مدخل :
وطن ناسك
وطن أرضك
وطن خلك فجلاسك
وطن آسك
وطن عرضك
وطن صمتك وأنفاسك
وطن مترار
وطن سلوكة
في البلدات وطن فاسك
وطن حجية الحبوبة
نرتع زين ونماسك
سلام العجلة والمحويت
جيت جيت وبدري لفيت
غنا الطمبارى إحساسك
نص:
وطن عاكس على ابدانا من ذراتو هيكل هذه السمرة
وطن متفرد العادات وريحة الصندل الطقوه صوت دلوكة دقة ضفرة في الخمرة
وطن متمدي في ساحاتنا باقيلنا العزيز والزين وسادل فوقنا بالسترة
علي نسام هبوب نيليك بنقدل ياخي ما همانا بالبجرى
حبايبك نحن أناسك جنياتك وليداتك سحايبك يا عشم بكرة
تهدل فينا بي عطفك فكسينا العفاف سترة
بريدك يا وطن تالاي صباح عينيك لا الهجرة
حبابو البحضن الأهات حبابو الزاد حبابو الشال سلاف الجاي للذكرى
حبابو الفينا فت واحد سحابنا غمامو هو الشاهد فأنثى الأرض هي البكرى
علي غاباتو كوجناها خمرناها جد عسناها دي الكسرة
وطن ستف علينا الحب وشال من الدليب نبرة
وطن فتق علينا الريد حبانا مآثرا أخرى
وطن مريم وطن ملوال وطن أوهاج وطن جبرة
عكف مريودنا من دار حلفا في الدنقالا نتشرة
ودج وهج لي مروي حضارة منارة واستلهام منابر فينا بالفطرة
وقام متلفي لي الشايقية في دارم حنان بتلقو بالمافيشة ليك برة
ونوخ فوق ديار شندي تلوبا ناس قلوبم نار صغيرم حاضن الجمرة
وواصل لي قفا المقرن هدا الأخاذ وفيه ناس أبيض مع الأزرق نعاين ريثما اتحدو وقامت من هنا البشرى
وطن فيه الشرق ثغرا ومينا عظيمة واقفة مع الزمان طفرة
وفي كسلا اتحاد توتيل مع القاش إندماج مشتاق مطول في مدى الخترة
وعرج لي الغرب منساب علي البقارة والنوبة على الفور إنحناءات هيبة فوق جبرة
وعندو جنوبنا واحاتا خمايل ضاجة بي الخضرة
وفي قلب الجزيرة الخير رجال حاشاها من عترة
أجل سودان وطن كل إنتماءاتنا وعدد ما في الجمل فقرة
وتلقا الخير وسط فرقانا جوة غنانا محتكرة
أصالة وفي الشرف تاريخ مسطر عزة لو تقرا
هدا السودان وطن عالم وطن هسي وطن بكرة
هدا السودان وطن فكرة

هذا هو الوطن رغم مرارات الزمن الأغبر رغم الإعصارات في أحشائه

التحية والترحيب الحار بالجار العزيز (ودالدر) هكذا الشباب طرح مليان غيرة وحماس فان الوطن ينتصر بسواعد شبابه فسيروا عين الله ترعاكم وما غريبة منك فانت سليل الادب والفن .....والسياسة. ولك محبتي

لك التحية يا حبيب
تنميات جميلة ..
وطن شموخ ..
وطن تسامح كبير ..
نسأل الله أن يحفظه من كيد الأعداء .. وتمر المرحلة المقبلة وتفضى على خير كبير ..
حتى يكون أكبر من .. وطن فكرة ... ولا يكون وطن ذكرى ..