انا يا بلــد ..

انا يابلد .. مرسوم على خاطر الزمان والإندهاش
وأنا شلتا أحزان الفراش
لما الرشاش حرم الخدار ريحة الدعاش
وانا يا بلد ..
ساعة الشمس بي نورا تفقع في الجروف
بتلاشي من عمقي الكلام .. وبتهوا في داخلي الحروف
وأنا يابلد ..
رغم المشاوير والخطى .. الدايرة في فلك الرتابة
شلتا من عمقي الفرح .. قستمو للناس الغلابة
شلتا الضياع تيبان غطى .. وأحزاني كيفن اكبتا
وأنا يابلد ..
لو طرفي المساهر يابلد في النوم هجع
وحمامنا بي لحن السنين دندن سجع
بكتب على كل الدروب أحرف غناي
وارسم على كل البيوت لهفة خطاي
واضحــك براي
أنا زي ولد هام بترابك يابلــد
مليون حبابك يابلد ...

اقتباس :

لو طرفي المساهر يابلد في النوم هجع

اعمل نايم يافرده

الأخ حسن اسماعيل
لك التحية . ـ
يا أخي والله ضحكتني .. ضحك شديد
وطبعا دي أمنيتو أن ينوم ، لأنو قال لو طرفي ..
وماتنسى يا شيخ حسن .. النوم بجيب اللوم

ولك محبتي أبو وضاح

شلتا من عمقي الفرح .. قستمو للناس الغلابة
شلتا الضياع تيبان غطى .. وأحزاني كيفن اكبتا

لك التحية طارق
هذا الابيات حركت فينا مشاعر والحنين
للوطن الصغير
وماتنسى هذه الايام ايام الرشاش وريحة الدعاش وهمبريب
واجواء نحد عليها
لك ودى

الأخ المهند
لك التحية والود
شكرا على مرورك .. حقا إنها ابيات جميلة رائعة
تثير الشجون والحنين
ترتحل معها بالوجدان الى أجواء خريفية ..
الى دفء الناس والعشيرة والأهل
لك التحية على مرورك .

ابو وضاح

اخونا العود ...
لك التحيه علي هذه الابيات الحلوه
وربنا يردنا للغلابه وهمس البلد وريحة الدعاش وقهبونة ود حاج الماح
لك احترامي

يا سلام عليك يابووضاح، يارائع ومفتون بتراب بلدك،عفوا ...فقد امتدت سنين الوجع،واختفى الطبيب المداوى... ولكن يبقى التفاؤل هو البلسم لنا ولك بأن هناك شيخوخة امنة ...تنتظرنا فى بلد الدهشة والدعاش...ويا يوم بكرة ما تسرع.

الحببيب الى النفس ( ابو زينب )
لك التحية على مرورك الرائع ..
ومهما أمتدت سنين الوجع فيحدونا أمل كبير بالله ، وزى ما قال الشاعر :

والغريب عن بلدو مهما طال غيابو
مصيرو يرجع تاني لي أهلو وصحابو
وإنشاء الله العود أحمد للجميع .
ويأخي فشر فشر ( على قول أهلنا في شمال الوادي ) شيخوخة أيه .. بعد الشر نحن في عز الشباب .

ولك تحياتي ..
ابو وضاح .