بدايات شهر6كنت شغال فى الحصحيصا,وكنت مبيت نية المشى للهدى داير اشوف أبوى أبارك ليهو بت الشريف الجديده,وازور الاهل والاحباب.
نفذته الفكره ومشيت,لحقت الغدا مع ابوى وبى أريحيتو بدا يحكى عن الاخبار فى نص الكلام قال جمله(ناس الهدى عملو منتدى)وقفت اى حاجه وبديت انا أسال(متين-اسمو-عنوانو-الكلمك منو-الإستضافو منو-الاداره والاشراف)أسئله كتيره لكن ماجاوبنى إلا على الزول الكلمو
-استاذ عوض الله
-عوض الله منو
-عوض الله خيارى
وبدا يسألنى عن أحسن طريقه لدخول النت فى الهدى
قلت الموبايل بشريحه زين.تدخل بيهو مباشر او بالكمبيوتر عن طريق وصله ورخيس جدا.جبته سيرة الكمبيوتر طوالى قال نمشى لعوض الله أجهزتى عندو للتصليح والصيانه.
وصلنا لعوض بنتونس وبنتسأل قال لى إذا عندى فلاش داير يدينى صور للهدى أرسلن لعادل خيارى فى ايميلو لانو هو عندو مشاكل فى الرفع والتحميل.
الممتع عوض كان عندو أكتر من6أجهزه مافى واحد شغال. والممتع أكتر لملم من جاى لى جاى شغل واحد(كيبورت الاحمر مع ماوس الاسود مع شاشة الابيض)مادير أوصف الUSBياعوض خليهو مستور.
حقيقه بجهد إستثنائى حول لى الصور.المصيبه بعد وصلت مدنى مالقيتن فى كم نفر شالو الفلاش.
بعد داك لقيت نفسى ملحق بإداره المشروعات وماأدراك ماالمشروعات الخلا والدوام المهلك.لقيت فرصه سجلت يوم10/6وماطليت تانى الا الليله.لكى العتبى مدينتى حتى ترضى.
حقيقه حاسى إنى فى دكان ود المرضى أوقهوة حسن البله.
لالالاحاسى إنى إنتهيت من صلاة العيد وبسلم على الهدى كلها.
لالالا.......عندى إحساس لكن ماعارف ليهو وصف ماعارف.
جد جد منتدى ممتع وجميل,أكبر الشكر للذين نفذو الفكره,وللذين أثرو المنتدى بمساهمهتم.
مره أخرى لكى العتبى حتى ترضى,وسترضى لأن الأم ترضى عن أولادها وتسامح.
سامحينى يامدينتى..........لالالا سامحينى ياأمى.

لك التحية يا رايع ولاخونا جلال

أصيل يا أصيل
يا ود جلال ود أمحمدنور
نقول ود الوز عوام
واللسم بدي الربع (بكسر اللام)
التحية عبرك للوالد جلال والأخ سيف نجفففففة (بتعطيش الجيم وإضغامها في النون)والأخ عادل وكمان ياسر
كما لا يفوتني أن أطرى طيب الذكر المرحوم أنس بالخير
نسأل الله أن يوسع له في قبره
وأن يجعل الجنة متقلبه ومثواه

بالنسبة لاعتذارك الأم الرؤوم بنحنسها ليك تقبل عذرك
لكن ما تكررا تاني وقول التوووووووبة

التوبه ساى ياعلاء السنى.التوبه والروووووووووووووووووووووووووووووووووووووووب.
إزيك وإزى جنوبنا الحبيب زى مابقولو الجماعه الطيبين.

بركة الجيت الصور ملحوقة بركة السلمتا كدي سميناها رضينا
‏@‏ @

(في داعي للفضائح)
هههههه

تحيه ليك ياعوض خيارى
إنت عارف الفضايح القلتها.بتثبت كلامك القلتو فى موضوع عدم التواصل وأسباسبو.

سلام اخونا عادل
لك التحية وانت تسجل حضور وان تاتي متاخرا خيرا من الا تاتي
وعشان نرضى منك ونسامحك اولا لازم ترسل لينا الصور لانو الشغل اتاخر كتير جدا
بسبب الصور دي
ثانيا لانك متاخر لازم تقدم مشاركات بقدر غيابك حتى تلحق ركب اخوانك اولاد الام الهدى لكي ترضى عنك الام
وتقول ليهم وان كنت الاخير زمانه لات بما لم ياتي به الاوائل
على بركة الله منتظرين