الاخوة المفسبكين سلام تحية واحترام اهلا بكم على شاطىء الفوس بوك السعيد
كنا مشتركين مع قروب اولاد السواجير او ناس السواجير والادمن هو احمد الحبيب
حرمنا من التواصل معكم نسبة للنقد لما ينشر ويفحم به صفحات الفوس بوك
وهو وحسين البشير( يكتبون فى الثقافة وعلوم الاجتماع والاقتصاد ولهم اطروحات
كثيرة فى عودة ود ابرق بعد الغياب والزيارات الخاطفة لام ام قيردون الحاجة
ودلالتها على سماحة الخريف هذا العام اللهم اجعله خريف خير وبركة
ويأتوك بأخبار السحلى والسحلية واخبار النمل اب ريش الذى فقد الريش وصار لا يلسع
ويصور نمله يقولك حلفت بالله لما تشوف الضب دا دوس فرملة اقصد دوس لايك
ولهم من الاخبار العاجلة الكثير مثلا حمارة ناس جبر السيد وقعت فى الطين وديك ناس ابو جركان كسر العدة وبقرة ناس فرطوق جابت عجل خديج والورل طلق الورلة بتاعته عشان نامت مع الجيران والزرناخة السنة ماجات وهلم جرا انحرمنا من ها الاخبار
هولاء كلهم مرضى الفوس بوك عالم وهم  خرموا اى حاجة
وبالله عليك دوس لايك وسألتك بالذى ما خلقك الا تدوس لايك على هذه الحمامة

وعندنا واحد تانى جنو والاقتباس من الادب العالمى
مثلا
الحياة حلوة عليك ان تحياها بحلوها ومرها جبران خليل
كتلوك ولا جوك جوك -- حمدرة قباض الطير
المرأة كالوردة الفواحة- محمود العقاد
ناس الصعيد انقرضو - عليوة المكعكع
جميل ان تنسى هموم الحياة وقلة الحيلة- بريمة العرضوحالجى

ودالبلة ادانا طلة
حلاتو ياناس
ياخي حمدا لله غلى السلامة. الناس تشيل وتطالب. بيك وتسأل منك
اتاري انت غاتس مع. ناس الفيس بوك
منتظرين عودة قلمك ومواضيعك ذات النكهه الخاصة

الفيس بوك ملاذ جميل للهاربين من قضايا الهدى الملحة وما اكثرنا من هاربين من ام رووم نتنكر لها عمليا بضمير مستتر اسمه الفيس كوك
جنى جن الزول البيتو وسخان ويشيل مكنسته ينضف فى بيت الجيران

ودالبلة سلام
خشيت الفيس بوك تاني ولا شنو غتست كدة

نرى عزوف كثير من ابناء الهدى عن منتديات ابناء الهدى رغم اقامتهم الدائمة فى الفيس بوك ... ياترى ماهى الأسباب التى تجعل معظم ابناء الهدى لا يشتركون ولا يشاركون فى المنتدى ؟ هل هى عقدة نفسية ام عدم فهم معنى منتدى ام يظن البعض ان المنتدى منبر غير حر ؟ المنتدى منبر حر كالفيس بوك تماما ولكنه يختص بقضايا الهدى فقط والفيس بوك كذلك ومن الممكن ان يخدم الهدى ايضا ولكن من المستغرب ان يكون بيتك ممتلئيا بالوسخ وتشترى مكنسة لتنظف بيت جارك ؟ ماذا تكلفك ربع ساعة من الساعات الطوال فى الفيس من اجل بلدك ايها الوفى المحترم ؟