ياجماعه والله امريكا دي بي عمايلها البتسوي فيها للعالم التالت ده ونصرانيتها ويهوديتها عندها حاجات لناس البلد جميلة ونظام وحماية مستهلك
المهم ما اطول عليكم اخش في الموضوع اشتريت قبل مده كوت بتاع برد ولبستو ليك تقريبا شهرين وشوية قاشر بيه لانو جديد وسمح وتتوضا وتغسل يديك وانت لابسو ولابهمك يعني بالعربي كدي الكم بتاع اليدين وسخ شوية كدي ماكتير عشان مافي غبار وتراب والذي منو
قومي يالزرارة نمره 2 انقطعي مع انو فيه سوستة يعني مافرقت كتير لكن ياولد انت خسران حاجة ارجع المحل وقول ليهم الزرارة انقطعت
وريها ليهم توشك توشك مشيت المحل نفس المحل لكن في ولاية تانية كمان شايل الجرم والدليل اشتريت الكوت ده منكم والزراره انقطعت رجعوه لي مادايرو
سالني عندك فاتوره ابدا ماعندي
طيب في الحالة دي امشي قسم الكوتات لو لقيت نفس الماركة نبدلو ليك ولو مالقيت الا ترجع محل اشتريتو
ولي حظي العجيب مالقيت
رجعت بي خفي حنين
ورجعت محل اشتريتو نفس القراية الاولى ومن غير تردد
جدا امشي هناك جيب واحد جديد
لقيت نفس الماركة طبقت لي واحد وجيت ختيت القديم والجديد قدام الكاشير هبش المكنة وهبشك الماضراك قال لي اتفضل شيل الجديد وح نرجع القديم الشركة
والاغرب من كده رجع لي باقي قروش قال انت اشتريتو غالي واسه سعرو نزل
في محلي داك اتذكرت دكاكينا واليافطة المعلقنها فوق الرف

]البضاعه بعد خروجها من المحل لاتستبدل ولاتسترجع

وقومى ياالحيطة اقعى

وياالغنماية موتى

دا زمان كدا فاصل لتغيير الموضوع عندنا لمن يكون القادم مااحلى

اها يابتاع الكوت انت .. الكوتات ماعندك .. على وزن كوتة السكر

وسعر السكر الغالى .. ورمضان كريم

زكرتنى بص العونى

والعفش داخل البص على مسعولية صاحبه

والحلوة فى دكاكينا لما تجى تشترى يكون استقبالك استقبال الفاتحين

بكون المحل هااااااااااااش باااااااااااااش

اما لمن تجى راجع ببضاعتهم الموضوع دا قريب من تعادل المريخ الاخير

وجه عابس .. وعيون تقرب تعضيك





بالجنبة كدا

الموضوع فى البال والخاتر .. بس القدم ليها رافع .. وليه تغتى الصورة صورة


اليومين دى الربيع يعود الينا من جديد .. على انغام سلم خماسى

يعزفه الود سادومبا بالفلووووووووووووت ومن دون كوت


قبال مااتخارج

ضحكنى صاحبى من ناس الجيش ديلك ..

قعد يغالت فينى قال شنو

قال سادومبا ماعندو وطنية

انت عارف ياود خيارى موضوعك دا ذكرنى
موضوع اللافتات القاعدة تتعلق شماعة
مثل الوقت للعمل ولاداعى للاحراج
او بسبب الدين فقدنا الكثيرين وحفاظا على البقية اوقفنا التعامل بة
وحاجااااااات كثيرة معلقة فى المتاجر والمساكن والمؤسسات لكن لايفعلون بها
غايتو حارجع ليها فى بوست خاص
ماتسرق الفكرة حقتى دى وتجرى تكتب بوست عن اللاموضوعية فى اللافتات
واقوم كدة اشتكشك لاميركا وهاك ياااااااااا
والباقى عارفوا
المهم نحن فى السودان تجى من الشغل شاقى السوق العربى تلقى ابو الفين بقى بالف
وتقوم تخم وتجرى البيت بعد الراحة بتجى المتاعب لمن تقراء تاريخ الصلاحية
غايتو دى بلد ودى مستهلك
وداك بلد وولد
ولك العتبى

الحبيب ابو الطيب

لك التحية . ـ
طبعا لا داعي للمقارنة ووجه الشـــبه ..
تعامل راقي متحضر .. من ناس راقين متحضرين.
في مجتمع تصان فيه كرامة الإنسان .. وتحفظ حقوقه

لكن شكلك كدا .. حتسويها شغلة .. كل ما إنقطع زرار أو سستة حلجت
تجيهم جاري .. و كمان أمكن الكوت دا يمشي السودان .. وياخود ليهو لفة وحوامة في الهدي .. وتجي تستبدلوا تاني ..

الله يعيينهم .

لك التحية ..
ابو وضاح

ناس صادقة ولا يتخيلوك ابدا يا عادل ممكن تكذب عليهم
شالوا كلام رسولنا كله ونفذوه وبقوا الأول فى العالم ونحن نتشدق الرسول قال وربنا قال والغريبة تلقى التاجر قدام الدكان فارش ليهو مصلاية
نحن كمسلمين معتقدين بان رب العالمين لو ما عملت له حاجاته سيعمل لك حاجاتك على اساس نحن خلاص مسلمين واحسن ناس وربنا أصلا بيحبنا حتى بتديننا النظرى دة مش قلنا لا اله الا الله وخلاص
الامريكان ديل ناس زينا لكن مفتحين .. عرفوها وربنا كافأهم على المعرفة دى ونحن ربنا مسلط علينا من لا يرحمنا

هههههههههههههههههههههههه
والله لكن
الكوت عندك

سلام ودمدثر انت سحار عديل كدة

اقتباس :

وقومى ياالحيطة اقعى

وياالغنماية موتى

دا زمان كدا فاصل لتغيير الموضوع عندنا لمن يكون القادم مااحلى

فعلا من ضمن الاسباب المنتدى كان فاضي ونفس المواضيع بايتة اتصفحتها كلها قلت ياولد طلع الكوت بتاعك ده اكسر بيه الحاجز وغير الموضوع
لكن انت الكلمك منو كدة
تحياتي ومرورك الانيق يطربني