السفر...
ارهاصات ..وخوف ..ووجع..
تسبق.. مرحلة الاستعداد اليه..
سترحل عن ديار ..انت تحبها..تعشقها
تهواها...تتنفسها..
الى ...المجهول..
الغربة....هى الوحشة..والصبابة
..حيث يعتصرك الالم..ولا الم..
الم من نوع خاص..لا يحسه الا المغتربين
..تعانى ..تكابد..وتسهر...
الشجون...ارتباط..قوى بالسفر..حيث تطلق لخيالك العنان
وارتباط اقوى بالغربة..والاحلام الوردية..
بماذا..تفسرون..هذا الثالوث العجيب..
اهو مثلث برمودا..؟
ام سفوح جبال الهملايا؟

والله يا حبيب الغربة ما حبابها.
لكن في زمنَا دا بقت فرض عين!.
والقعاد في البلد في ظل الوضع الإقتصادي المتدهور؛ جائز لكن مع الكراهة!.
فالغربة جيدة إذا ضمنت التربية الصحيحة للآبناء من جانب الأم.
لأن في الغربة توفير للآبناء إحتياجات التعليم، والصحة، وبعض الرفاهية!.
فيا حبيبي ما دام ضهرك ملان في البلد ما تخاف من حاجة.
وبعدين الشوق مع شبكة الإتصالات الحديثة أصبح باااااااااااارد لكن مش أوي!.
رد الله غربتك يا حبيب

الاخ /زيادة
لك التحية وانت تجوب صفحات هذا المنتدى باحثا و وناقدا ومهنيا ومستقبلا ومرحبا و مساهما تارتا اخرى 0
وفقك الله رمزا للعطاء واردا الله غربتك وغربتنا جميعا0

U r aking at ur home

الحبيب الزبير
اشكرك على المداخلة
حقيقة الحالة الاقتصادية
واحدة من اسباب الهجرة
وكما تفضلت لابد من ان تطمئن
ان الامانة البتخلفة وراك..
ماسكة زول بقدرها..وانت بتابعها بانتظام..يوميا
عوزنك يا حبيب تكتب عن خواطرك فى الغربة الداخلية

سلام ود الشيخ..
ان الهدى تستحق منا الكثير
والمنتدى مازال طفلا يحبو
ونحن نحاول ان يقف على قدمية
ويتعلم المشى..
بعد داك لمن يجرى
منو البحصلو...
المنتدى رمز وحدتنا
ورمز اخائنا
ورمز عزنا
ورمز كينونتنا
وهو روحنا وريحاننا

alhabeeb Awad
strike while the iron is hot
thanks

افتح اسكايبيك ولا اتصل ولا رد رد الله غربتك

زيادة عبد الباقى كتب:

السفر...
ارهاصات ..وخوف ..ووجع..
تسبق.. مرحلة الاستعداد اليه..
سترحل عن ديار ..انت تحبها..تعشقها
تهواها...تتنفسها..
الى ...المجهول..
الغربة....هى الوحشة..والصبابة
..حيث يعتصرك الالم..ولا الم..
الم من نوع خاص..لا يحسه الا المغتربين
..تعانى ..تكابد..وتسهر...
الشجون...ارتباط..قوى بالسفر..حيث تطلق لخيالك العنان
وارتباط اقوى بالغربة..والاحلام الوردية..
بماذا..تفسرون..هذا الثالوث العجيب..
اهو مثلث برمودا..؟
ام سفوح جبال الهملايا؟

أيها المسافرون الحاضرون...دعونا نحتفل بعودتكم ونقل وداعاً للألم والمعاناة هاأنتم الآن بيننا فكراً ثاقبا وروح يملؤها الإخاء والمحبة والإلفة وقلماً يصنع المعجزات

الحبيب ابو الحاجة
لك وام الحاجة خاص التحايا وغالى الاشواق
ناسف للانقطاع عنكم..
اليومين ديل درجة الحرارة فى المدينة 50درجة..
وانا كنت بمكة المكرمةلاداة العمرة
الحمد لله

وللاسف فقدت الجوال هناك
وهذا هو الرقم الجديد لحين استخراج الرقم السابق
009665905807796
وساتصل بيك..
على الهوت ميل

استاذى الفاضل-جذاك الله خير طرقت موضوع هم يعيشه الكثير الغربة نار ولكن لا يكتوى بنارها الى الذى يعيشها ولكن نسأل الله ان يرد غربتنا ونحن سالمين غانميين (على فكرة انا ما بت طارق )اشكرك على الاشادة

