فاطنة وود ام بعلو

فاطنة عندها اخوها اسمو محمد كان بجيها من الزراعة بالليل بدق الباب ويقول بصوت حلو كالغناء : فاطنة ! يا فاطنة انا مو حومد اخوكى البغديكى و البعشيكى اقوم بالليل اغطيكى افتحى لى الباب!!!
وتفتح له يخش ....
اها مرة قام سمعو ( ود ام بعلو) فبقى يجيها البيت واقول زى مو حومد اخوها عشان تفتح لو ويقوم ياكلا . علا كان صوتو تخين ما زى مو حومد
فاطنة بترد : كر كر حسك حس حمار , حس مو حومد اخوى جرس النجار
ود ام بعلومشى لى الحداد وقالو : يا اما تطرق لى حسى دا والا اكلك , الحداد قالو ما تاكل الفطيسة وما تدردق فى بيوت النمل... المرة الاولى الدمبعلو ما سمع كلامو واكل الفطيسة واتدردق كالعادة فى بيوت النمل..ورجع صوتو تخين وقبيح
الا تانى المرة التانية سمع الكلام...و
قام ود ام بعلو جا لى فاطنة بصوت حلو كالغناء وقالا : فاطنة يا فاطنة !فاطنة انا مو حومد اخوك البغديكى و البعشيكى اقوم بالليل واغطيكى افتحى لى الباب ...
مو حومد قامت فاطنة فتحت لو . لمان ود ام بعلو كان داير ياكلا اتفقت معاهو على أن يتركها..وياكل محمد اخوها خوفا على نفسها ...
ود ام بعلو قالها : لمن مو حومد يجى ويقولك املى الكوز قولى لو ما بقدر عندى وجع راس... انا بستناو جنب الزير عشان آكلو
محمد لمن مشى الزير وكان داير ياكلو ه كورك لى كلابو التلاتة مسميهن ( برمة وبريمة ست البرمات ) وقال برمة يـا بريمة يـا ست البرمات سيدكن اكلو اكلو فقامت الكلاب جن واكلن ود ام بعلو
وقالهن دايركن تاكلن لى فاطنة دى ماتخلن فيها الا عضم الرباية ... وتاكلن ولدا برضو وتاكلن الصقر دا برضو ماتخلن فيو الا عضم الرباية!!!!
عضم الرباية : عضم النشوء الذى يتم من خلاله صرف اوامر النمو...والتطور...والبعث يوم الدين
.
الشاهد..أيها الطفل الزمان ( نحنا) : لاتفتح الباب لمن لاتعرف.
الخيانة لايفلح كيدها...
الخوف لايصنع الامان...
الكذب غير منجى.
الجزاء من جنس العمل
لا قيمة اعلى من الاخاء.
لاقيمة للاخاء لو لم يكن فيه فداء.
النظافة والطعام الطيب من حسن القبول.
ود ام بعلو: اسم لكائن خيالى خرافى..يمثل قبح الشر...قبيح المنظر...والرائحة يتغذى على الفطائيس يشبه الحلوف.( الخنزير الاسود البرى).وضيع ينام على بيوت النمل...يجرى كالضبع...يطهر فى الظلام..الصورة تكفى الطفل...لكى يتهيأ لقبول الرسالة...تضامن الاسرة الواحدة مقابل الشر...ود امبعلو جاكم....!!!!!

ود امبعلو حاكم
وفاطنة من عامة الشعب تربطها مع حومد علاقة مصالح بانتهاء المصالح تنتهي العلاقة
قصة من الامس ولكنها من واقع اليوم