الجيش النيجر..(الجميعابي) نمرة اتنين

•


{ القول ان فريق (الجيش) النيجر فريق في مستوي (الجميعابي) الكاملين الذي انتصر عليه الهلال 17- صفر ..امر لا يعني عدم احترام هذا الفريق ...لأن الهلال عندما لعب امام (الجميعابي) لولا احترامه له لما حقق عليه الانتصار بتلك النتيجة القياسية.

{ والاحترام اساس (الانتصارات) التي تحقق.

{ لذا تشبيه فريق (الجميعابي) الكاملين بفريق (الجيش) النيجري لا يعني اسقاط احترامنا لفريق يلعب مساء اليوم امام الهلال في اجواء خريفية رائعة نريد باذن الله وتوفيقه ان نحقق عليه انتصارا كبيرا يجعل للهلال رقم قياسي جديد في البطولات الافريقية.

{ 17 ..ما كتيرة علي (الجيش).

{ الجيش النيجري الي الان شغال بالنبلة والمطرق ..وهذه الادوات التي انتصر بها علي المريخ ..نملك لها (الدواء) وفي استاد الهلال لكل داء دواء.

{ ورؤوسهم احسبها الان (اينعت) ليقطفها اليوم تباعا مهند الطاهر وسادومبا وبشة ..الخ.

{ لا استبعد مطلقا ان يحقق الهلال نتيجته التي حققها امام فريق (الجميعابي) الكاملين في منافسة كأس السودان.

{ الجيش عندنا زي (الجميعابي).

{ والجميعابي ..زي المريخ.

{ المريخ هسع ذنبو شنو؟.

{ لكن لكي ينتصر الهلال اليوم بعدد وافر من الاهداف يشترط ان يكون هناك عزم وارادة من لاعبي الهلال وان يشعروا بالمسؤولية كما احسوا به عندما لعبوا امام فريق صغير ولكنهم لبعوا كأنهم يلعبون امام فريق كبير وكان كلما سجلوا هدفا في شباك منازلهم اتفتحت شهيتهم للهدف التالي حتي وصلوا بالنتيجة الي نتيجة قياسية لم تحقق حتي في مباريات المهرجات او في التقسيمات الداخلية.

{ في مباراة الهلال والجميعابي في السهرة الرمضانية المشهودة كنا بعد كل هدف نسمع مقطوعة من الاغاني ...حتي كأننا كنا نشاهد ونسمع في برنامج (اغاني واغاني).

{ كنا نسمع تارة بعد هدف سادومبا ...(الزهور صاحية وانت نائم).

والزهور صاحية وانت نايم

داعبت شعرك النسايم

وايقظك صوت الحمايم

الزهور صاحية في الخميل

وانت في نشوي يا جميل

قمت من مرقدك تميل

تتعدل في المشي وتميل

{ اغنية تحكي عن هدف (سادومبا).

{ لكن سادومبا اهدافو ..اهداف نصاح.

{ جاب تسعة اهداف ...تقول لاعب براه.

{ يا سادومبا (ترشيد) ساكت ..ما في.

{ البزار البتعمل فيه دا شنو؟.

{ عشان كدا في بورسودان (رصيدهم) قطع.

{ لو بشة ما كان (مدكن) حق المسكول ..كنا رحنا فيها.

{ ومهند الطاهر ..يسجل في (الجميعابي)...وفي (الجيش) ايضا ان شاءالله.

{ اهداف تقول موزعها (محمدية) بي (كمانه).

{ اهداف زي (بشوف في شخصك احلامي).

بشوف في شخصك احلامي

ودنيا تفيض بانغامي

وسحر الدنيا في عيونك يبعد عني اوهامي

بشوف الكون جميل وبديع

مر ايامي يبقي ربيع

احب الدنيا لي حبك

ويسعد حبك ايامي

رياض وزهور علي خديك

بديعة بتخلب الانظار

تزيد فوق الجمال الفيك

معالم كلها اسرار

تخلي الدنيا في عيوني

جمال وكمال يتجدد

امل بسام بيحدوني

اغني اليك واتودد

ولحني الغالي اهدي اليك

وانبت للوجود ازهار

{ اهداف مهند الطاهر بهذه (الوسامة)...زي اهداف كاريكا...طبعا كاريكا بشترط (الوسامة) في الاهداف.

{ الهدف لو ما جميل ...ما بسجلو.

{ الاهداف العادية بخليها لي ناس (خليفة).

{ هسع خليفة ..ذنبو شنو؟.

{ واهداف الهلال فيها روعة توزيع (سيدا).

{ هيثم مصطفي (حفظه الله ورعاه) الهدف بقعد ليه مع (اوركسترا).

{ اوركسترا الاذاعة تحديدا.

{ ليأتي الهدف بهذه الروعة...(انت يا بسام).

انت يا بسام بسمتك ازهار

انت ليه في سرور ونحن ليه في النار

انت يا بسام زينة فوق زينة

نحن نفرح بيك وانت ما بينا

{ دا فيرا ..عديل.

