بمحض ارادتي املك هذا الشخص راسي لكي. يفعل فيه ما يشا...!
عجبت لسهولة الانقياد ولتلك التبعيه...!
ما اصعب ان تمتلك الرؤس...وما اسهل الطاعه...!
تمشي مختارا وبكامل قواك العقليه اليه لتعيش لحظة من العبوديه...!
ارفع راسك حبه يا استاذ...بس خلاص...نزل راسك شويه ايوه خلاص كده كفايه...
والغريب في الامر انه لاينتظر منك الرد بل طواااالي يمشي الي المرحله التي تليها لانه ضامن الاستجابه...!
ما يريحني انه واقف وانا جالس...وما يرحني اكثر انه عمر اليشير ذاتو يطيعه....!
ومرات يضع السم في الدسم بكلامه اللطيف : شوف يا استاذ اليوم ده يوم جميل طليت علينا.
تسلم ..الله يبارك فيك .
اووو بس خلاص نعيما يا استاذ وكل سنه وانت طيب...رايك شنو في الحلاقه دي؟!
وانت طيب...طبعا مافيها اي كلام لانو راسي ..!

وتدفع كمان

كل سنه وانت عريس يا صديق...تدفع ومن قبل ذلك لابد ان تكون حاجز اصبح الوصول الي كرسي الحلاقه اصعب من الوصول الي كرسي الرئاسه...كلم معاك مرسي

صاحبنا حلاق الله يرحمو ويحسن اليه ف المناقل جاني في وساطة لفك عربية من اهلو ف اجراء بالمكتب عالجنا ليهو الموضوع بطريقة وسطية مارضى داير عفو كامل وهو ماشي قال اصبر بتجيني ف الدكان والموس ف يدي وبجيهك
انقر ماخفت!!!!

الخواف ربى عيالو....يا كباشي.
واليخاف على راسه يعرف خلاصو .
عرفنا نفطة ضعفك....!

سلام يا عكاشة
عيد مبارك وكل سنة وانت طيب
شكلك حلقت للعيد مبروك
والغريبة الحلاقين ديل بتلقى عندهم كل الاخبار
تحياتي لحلاقي بلادي وعلى راسهم
قرشي الشايب وعمك ود الهادي والدفعة الكامل

وانت طيب ياخياري الوحيد..انت لابس عمه حلاقتك شينه ولا شنو...ولا حالق صلعه
حليل ناس قرشي والكامل ...!
خذ الحكمه من مقص الحلاقين..!

عكاشه .كل عام وانتم بخير
مالك ومال الحﻻقه زمان موس بي قرش
وﻻ عمك قرشي خلي اسي داير كارلويس
حﻻقات اساميها زاتو ما تعرفها الشعر في محلو
والحﻻق يقبض منك العشره جنيه
صلع يت ناس مالو حرام.

يااااااااعكاشة
هوووووووي
انقرع الحلاقين ديل ما بنهبشو
لكن صحي ناس امريكا ديل قالوا ليك حلاقتم تاني ما بتقووووم
ما شايف عادل خياري غطي راسو ههههههههههههههههههه
هههه ههههههه ههههههه هههههههاي

امريكا حلاقتا مابراها عينه
ف زول ماضاق حلاقة امريكا
ف زول امريكا ماحلقت ليهو

تحياتي استاذ الصادق حلاقه بالطريقه الجد كنت تاخذ احلي نومه وانت بتحلق ياسلام عادل خياري الكامل منو الكامل ابراهيم دفعتك