سلام ناس الغربة
الشوق محنة
والريد قطوف
والود خدار
مهما بعدنا
المنتدى يقربنا

السفر يا احباب دائما مابكون بالخاطر

اذا ماضاق صدرك عن بلاد * فارحل طالبا ارضا سواها
عجبت لمن يقوم بارض زل * وارض الله واسعة فضاها
من كان منيته فى ارض * فليس يموت فى ارض سواها

الغربة المظلومة جدا
هذا هو حالنا
دعونا لا نظلمها فهى حلت مشاكل وفتحت بيوت وكانت احن علينا من بلدنا التى طردتنا
الغربة الحقيقية المرفوضة هى الغربة داخل بيتك
عندما لا تستطيع توفير أقل متطلبات الحياة وترى ابنائك وهم محتاجين ان ياكلوا ولا تستطيع حتى تقديم الطعام لهم
شكرا للغربة التى لولاها لما استطاع كثيرين من تعليم اطفالهم ناهيك عن اعاشتهم
التحية للغربة التى تساعد الناس على قضاء حوائجهم
هذا حالنا المودينا لى وراء قدمت لنا الغربة الكثير وجزاءها النكران والبغض منا وكرهها
هل من الدين ان تذم من قدم لك المساعدة ؟؟
لابد من شكر الغربة ولا تقعوا فى طائلة الجاحدين لفضلها العظيم
اللهم انى قد بلغت ورأئت الغربة تظلم وخوفى ان تدعوا علينا ودعوة المظلوم ليس بينها وبينك حجاب ...

الخ / صديق الماحى
سلام عليك0
انت ما ناوى ترجع ولا شنو؟0
انت لانك فى مصر لذلك لم تشعر بمرارة وقساوت الغربة 0
والله لوجيتنا بجاى تفول الروب0
شكرا اخى زيادة شكرا الماحى (دا انت مش ماحى يا عمى دا انت فاكر قوى)

صلاح الشيخ كتب:

الخ / صديق الماحى
سلام عليك0
انت ما ناوى ترجع ولا شنو؟0
انت لانك فى مصر لذلك لم تشعر بمرارة وقساوت الغربة 0
والله لوجيتنا بجاى تفول الروب0
شكرا اخى زيادة شكرا الماحى (دا انت مش ماحى يا عمى دا انت فاكر قوى)

انا لا اقول الروب أبدا أبدا
دة مبديئا
انت ايضا لم تقل هذه الكلمة وما حاتقولها
كان قلت الروب كان سمعنا بيك فى السودان
الغربة ليست مرة بل حلوة جدا وكان مرة انت هسة المقعدك فيها شنو ؟
با جماعة كل ما اطلبه ان لا تظلموها ولا تشتموها وانتم تعيشوا فى نعيمها

الحبيب الى النفس أبو محمد
لك التحية ،
لا بل مثلث حبايب ( حلايب ) ههههها
هنالك علاقة طردية بين الشوق والحنين والبعد أو الغربة ، الغربة كربة ووحشة
فكلما زاد السفر زاد الحنين الى الوطن ،واين ما رحل السودانيين ، شالوا الوطن في جواهم شالوا إبداع ، شعر وغناء . .
وهي في كل حال من الأحوال لم تفرض علينا بل من صنيع أنفسنا ، حتى عندنا اوجدت لها وكالة وزارة لشئون الغربة والإغتراب .
الدخول في الغربة والعودة منها هي مسألة فردية ومسألة حسابات ، فما عليك إلا ان تضرب خماسيك في سداسيك وتتحمل تبعات أي خطوة تخطوها .
وزى مابقولوا (كدى حار وكدى حار )
ولك معزتي .
ابو وضاح

الحبيب ابو زينب
لك التحية
ورد الله
غربتك من الغربة(من غربة هونج كونج الى غربة السعودية..
والمشكلة نمشى السودان نلقى نفسنا فى غربة اخرى)
شكرا على مرورك
وكان انتو سانداتنكم ناس زينب وسارة وصفوة..وامهن
نحن عندنا الحبيب (ص)والله متكلين عليه جد
كلما احسسنا بالظما ذهبنا فارتوينا
وبعدين شاعرك ده(كابى الجرسة عديييل)
انظر ماذا يقول
بعد العذاب والضجر
بعد النزوح والسفر
كده خلى الغربة عذاب والسفر نزوح(والنزوح معناه لا ماوى ولادار حبيبة)
والشجر والظل والذى منو...حلمان بيهن بس..
عشان كده نحن فى الهوى سوى
ودمتم

شكرا مسرة..
على تهوينك للاحساس بالغربة
وحقيقة ان المنتدى
ملتقى للحبة وللاهل والاصدقاء
والعودة من الغربه للهدى (المنتدى)
عودة معنوية
زى المسكن..سرعان ماتفوق وتلقى نفسك
من جديد فى الغربة..
وتبدا رحلة الشجن ..