{ قدر ما ناس المريخ عملوا ليه وقدموا ليه الغالي والنفيس ..هو رفضهم.

{ قدموا ليه (مليارات)...رفض.

{ بيوت...رفض.

{ ديل من كترة الاشياء التي قدموه لي علاءالدين يوسف وهو رفضهم ..انهم (بصموا) ليه عديل.

{ تاني يا فييرا الناس ديل يعملوا ليك شنو؟.

{ الغريب في الامر فييرا قال لو البصمة الفي الاورنيك كانت (بصمة) العجب ما كان ح يكون عندو مشكلة.

{ نظام شنو؟.

{ نظام (البصمة) بتاعة العجب زي بصمتو.

{ نحن أي حاجة عندنا بي (نظام).

{ هيع.

{ نرجع الي مباراة الهلال والجيش.

{ البسمع كلمة (الجيش)...يفتكر الجماعة ديل حضروا من (البوسنة).

{ نحن استادنا دا بندفن فيه (الضحايا) من طرف.

{ كمان جابت ليها (جيش).

{ اقنعوا عديل ...جيش وفي استاد الهلال كمان.

{ نحن الحاجات دي ما بنلعب فيها ولا بنجامل.

{ جيش.

{ تعبتوا معانا.

{ يمكن يكون ناس المريخ خربوا طبعكم.

{ اتعودتوا تلعبوا في ام درمان وتطلعوا بي نقطة.

{ الحاجات دي نحن ما عندنا.

{ الضحية بنكرفسها عديل.

{ جاموسة ..غزلان ..كلهم بدفنوا.

{ ما عندنا قشة مرة.

{ بنضرب من طرف.

{ قلت ليكم (الجيش) والجميعابي ...عندنا واحد.

{ نحن ما بنفرق بين (الوصفاء).

{ الوصيف وصيف...جيش ..حرس ...جن كلكي.

{ كلهم ان شاءالله بندفنوا في استاد الهلال.

{ من خلال مستوي الهلال ومستوي فريق الجيش النيجر فاننا اتوقع ان يحقق الهلال اليوم فوزا عريضا وان تكون نتيجة المباراة اليوم رقم قياسي جديد للهلال في البطولات الافريقية.

{ مهند ..بشة...سادومبا..بكري المدينة..مدثر كاريكا.

{ والحسابة بتحسب.

{ والكورة اقوان.

{ في الدور الذي سبق دور المجموعات كان فريق الهلال قد لعب امام فريق كابس يوناتيد الزيمبابوي وكان ان حقق الهلال عليه انتصارا بخمسة اهداف نظيفة.

{ هذه النتيجة العريضة التي حققها الهلال اغرت المريخ لتحقيق نصر مماثل علي فريق كابس ..لا سيما وان المريخ كان قد تعادل امام فريق الجيش النيجري.

{ لذلك سعي فريق المريخ بكل ما يملك ليلعب مباراة ودية مع فريق كابس يوناتيد وقد كان.

{ لكن المريخ خرج امام فريق كابس الذي انتصر عليه الهلال رسميا بخماسية نظيفة بفوز ضعيف وباهت اذ فاز المريخ 3-2 علي كابس وفشل المريخ في ان يثبت ان فريق (كابس) ضعيف المستوي.

{ الان تمر الايام وتمضي ويقابل الهلال (رسميا) الفريق الذي اخرج المريخ من الكونفدرالية.

{ لا يملك المريخاب ان يقولوا شيئا عن فريق (الجيش) لانه اخرجهم من البطولة الكونفدرالية بعد ان تعادل معهم في ام درمان بهدفين لكل وانتصر عليهم في النيجر 2-1.

{ اليوم سوف يأتي المريخاب لمشاهدة الفريق الذي اخرجهم من بطولة الكونفدرالية.

{ تعالوا شاهدوا الهلال وهو يرد لكم الاعتبار ..وينزل اكبر انتصاراتهم ان شاءالله علي الفريق الذي اخرجكم.

{ الفريق الذي ازل المريخ في داره ...تعالوا انظروا اليه سوف يصبح اليوم (حمل وديع).

{ حمل في غاية الوداعة.

{ اليوم ان شاءالله سوف نجعل (الجيش) النيجري ...(جميعابي) اخر ..يتلقي اكبر الخسائر.

{ المريخاب سوف يكونوا في غاية الحرج ...وفريقهم الذي فشلوا في الانتصار عليه في (الرد كاسل) يقبر في استاد الهلال كما قبر قبله ...الاهلي المصري والترجي واسيك والنجم والزمالك وافريكا سبورت وغيرهم من الاندية الافريقية الكبيرة.

{ مطلوب حضور جماهيري كبير اليوم لمساندة الهلال ...ولسد الفراغات.

