا حبيب .. عوض الله دا دحيشنا الاغيبش البشيل لينا الحاجات ..

ودعكاشة زاغ وقال نلعب باصات مع عوض الله ..

الصادق عكاشه كتب:

التحيه بل والتجله(التجله دي جأت في خشمي ساي) لك اخي عادل ..مابيني وعزيزي وليد توارد خواطر . فقد اقترحت ما اقترحه هو لذلك انا اترك له المهمه و (ارشحه)لها (الخواطر واحده ).....(الكلام الاتي لي وليد صاحبك بتاع البواسير قال نحن.........في.... ) فنحن ياوليد خاطر واحده والكوره في ملعبك (باصي) معاك لي عوض خياري..استاذ الزراعيه والحاسوب والجزار والترزي ....لكم (التجله) جميعا

يا عكاشة تترشح وتزوغ .. !! أفو .. أفو .. !!

عوض الله سيد الملعب وسيد الكورة .. البقدر يمشى ليهو القسم فى الضلام دا منو ؟؟

خليهو يباصى لى نفسو مع الحيطة .. ونحن نشجعوا ونجيب الكورة البرة .. !!

سير سير ياعوض الله .. نحن معاك ياعوض الله .. عيننا ما تغمد ياعوض الله ..!!

نحن وراك ياعوض...(الكلام لي وليد..عوض حقنا ابو النسب )وكر القط....والزريبه....و.....و.....كانت ايام ...نحن وراك ياعوض...يا عوض ...يا ع..و..

هههههه
الشغلة باصات
وتحويلات
انا برضك بحولا
امريكا

ابشرو يا حبان
دي الهدى في الوجدان
نطورا وننميها كمان
ح ابدا لكن النت تعبان

عوض خيارى كتب:

هههههه
الشغلة باصات
وتحويلات
انا برضك بحولا
امريكا

عنتر عنتر ملك السنتر .. !!

صانع الالعاب عوض الله باصاتك ملعوبة هى والقون .. !!

كت الكورة واطة يا برنس .. !!

ناس امريكا ديل بتاعين كورة سلـــــــــــــــــــــــــة ساى .. !!

عوض خيارى كتب:

ابشرو يا حبان
دي الهدى في الوجدان
نطورا وننميها كمان
ح ابدا لكن النت تعبان

نعم نعم واثقين ..................... !!

ابدأ .. أبدا ..

والله برضو راي
بس انا ما براي
وخليك قريب معاي

عوض خيارى كتب:

والله برضو راي
بس انا ما براي
وخليك قريب معاي

معاك يا عوض معاك

وما بنخليك تمشى براك

وسيب الجرسة والكوراك

هههههه
الجرسة كان خليتا مابتخليني

عوض خيارى كتب:

هههههه
الجرسة كان خليتا مابتخليني

كيف للجرسة ان تخليك وخالك سيد الجرسة ..؟؟

سلام
يلا اكتبوا لينا  عنوان موضوع هنا اي موضوع كان للمنتدى دور بارز فيه
بعض الافكار تمت خارج المنتدى ولكن تبناها المنتدى وكان لاعضائه القدح المعلى لاتمام المشروع
1/ نفرة المدارس
2/ الهدى مدينة بلا اشجار
3/ : ايها الاحباب ..لنوحد الصفوف.. من اجل مدرسة ...حى الصفاء..
[ انتقل الى الصفحة: 1, 2, 3]
4/ مشروع تكييف مساجد الهدى
5/مقابر الهدى
6/  العام الدراسى الجديد(مشروع بناء فصل )

اقتراااااااااااااااااااااااااااااااااااااااااااااااااااااااااااااااح
1\الاتفاق علي اولوية هذا المشروع قبل غيره حتي يتم انجازه و نعلم ان اولويته قد يختلف عليها كثيرون
و تحديد فترة كافية (لعرض المشروع - دراسة جدواه - التبرعات له - التنفيذ) و بعد هذه الفترة يتم
عرض مشروع اخر و هكذا --2\ تعيين قيمة مالية ثابتة للاعضاء يدفعوها شهريا و تكون هي الاساس
الذي تجمع عليه من بعد التبرعات من الخيرين في المنطقة - 3\ ابراز دور المنتدي في ما سبق من
انجازات و عرضه بكل الوسائل (ونسة - بوستر ..........الخ). 4\ هناك مشاريع كثيرة لم تنتهي
و قد بدا العمل فيها فعلا و هذه اري انها ذات اولوية قصوي . 5\ --------------------
------------------------- 6\-------------7\8\9\ الخ