سلام ياناس رمضان وكيف صمتوا وفطرتو وان شاءالله ربنا يتقبل منكم ومنا ويعيننا على الطاعات في هذا الشهر الفضبل
وبمناسبة رمضان طبعا اخر يوم جري شديد وصرف مبالغة وده كلو يدخل في خانة خم الرماد
قومي ياام العيال جهزي ليك لستة اكتر من لستة صديق مساعد بتاعة المهرجلين
يافتاح ياعليم يارزاق ياكريم نمشي ..... ده خم رماد ده ولا سجم رماد
الشباب البرنامج ماظابط معاهم اول ماوصلنا المول ركزوا على السينما يابوي نحن نزلنا هنا نحضر الفيلم ده الكلاب والقطط
فيلم جديد ونحن في اجازة و و و و و احسن يلا انزلوا اتوكلت وقطعت ليهم تذاكرهم وسالت بتاعة الشباك الفيلم ده بياخد كم من الزمن
قالت ساعة ونص وبعد داك مشينا على لستتنا وبعد الساعه ونص بالزبط جينا راجعين نسوق الاولاد دخلت جوة صالة رقم 4 بتاعة الفيلم
والفيلم في اخر دقايق والمفاجأة العجيبة انو الصالة الكبيرة دي كلها والتكييف والاضاءة والفيلم نفسو مشغلنها للسيد الطيب والسيد عزمي
آي والله الصالة فاااااااااااااااااااااااااااااااااااااااااااضية الا من الطيب وعزمي اتنين بس لانو قطعوا ليهم تذاكر لازم يلتزموا يشغلوا ليهم الفيلم

اها ياجماعه خلاصة الموضوع تنفيذ الالتزام بالوعد
يعني الناس اللي التزمت بقروش المدارس ممكن تدفعها للجنة في مواعيدها
الاعضاء اللي كتبوا ونادوا بالتعاون والنهوض بالهدى ممكن يلتزموا بي كلامهم ده
الاعضاء اللي قالوا اختلاف الراي لايفسد للود قضية ممكن يلتزموا بالود رغم اختلاف الراي
والقائمة تطول ويمكن ان يكون هذا مقياس لنا ومدى التزامنا بما آلينا على انفسنا
وتصوموا وتفطروا على ود

الحبيب ابو الطيب
رمضان كريم وكل عام وانت والعيال بخير
الظاهر رمضان فى امريكا حار وواضح انو اثر عليك
ولا اثر عليك صرف اليوم الاول
طبعا دولار ولماتحسبى بالسودانى الواحد تجيه نفسيات
خاصة مع ارتفاع الاسعار اليومين دى
طبعا قلنا ليك كده عشان دخلت لينا الحاجات كلها مع بعض
خلينا واحدة واحدة والتخصص مهم
نفرة المدارس لا ترقى والهدف السامى
ما عارف الفشل ليه
هل هو تقاعس ولا التوجه السياسى
رغم اتفاقنا بانتفاء السياسة والغاءها هنا للدور الوطنى الداخلى
الالتزام فى كل شئ مطلوب..وهو يقود للنجاح
اذكر ونحن نجلس لامتحان الشهادة فى حنتوب الثانوية
تم تسريب امتحان مادة الرياضيات الورقة (التسريب من مدرسة السنى الثانوية)
وانتشرت وجاءت لحنتوب عصر اليوم السابق للجلسة
وكانت هناك مسالة فى غاية الصعوبة
ذهبنا بها الى الاخ محمد المبارك ..وسال ان كانت المسالة من ضمن ورقة الامتحان المكشوف
فقلنا نعم.فاعتذر عن الحل...كان منضبطا ومثاليا وخلوقا
وفى المساء قام الاستاذ مامون بحل الامتحان على مسرح المدرسة بعد اجتماع كل الطلاب
وكان محمد مبارك هو الطالب الوحيد الذى لم يذهب لحضور الحل
وكان الطالب الوحيدالذى جلس الى نهاية الوقت المحدد لاداء الامتحان
طبعا فى اخبار الثالثة تمت اذاعة بيان من وزير التربية والتعليم دفع الله الحاج يوسف
بالغاء الامتحانا وتحديد 3ايام للامتحان الجديد
محمد الطاهر وهو من الفريجاب رجب..جاء ترتيبه الثانى على السودان
والان اخصائى كبير
هذا حدث بفضل الالتزام
عشان كده فى التزام بحصر المغتربين
و(جدو)بحه صوتو من اجل ذلك ووراكم وراكم
ونحن واقفين معاه الف احمر يا تحصروا وتريحونا
ولا المظاهرة..حتوريكم خم الرماد الصحى صحى
وجمعتك مباركة

