هذه الايام ظهر العدار في البر والبحر ولكن واعوذ بالله من كلمة لكن اصبح العنوكليب يباع والقش يباع مستحلبات اللبن تباع في حين ان اللبن ذاته كان يهدي وكانت كورة النفسا تاتيها اربعين يوما لاتنقطع كانها مشتركة في مجلة العربي والدوحة كنت كل مادخلت علي النفسا وجدت عندها رزقا
حاشية
مرة جرينا خلف عمك ونحن نلح في طلب قصبة ولكن كان عمك عنيدا ولكن كان فينا من هو عنيد جدا طارد عمك واستل قصبة من تحته عنوة وقد كان هذا التصرف مفاجيء. لتوازن عمك حيث اتي به ارضا غصبا عنه باختصار لقد اكلنا كل ذلك القصب ليس في بطوننا ولكن علي ظهورنا علقة لم ياخذها جعلية في حفلة عرضة ودلوكة وبطان

بعادين زمان بنقطع الطريق علي عمك وهو يمتطي حماره المليء. بالقصب ونحن نتبعه عمي اديني قصبة ويرميها لنا علي بعد مسافة نقطعها جري ونحن راضون
وهناك من ينتهرنا فيذيدنا اصرارا ونكثر من الحليفة ثم يرمي لنا باكثر من واحدة وهو يبتسم بحنان

سلام أستاذ عثمان
ياراجل ياظريف
صاحب الأسلوب السهل الممتنع
ياخي كورة النفسا دي بالغت فيها عديل كدة
فيها قصة مع أخمد خالد الشريقاوي مقلب من النوع العجيب داك
يمكن ارجع ليك ليها
لكن بتاعة عمك الشتت قصبو ده آلا يكون عمك حسبو
واصل إبداعاتك هنا وفي الواتساب

ذات مره جريت وراء عمك : عمي اديني قصبه عمي اديني عمي اديني
قال لي : والله ان طرت السما مابديك .
قلت ليه : اصلو بقى قصب السبق !
واحد زهجان من زوجته النفسا بتشرب في كورتا وما بتديهو قال ليها في اربعينك دي احفظي معاك الاربعين النووية .
لك التحية استاذنا ابو شيبه .

واحد مشى العراق ومعاه مرتو اتوحمت فى كسرة بى موية .. الكسرة بعيدة منو اتصل على واحد صاحبو ساكن جنب الكسرة قال ليهو ياخى انا عاومك كسرة بى موية صاحبو فهمو قال ليهو طيب انا على الكسرة انت عليك شنو فال ليهو بسرعة ... الموية طبعا
اقول ليك حاجة مرتى فى السودان تتوحم على تفاح وفى العراق تتوحم على كسرة بى موية
سلام ابو عفان

سلام أستاذ عادل
أتشرف لمرورك الكريم على هذه الشخابيط التي تعتبرها أسلوب ممتنع
ممتنع من شنو ماعارف
ههه
بلاي عايزنك تحكي لينا المقلب بتاع احمد خالد ده
اصلو مقالب الشريقاويبن دي مابتخلص وعبرك نسوق التحية
معطرة بالدكوة معبقة بريحة التسالي الى احمد وهو يتبختر في نيجيريا

الصادق عكاشة ياطيب انت
مشكور على المرور والإضافة
تحمد سيدك عمك ما اداك محطة محطتين بي سوط عمارتو المكادية دي
اما بخصوص الأربعين حرامي
فعلت حرمنة نفسا ساي
لأنو اكتشفت ليك انو الأربعين وانو المرة ماتمرق من البيت وما تعمل حاجة ده كسل سودانيات ليس الا
وضاع الرجل السوداني

سلام ودالماحي
تشكر على المرور
صاحبك بتاع العراق ده مرتو نفيستها ساقطة ساي
عينها للطيبات القدامها كلهن تقول عايزة ليها كسرة بي موية
البركة الماقالت ليه عايزة لي ام فتفت دي كان يحلوها كيف اسه
تحياتي بالمصري

سلام عليكم جميعا
موضوع ممتع فعلا لكن كورة النفسا دى اول مره اسمع بيها
نحنا خسرنا خساير فى الستين انا قاصد الاربعين مازادوها !!!!!
اخونا الصديق الزمن ده فى السودان مرتك تتوحم بتفاح بتخرب بيتك
اسال مجرب عملته ظريف اليومين الاوائل وبعد داك بقيت بعمل ماسامع
واكان علو الصوت وسمعونى بعمل مافاهم
بصراحة شديدة جدا لبن الشفع ده فيهو فزعه ...... فزعه ......

ابداع

كل عام واالجميع بخير