ريس البلد وينو
لا بان ولا طله ؟
لا جانا يتفقد
لا زارنا في الحله ..
لا شاف وقع كم بيت
لا جاب طحين لا زيت ..
لا كفن الميتين
الماتو جوا السيل ..
لا جابلو طوريا
ساعدنا شد الحيل ..

وأصبحنا نص الليل
ما جانا منك زول ..
ولا طله منك زول ..
فاطر في كافوري
وشعبك فطورو أنين ..
نايم وتتقلب
وشفع كتار صاحيين ..
متوسد الموكيت
وشعبك رقد في الطين ..

لاك البفرج الهم
ولاك العلينا أمين ..
ولاك البجير مظلوم
ساعة تدوربو سنين ..
لا بتنجد المسكين
لاك العلينا حنين ..

هسه أكان تصويت
أو حتى انتخابات ..
كان جيتنا تترقص
تقدل مع الخايبات ..
خاميها مليارات ..
وراكبها عربيات ..
وعاديها سفريات ..
عصابة شلليات ..
ونحن لينا الله
عادنها بس بكيات ..

لا علاج ولاتعليم
لا سكنه زي الناس ..
أحلامنا زي ركشات ..
وساكانا دوم كشات ..
لا قروش ولا كاشات ..
شعبك مرق بلبوص
لا خلقه لا أخلاق ..
لا عمه لا مركوب
لا لحمة لا طايوق ..
شعبك مرق ماينص
وحشاهو دوم محروق ..
صابر وعايش الويل
ما نصو في الغربة ..
والباقي شالو السيل ..

..
.
قصيدة / السيل
للشاعر الدكتور / قعقاع تبيدي

ما نصو في الغربة ..
والباقي شالو السيل ..
_____________________________________________________________فاطر في كافوري
وشعبك فطورو أنين ..
نايم وتتقلب