برغم انه موضوعي عن المغترب ودوره في نشر الأغنية السودانية إلا انه من باب الصدفة الأغنية المذكورة في هذا الموضوع لشاعرنا بن المنطقة كامل عبد الماجد وكامل أنا اعرفه كشاعر ولكن كانت توجد علاقة بين العمدة عبد الماجد وبين والدي عندما كان شيخاً للكارناب وقمت مع والدي مرة بزيارة للعمدة عبد الــماجد بــقــرية ود الــزيــن فــي زمــن لــم يــشــتهــر فــيه كــامل كــشاعـــر0
في أي لقاء إذاعي أو في التلفزيون المذيع يسال الفنان أو الشاعر عن الأغنية السودانية والجواب الأغنية السودانية بخير وأنا أتمني أنها تكون بخير والذي لا يقول إنها بخير يترك السبب لإعلامنا وفي بعض الفنانين تجولوا بدول الخليج وعلي سبيل المثال سيد خليفة ليساعد في نشر الأغنية السودانية عربياً سيد خليفة نشر الأغنية من الجانب المسرحي والأغاني الخفيفة أمثال المامبو السوداني و أنا قلبي بدق أغاني ما فيها معني للكلمة لأني اعتقد انه كان يعلم لو غنا طرير الشباب أو ولي المساء أو ليل وخمرٌ وشفاه أوالنهاية بالسلم الخماسي ما كان في شخص مـــــن الــعــرب يـــجــلس يســتـــمـــع لــيه وهـــــو عـــــارف الـــشــئ ده ســلـــفـــاً الناس كـلها بتجـهـــل الأخـــوة المغــتربين بدول الخليج فعلاً ساهموا كثير فـــي نشر الأغنية السودانية بقراءة النصوص أو بشراء شرائط الكاسيت لبعض الأخوة العرب واذكر مرة مــن المرات جاءنا واحد ســعودي وقــال أمس في التلفزيون السعودي عندكم أخــوان اثنين غــنوا أغنية اســمها أمــرك يا حلو وعرفنا انه يقصد ثنائي العاصمة فعلاً واحد من الأخوان اشتري الشـــريط للسعودي ومرة جاءني واحد سعودي يغني في أغنية سودانية والله أنا ما بحفظ منها بيت اسمها الوليد الضيف قال لي الأغنية دي لي مصطفي مضوي وحفظتها من سوداني شغال معانا وبعضهم عرفناهم بأنه عندنا مطربين غنوا للأمير عبد الله الفيصل أمثال العاقب محمد حسن وعثمان حسين غني غرد الفجر لحسن عبد الله القرشي وعندنا عبد الدافع عثمان غني يوم البحيرة للشاعر عــلي احمد باكثير وزيدان غني لابراهيم ناجي والكابلي غني لؤلؤة بضة للشاعر البحريني علي شريحة وغني حمد الريح للشابي
ومن مصر أم كلثوم غنت للشاعر السوداني الهادي ادم اغداًألقاك والله لوتصدقوني نتعب كتير جداً والواحد يكون أشبه بجرسون المطعم عندنا وعندنا وعندنا لكن اعتقد السودان يستأهل اكتر واكتر
نعم في ناس عايزة تفهم الغناء السوداني وفي ناس بتضحك لكن بعد أن تقرأ عليه كلمات الأغنية يحلف ليك انه هذا الشعر الجميل لا يوجد في بعض بلاد العرب
ومن الناس الفاهمين اذكر ليكم موقفه معاي هو أخونا السعودي الشاعر حامد حماد الصبحي زارني مرة وسمع أغنية سيد الاسم للجابري وكامل عبدالماجد فدار بيني وبينه حوار جميل اذكر ليكم منه جزء ** لما قلت محبوبي وكتين يبتسم قال لي قمر ولا شنو . ولما قلت مرات أقول اديهو كلمة تزعلو حبة عذاب وكلام عتاب أناعارفو ما بتحملو , قال لي طيب ليش مزعلو قلت ليه عشان يشوف خده الحرير الدمعة جارية تبللو قال لي عجيب أمره كامل ده , لكن قبال يبدأ بلحظات يقيف اتامله قال لي طيب من الأول مزعلو ليش قلت ليه علي شان اتامل الضحكة واللفته البتاخد النوم من عيونوتجفلو قال لــي يـعني مـانــعـو الـنوم والله حـــــوار كان جــمــيــل
لما جيت في أنا في العيون ببنيلو دارين من مودة ومن مني قال لي دار في العين اليمين ودار في الشمال قلت ليه بس مساحة الأرض متساوية ضحك الراجل لأنه تاجر أراضي لما جينا في بضمه في قليبي انبساط ومحبة فياضة وهناء ماردت غيره ولا هو راد زولاً سواي ابداً أنا قال لي ردت يعني شنو قلت ليه يعني ماحبيت قال والله لو حب غيره زولك كامل ده كان بنتحر لما جينا في همساته تحنان القماري الراجعه للعش والجنا قا ل الله الله الله ده بيت القصيد واقسم بالله يا الطيب انه كامل ده شاعر وقلت ليه هل تصدق انه لما قال الأغنية دي كان يدرس بالمتوسط قال لي لو قالها وهو في الجامعة كان المعلقات صارت ثمانية والله كل ما زارني يقول لي ماعندك جديد لي كامل والله حوار جميل مع إنسان فاهم وعايز يفهم وأنا كنت مفتخر بشهادته للأخ الشاعر كامل عبد الماجد رغم انه كامل ما عايز شهادة لكن افتخرت أنا علي شان اسلم الشهادة لي الأستاذ كامل يوم نتقابل بالسودان زي ما سلم أستاذنا حسين خــوجلي الــشهادة للفنان محجوب عثمان حينــما وجد بعــض الأفارقة بشاطئ ممبسا بكينيا يغنون أغنيته ليه ليه يا النسيت أيامنا ليه وصدقوني السودان حــلو بي أهلهُ وقــــوي بي رجــالــه وســمح بي المِلاح الجــمالن فـــــــاح
ودمتم في أمان الله