من المول للنفرة حاجة تمام دا احساس جميل محل قبلت القاهم معاي معاي زي ضلي كل زول لازم يلتزم بوعدو ومواعيدو ويكون تفكيرو كيف يوصل الالتزام العليهو وبعدا يفكر في التبرع واي زول سهمو ماوصل يبقى همو ساعة يفتح ا لدكان وساعة ماش الشغل والمدرسة والنوم كيف يلحق الناس وينقذ امو تنادي ياابومروا

سلام جبيبنا زيادة
ناس بلح المدينة منو البجيبك لينا
تقبل الله منا ومنكم صالح الاعمال

اقتباس :

طبعا قلنا ليك كده عشان دخلت لينا الحاجات كلها مع بعض
خلينا واحدة واحدة والتخصص مهم
نفرة المدارس لا ترقى والهدف السامى
ما عارف الفشل ليه

دخلنا الحاجات لانها متداخلة في جواي الناس دي بدت نفرة استارتر
واسه النفرة بقت دايرة دفرة بيني وبينك ماعرفنا الحاصل شنو
ياريت ياكباشي وانت اون لاين تدينا صورة آنية حالية للموقف العام
ودخلنا الحاجات مع بعض يازياده نفسح الجماعه في المول وبعد داك نجيبهم بي لفة المدارس عشان بعرفوا حاجة
دمتم بود

اى موضوع خاص بالنفرة بتلقانى فى نصه
التحية لك ابو الطيب على هذا التذكير المهم وهو النفرة والالتزام بدفع ما عليك ومن المؤسف ان لا ننهى ما وعدنا بانجازه
تعالوا نحاسب انفسنا ومن الذى لم يلتزم
الموضوع خطير جدا لو دفع واحد بس خليك من جميع هؤلاء الذين دفعوا
واقول للذين لم يدفعوا الى الآن ما هو تبريركم الجبان ؟

اقتباس :

وسالت بتاعة الشباك الفيلم ده بياخد كم من الزمن

سالتا بالتنقليزي والله بالعربي يا عدوله
هههههههههههههههههههههههه

بالمناسبه الخواجات التزامهم بالزمن هو اللي وداهم لقدام

خيرافعلت ياأباالطيب الحكاية أصلها عندنا روكة، والتداخل بين الأمور عندنا سمة ملازمة لنا فى حياتنا اليومية،وهو الذى قاد المجتمع بعفوية( غير حميدة) لعدم إحترام الوقت والإلتزام بالعهود،تجد الواحد يخرج من المنزل الصباح متوجها لإنجاز أمر معين ويلاقيه شخص يطرح عليه أمر ويأخذه معه دون أن ينجز أمره الذى خرج من أجله ،وليس لديه الجرأة ليقول لذاك الشخص أنه ماشى لأمر هام وليس لديه زمن الأن خوفا من القيل والقال ،وهذا الامر يعتبر أحد أوجه القصور فى ثقافة وعرف مجتمعنا أن يكون الفرد أسيرا لغيره،مما جعل الكثيرين لايجدون حرجا فى أن يعدك بشىء دون أن يفى به ولا يرى حاجة للإعتذار عن عدم وفائه ويمكن مايتذكر حتى أنه وعد بشىء،هذه هى العلة التى طالما أعيت من يداويها وبدون علاجها لايمكن ان ننهض،الغريب فى الامر انها من صميم الدين وقد صنف الاسلام الوفاء بالوعد أنه من شيم الكرام وعدمه صفة من صفات النفاق ،وهذا بالطبع يجرنا بنفس التداخل الى عدم فهمنا للتدين ومقاصد الدين فى الحياة ،فالدين المعاملةوصدق الوعد والالتزام به يمثل روح المعاملة وبمثابة الماء للارض الجرز،لك التحية مجددا أخى ابوالطيب فلسان حالنا يقول "الله كريم علينا ،يهون للقواسى ...وباقى دقيقة لكن النقر إعتزل "ورمضان كريم

سلام حبيبنا كباشي
رمضان كريم تاني وتصوم وتفطر على خير

اقتباس :

من المول للنفرة حاجة تمام دا احساس جميل محل قبلت القاهم معاي معاي زي ضلي كل زول لازم يلتزم بوعدو

ياريت تدينا حبة تنوير عن الشغل ماشي كيف
بالله عليك كل مايعملوا حاجة جديدة نزلها لينا اول باول ان شاءالله تقول الليلة عملوا
الحيطه الشمالية وقالوا بكرة ح يبيضوا الفصل التاني يعني كل كبيرة وصغيرة
وسالت ياسر قال لسه مامشى الهدى عشان يسلم القروش بتاعتي وبتاعة صديق
ياريت تنسق معاه وتديه تلفون