{ جمهور الهلال وحده الذي كان يقف مع الهلال في الفترة الاخيرة ...عندما تخلي الجميع عن الهلال.

{ لاعبو الهلال لم يجدوا في الفترة الاخيرة من يقف معهم غير جمهور الهلال.

{ لذا مطلوب من جماهير الهلال اليوم ان تقوم بواجبها وان تعوضهم ما يجدونه من مشقة.

{ تعالوا تبادلوا (الحب) في هذه الامسية الرمضانية ...وسوف يمتعكم لاعبو الهلال ان شاءالله كثيرا.

{ عزيزي مشجع نادي الهلال ...لا تدع الفرصة تفوتكم.

{ الليلة يوم خاص من ايام الهلال.

{ ملحوظة: الجيش الليلة بفهم حاجة.

هوامش

{ بشة اقوانه بعد (زنقة).

{ عشان كدا الليلة ما عاوزين بشة يجيب ليه قون ...عشان نحن خلينا (بشة) للزنقات.

{ بشة قونو بحل العقد.

{ والليلة ان شاءالله ..ما في أي (عقدة).

{ لعب سهل ..وممتع ..ورائع.

{ مطلوب حضور جماهيري خاص في مباراة اليوم.

{ شجعوهم واجعلوهم يشعروا بحبكم لهم.

{ ساندوهم بقوة...وخلوا الباقي علي اخوان (سيدا).

{ الطبيب مانع مهند الطاهر من (الهوبة).

{ الطبيب دا مريخابي وإلا شنو؟.

{ علي كل حال ممكن الليلة مهند الطاهر يطلع ليه (رخصة) للهوبة.

{ هوبة هي وإلا عربية.

{ العربية هسع ذنبها شنو؟.

{ اهداف الهلال الليلة ممكن تبدأ من (ديمبا).

{ ديمبا يا.

{ نتمني ان يكون شفاء (مساوي) قد اكتمل.

{ مساوي يقدم الان ارقي المستويات.

{ كورة ولا احلي.

{ الاهلي المصري وشبيبة القبائل في مواجهة نارية في بطولة الاندية الافريقية الابطال.

{ الاهلي المصري لم يعد هو الاهلي الذي انتصر عليه الهلال بثلاثية.

{ الاهلي المصري الان مستواه في النازل.

{ يكفي الهلال فخرا انه انتصر علي الاهلي في عقر داره وانتصر عليه بثلاثية وهو في قمته.

{ نحن ما بنضرب ساكت.

{ الليلة (الجيش) دا بكون عندنا زي (الترمس).

{ من اول خمس دقايق بنحسمو.

{ الجيش ح يروح فيها.

{ الهلال في المباراة القادمة ان شاءالله سوف يكون وصل للنقطة التاسعة.

{ مباراة الاتحاد الليبي ومضيفه الفريق المالي نتمني ان تنتهي تعادلية ..ليظل الفريق كبير بين الهلال والاندية الاخري.

{ امشي وارجع واقول ان (الجيش) سوف يكون (جميعابي) اخر.

{ كلو ..حمام في حمام.

{ نكتب قبل انتهاء مباراة الامل والمريخ.

{ يعني ما عارفين البحصل شنو؟.

{ نحن المباريات المحلية دي ما بنشتغل بيها كتير.

{ عطبرة ...والامل ..والمريخ ..والحاجات دي ...ما بننتظرها.

{ رمزي صالح.

{ بل رمزي غير صالح.

{ دا الاسم الرسمي.

{ نطلع (الجواز) وإلا ما في داعي.

{ انصار معتصم جعفر ..حتي عندما ابعدوا الدكتور كمال شداد من انتخابات الاتحاد العام فرحوا عند الانتصار عليه.

{ يا جماعة زول ابعدتوه بقوانينكم ...فرحانين علي الانتصار عليه في شنو؟.

{ والله (شداد) دا لو عقد في بيتو ..(تلاوزوا) منو؟.

{ ادروب ما بلاوز.

{ بالمناسبة شداد ما شغال بي (لعب العيال) دا.

{ كلو اول ليه اخر.

{ ومن يضحك اخيرا ..يضحك كثيرا.

{ وشداد بضحك دائما اخيرا.

{ صلاح ادريس قالوا قدم ( طعون.

{ يا زول انت اصلك عاوز تطعن في (الجيش).

{ عينك في (الجيش) وتطعن في (معتصم جعفر).

{ معتصم جعفر يلقاها من منو؟.

{ من شداد وإلا من صلاح ادريس.

{ خبر عاجل : يا جمال دنيا يا ناس.



الاخ حسن
ناس الوصيف ديل ما بقبلو قالو اربعهوالله كتيره زي دخلن في الفلسطيني
قلنا ليهم اصبرو الفلسطيني الدور ماشي عليهو الا يجري بالانفاق
مبسوطين بالهدف الاول للديش قبل نهاية المباراه اغلقو التلفزيون وحلفو ما تكمل الكوره
الا بالراديو.