ركبة جديدة
ركبة جديدة
وبمبة حديدة
وبركات حاجة( فلانة )
يا ربي
تزيده
ورعدة
وقعدة
ومطرة شديدة
واولاد حلتنا الرفعوا الحيطة الواقعة
بموية الخور اكلوها عصيدة
وحاجة العازة
الضقنا هواها
وهمنا بريده
تحت المطرة الصابة
بتمسك سبحة ولخير الله
بترفع ايده
وديمة بتسأل
(وامرأته اللابسة الدهب )
متين يا الله بحبل المسد
نطوق جيده
وزوجة قديمة
واخرى جديدة
ركبة شمال
والتانية يمين
وحاج الزين
الراجل الزين
خايض في الطين
صابرلو سنين
هداهو الدين
ما اضايق يوم / ماسب الدين
و بعد رمضان ماسكلو نفل
صام كل خميس ومعاهو اتنين
ما سوا الشين !!
ولاجاب مرتين
ومن الكضاب سداهو الباب
سدا الاضنين
قاللو السد
قال سد الدين !!!!
قالولو الدين
قال دين سارقين
قالولو اهل
جايين من وين ؟؟؟
ركبة شمال والتانية
يمين
وما بغشونا وهم عارفين !!!
إنو اولادنا
وباقي بناتنا
وحبوباتنا الخاضو الموية
عشان حارين
بعرفوا القبة
وشيخ الربة
ومين كاجننو ؟؟
ومين يتحبه
ومين الشين ؟؟
ركبة يمين
والتانية شمال
و ودالسرة
العارف الحال
ساب الحلة
وموية القلة
وسمر الشلة
وبت الخال
وكفر اللورى السووا نعال
وحاج الطاهر وبت شوتال
ساب البلد البقدل فيها
الخال
التور الضبح التور
يوم فات ملوال
ركبة يمين
والتانية يمين
وما بغشونا باسم الدين
احمد قاعد
وحاج عوضين
وحتى السرة
وبت الصرة
وعشة القالوا اخير تندسة بعد تتعشا
وفاطنة السمحة
وعوض الشين
ركبة شمال
والتانية جنوب
وفي دارفور قالوها الرووب
ركبة شروق
شايلاهو هبوب
وركبة غروب
شتلة
ونخلة
وناس
جلابة
وناس منبهلة
وأصلة طويلة
وكايسة دروب
زحمة
ولخمة
وناس زعلانة
وناس مبتسمة
ما ناس لجنة
وكجنة
ودقنة
وقوم بحق الناس مندفنة
قدري التوب
وسمحة الخيمة وحقي الشال
ركبة يمين
وركبة شمال
وربك شايف
عارف
وبكرة الجد للقايلوا محال
وثورة
وفورة
ناس بالنص ماشين الثورة
وما بتحلك مننا
عادة
ولا بتحلك مننا
دورة
وما بتحلك مننا عمرة
و لابتحلك مننا عمرة
ركبة تشوف
وتشيل العورة
وركبة ابريل واكتوبر ثورة
ركبة رقيص
والتانية رفس
وفوق العازة نهينا نفس
ونفرح فرحا جهر و همس
ونضحك باكر
وننسى امس
ركبة جديدة
وركبة في كوع
للكوعو لحس
عباس الرضي / السعودية / 18 / 8 / 2014
موضوع: الركبة الجديدة .. شعر عباس الرضى 
الثلاثاء 19 أغسطس 2014 - 12:47