ام نعيم
متفقين فى ان الاحساس بالغربة
لا يحسه الا من يعيشها
ونسا الله ان يرد غربتنا
وانا طبعا جبت المنتدى طولا وعرضا
وجمعت كل الخيوط..وانا زول بحب الاستنتاج..وتشغيل المخ للوصول للنتائج
وكنت فاكر نفسى نجحت فى(فك شفرة اسمك)
رغم انى تحفظت عندما وجدت كلمة (ضج)وهى كويتية
ولكن بعد ده فسرت الماء بالماء
وياريت تخشى على البرفايل..
حتى تسهل علينا مخاطبتك

الشيخ مهند
شكرا على تطييب خاطر المغتربين
بكلماتك الجميلة
وانت جربت الغربة
فاكتب لينا عن تجربة معاها
وبرضو ورينا عن الغربة داخل الوطن
لانو اذا كان البلد طاردة كما تقول
قيصبح المغترب
كالمستجير من الرمضاء بالنار

الحبيب ابو الوالدة
البوست بوست ترويح عن النفس
نحكى ونشكى لبعض..
شنو طوالى وديتنا لدعوة المظلوم
والنار والعذاب..
طيب ما نحن برضنا مظلومين
والغربة ما قصرت معانا من الناحية الافتصادية
لكن بندفع التمن غالى..
وماتنسى الرسول (ص)
قال السفر قطعة من النار..قطعة من العذاب
وانا اشك فى من لا يعانى من عذابات الغربة
مهما كانت النتائج..يضيق صدرك
وتحتاج لاتكاءة
لتنجم

ود الشيخ
كيف حالك
الغربة حارة مش
والله مصبرنا المصبرنا
والواحد رغم انو بقى سنيور فى الغربة
لكن يظل الحال ياهو ذات الحال
ونقول يا يوم بكرة ما تسرع تخفف لي نا وجدى

الشعراء والفنانون
شكلوا كثيرا من وجداننا
دعونا نعرج عليهم
ونشوفم كتبو شنو
عن السفر
والغربة
والشجن
فنان الساقية ..حمد الريح ودتوتى..غنى
حمام الوادى ياراحل مع النسمة الفرايحية
الى ان يقول
صغارك مشتهين ترجع
مش حرام تسيبم للريح
وعارف القاسو ما شوية
فنان السودان الاول الموسيقار ود اللمين قال
قلنا ما ممكن تسافر
نحن حالفين بالمشاعر
السفر ملحوق وانت لازم
تجبر بالخواطر
الاغنية دى غناها
للست ام كلثوم فى السودان
فاجلت سفرها..صديق عباس..قال
يا مسافر بعيد رايح ساب الحبايب
يوم ليلتنا عامرة ويوم احزان تشابى
يا قلبى من حالتك الفوقك الله يصبرك
كل ما يمر صباح
زائد على شوقك ..الله يصبرك
..يلا تانى منو...

سافر ففي الاسفار خمسه فوائد

الاخ الاكرم/ حسن اسماعيل
السلام عليكم
اخى حسن انتهز هذه السانحة واحيك عاى مداخلاتك الحلوة دائما ومواضيعك احلى كمان وفقك الله
على حسب فهمى القليل لفوائد الاسفار هل هنا الغربة والاسفار بمعنى واحد ؟
عزيزى لك منى كل الود والتغدير مع جزيل شكرى 0
شكرا اخى زيادة 0

صلاح الشيخ كتب:

الاخ الاكرم/ حسن اسماعيل
السلام عليكم
اخى حسن انتهز هذه السانحة واحيك عاى مداخلاتك الحلوة دائما ومواضيعك احلى كمان وفقك الله
على حسب فهمى القليل لفوائد الاسفار هل هنا الغربة والاسفار بمعنى واحد ؟
عزيزى لك منى كل الود والتغدير مع جزيل شكرى 0
شكرا اخى زيادة 0

اولا احييك علي الاطراء
ونحن اقل من ده والله

ثانيا السفر بجيب الغربه
والغربه بتجيب الشجن
والشجن بجيب الحنين
والحنين بجيب العوده للبلد

