** حكاية الالفة ... والحزن المقيم **
عارفين حكاية الحرقة والحزن النزييف
لمن يفارق دنيتك زوول مجرتق
وزوول رهيف
لمن تغالب وجعتك وتشيلا صيف
لمن دواخلك ترتجف لخبر
يبس حروف اللقيا وعماها الجفاف
يوماتي بتهاتي وبتحن
لزوول خريف
عارفين حكاية آلاهة لما تسكن في الضلوع
وتطفي جوانا الشموع
من فارقنا زول كان
في حضورو نور
هو البقسم للجميع من غير فرز
كل الحبور
داير احكيلكم
حكاية الامل الاصبح الم
والفرح لمن يركب مع الحرف .. الوداااع
والوجعة اكبر من حدود الاحتمال
والشوق شفيف
والدمعة لسه ماعرفت تقيف
ياااضل وريف
والآهة غالبت الشوارع والرصيف
ابدأ من وييين ولا ووووين
ماالحزن شلال مدفق
والعتمة غطت كل الدواخل والمداخل والكهوف
**
وهبة المجرتق يازووول نضيييف
ودفع الله الحنيييين يوم فرقتك
كان امتحان
وهبة انسان ... وهبة فنان
بريشتك تشكل الف لوحة
ومن اصلك الطاهر حنان
وهبة ياسمح الخصال
وهبة يااروع مثال
للخير .. للحب .. ولكل الجمال
وهبة العريس
يامعدنك غالي ونفييس
بحنتك كانت زفتك
لحورية من حور الجناان
***
وآآآه لمن تغالب لوعتك
لزول رهيف
مهدي السراج الماانطفي
مهدي البحضورو .. بس كفي
مهدي الوسامة ... الابتسامة
اللهداه شالها تاج ..
وبالانتماء شالها احساس بينبض في الوريد
مهدي عنوان الوفاء
بفراقك ياسراجنا
فرحنا من دنيانا اختفي
***
وآآآه لمن تحس بالغبن من اقرب قريب
ودمساعد ياخريفنا ... ياحبيييب
منك اتعلمنا انو العطاء
اصلو مابحتاج مقابل
كنت مااافي
يازول مطر غسل دواخلنا بالالفة
والفرح الخرافي
كان ملاذنا .. ونبضو داافي
هو الكريم في كل شيء
هو البحروفوا بننتشي
هو الوحيد النخلة في معني العطاء
وابنوسة كان .. رمز الصموود
كتاب كبيير حافظ تراث كل الجدود
بالخير بجوود
فارقنا بنفس احساسو الفريد
صديق صدوووق
بفرقتو اتيتمت كل الخلوق
***
وآآآه لمن يغييب ذاك الحضوور
لمن ينطفي جوانا نوور
لمن تكون الارض بور
لمن تخنقك عبرة لبدر البدوور
آآآآه ياااا عبدالغفووور
كان الرحيل ...
بين حنيينك لصحابك
وبين امانينا البقت مشتاقها وبتغالب لوعتها
ابدا ... ماكان رحييييل
كان بس حضووور
ماانت لسه
جوانا نووور
***
وتبدأ الحكاية من ام جديد
حكاية الفة .. ودهشة
حكاية ناس مستفة بالفرح
ناس مكتوب تعيش سوا
وترحل سوا
تعيش عشان مايفرح كل زول ويكون
سعيد
تعيش عشان ماتصنع رغم الالم
املا جديد
وزي النسمة كانت دخلتهم كل البيووت
وكل البسمة كانت طلتهم
رغم الخفووت
عاااااارفين حكاية الالفة .. والحزن المقيم
لمن يفراق دنيتك
زول مجرتق
وزول رهيف
وزول بحضورو نور
وزول خريف
** ودمدثر 24/8/2013 **
موضوع: حكاااية الالفة .... والحزن المقيم 
الأحد 25 أغسطس 2013 - 8:35