يقول الفنان الاديب عبد الكريم الكابلى
غريب والغربة اقسى نضال
غريب والغربة سترة حال
بعيد وقريب غيوم وزوال
تشاهد فى المجرة زوال
عيونك ما عيون اجيال
وتغنت البلال لاحد الشعراء
لو تعرف انى من اجلك
مشيت مشوار سنين وسنين
مشيت ليه الى الغربة
على الكلمات ودنع العين
عشقتك لما صادفتك
وللعميد اغنية عن الغربةوالسفر
سفرى السبب لى ازاى
وسيد خليفة يغنى
يا مسافر بعيد بعيد راح ساب الحبايب
حمد الريح واغنية
الى مسافرة
هذهالاغانى عن الغربة والسفر
من اجمل ماتغنى به الفنانون
ولهم مع هذه الاغنيا ذكريات ومناسبات جميلة
لذلك نجد الارتباط الحميم بين السفر والغربة والشجن والحنين

ظلت الغربه والبعد عن الاهل والوطن والحبيب
تمثل مصدر الهام ونجوى لكثير من الكتاب والشعراء
وقد كتب احد الشعراء واعتقد انه محمد يوسف موسى
الى حبيبته عندما كان فى السعودية ..قصيدة جميلة منها
رسالاتى يازمن الافراح الوردية
عبرت موجات البحر اليك
لتطل قليلا فى عينيك
ولتحمل عذرى فى سفرى
فنا يا سمراء الصحراء
هذا قدرى

الاستاذ زيادة من اجمل ما قيل في السفر في الغناء السوداني رائعة عوض حسن ابو العلا والتي تغني بها احمد المصطفي
( نص القصيدة منقول من منتديات الدبيبة )



بطرى اللي آمال و غاية
و ما بتحمي المقدور وقاية يسلم نهجي من الرماية
***************************************
سفري السبب لي اذايا فرقة و فقدان هنايا
بطرى حبيب املي و منايا و ابكي على هذي النهاية
و ببكي على تهديم بنايا ليت حبيبي علي ناح
*************************************
فيييك يا مصر اسباب اذايا و في السودان همي و عزايا
صابر و لم اعلم جزايا و التأويه اصبح غذايا
صرت مسلم لي ردايا زي طاير مكسور جناح
*************************************
دهري ان صابني بكل خفايا و حطم و عكر لي صفايا
برضي على حبي و وفايا و اعلم في وجودك شفايا
شي من لا شي بس كفايا علو بمسّك اجد نصاح
************************************
ماذا اؤمل .....ماذا اؤمل
ماذا اؤمل حيران ببكي و بامل
ولهان ببكي و بامل وحيد ببكي و بامل
آآآآآهــــ يا هوايا و آآآآآآآآآهــــــ يا منايا
وحيد سهران برايا انيس دمعي و بكايا
آآآآآآهــــ يا كناري و آآآآهــــــــ يا قماري
طيري لي تعالي وحيد ليلي و نهاري

حسن اسماعيل كتب:

سافر ففي الاسفار خمسه فوائد

قال ابن المقفع:
من تزود بخمس خلال أنسته في كل غربة قربن له البعيد،وأكسبنه المعاش والأخوان:
كــف الأذى وحسن الأدب، ومجانبة الريب، وكرم الخلق، والنبل في العمل.
لكم مني كل الود..........

الاخ الاستاذ ابومحمد رد الله غربتكم ردا جميلا سالمين

غانمين والغريب عن وطنو مهما طال بعادو مصيرو يرجع

تانى لاهلو وصحابو ينسى الامو وشجونو وينسى حرمانو

وعزابو ونسال الله ان تعودوا بما ينسيكم الالام والاشجان

وعذابات الحرمان

بالمناسبة واحد مغترب اتصل على اخوه وقال ليهو انا

خلاص قررت ارجع البلد , الاخ قال ليهو انا ماداير

اخوفك لكن الكسرة البى موية ساى طماطما بى تلاتة الف

الاحباب العزاء
متعكم الله بالصحة والعافية
كلما نفتح طاقة للامل
يغلف الف باب
كل القادمين الان من السودان
يرهبونك من العودة..
البلد ماشة فى هاوية
البلد تتمزق
البلد جايطة
البلد اخلاقها انتهت
الاسعار مولعة
الانفصال
وبوادره ادت الى التضخم
الريال طار السماء
والله نحن مع الطيور الما بنعرف ليها
خرطة ولا فى ايدها جواز..
......
لا قدرت اطولك عشان اجيك لا قدرت من غيرك اكون

لاشك أن الغربــــــــة ألام وأِشجان ويؤيد هذا حديث النبي صلى الله عليه وسلم ( السفر قطعة من عذاب فمن قضى نهمته فليعجل الى أهله ) وكذلك الدهر ينهره بالذل والمحن . الله يرد غربتنا ويؤنس وحشتنا . والسلام