ياوليد لوكانت عربية المفتش لسه في المرور ماكان إتشلعت قنطره_دمار المشروع إداري بدا بمدخلات الإنتاج من بذور ضعيفه وتحضير ضعيف ومبيدات منتهية مدة صلاحيتها وسوء إداره وعدم رغابه والحديث يطول_لكن بإختصار ماوصل إليه المشروع كان مدروس بعنايه

يارائع انت
كان فتشتا المحزن اب تلقى لى مووولووود

يا اخوى البركة فى الشوفة

افتقدناك ..ملاييييين السنوات الضوئية..
وجئت ..كما الامل ..
لتنير ..ظلمتى
ظلمة المشروع
والتانية خليها فى سرك
اذن صدقوا
اذ سموك السراج..لتضئ الطريق للناس العمى
والعمى انواع ..اقبحه غمى البصيرة
انها البصيرة ام محمد
الجات تتفولح وجابت ضقلها اتلولح
هى الانقاذ ولا شك
ةقد ظلموا الانقاذ
لغة ومعنى..
ومحمد معانا ماتغشنا
وجيب ليك ملح وشطة
وفكهن فى العصار
عشان الشيطان
وممكن الملح والشطة
مع عصرنة الزمن تتحول
الى كدنكة
وكوريك
وملود
وحربة
وسيف سكين
يا سمح يا زين
نحن واطات الجزيرة
خرجنا من رحمها
وترعرعنا فيها
وان حرت
نقابل الجلة مافى كلام
اجل سموك ابو المهدى
المهدى ابقولن بسر
المن جانا زال الضيق والعسر
وهونا اخى
ان بعد العسر يسر
وما ضاقت الا لتفرج
فرجا قريب..وغدا تشرق الشمس وياتى الصبح
ليس الصبح ببعيد..ولك
انت ..والمشروع
واهل المشروع
نينى اليك وليل الغربة اضنانى
وطيق ذكراك بدمع القلب ابكانى
متين الليل الاقينى ونعود تانى من تانى
والقاك يا وحيد عمرى وتلقانى
لا بنساك ولا بقدر ولا عايز بعد حبك احب تانى

زياده بتخجل تواضعنا بالكلام المنمق والعفوي عندك كماهي تربيتك (المامزيوده مويه) عليك الله قول ليهم الوطن ماالزقاقات والبيوت الساتره الهموم _الوطن إنت وأنا وهم_الوطن التراب_الرزق_الناس_الإنتماء_
لك الحب يازيادو

‏*الشركات الربحيه عندها مؤسسات حسابيه لاتعرف الخساره_المزارع البحسب حساب القفه كدا## البحميه منو؟ وللا الخسران بمرق من المصران!
‏*الجناين الثابته حقة أعضاء الإتحاد_إمتيازاتهم حتحولها لاراضي سكنيه؟كل شي ممكن في الزمن الاشتر دا

‏*عمي أديني قصبه__قصب الزمن دا هجين فصين قصااااار ورقابه طويييله _حسب السياسه الماشه في البلد _بنيه تحتيه ضعيفه وتطاول علي الدول العظمى
‏*في كل القنوات السودانيه نادي الطنبور بي صفقتو_والوازا بي لاويها

الكمبلا بي حريمها_عرضة البجا بي سديريها__ثقافة الوسط وين؟ (الله يكضب الشينه) خايف تكون نهاية مشروع زراعي وثقافي_
‏*جامعة الجزيره بقت مسكييييينه_ومدني المدينه بقت زي الشافع الاضانو تقيله يقولو الزراعه تقول آآآآآآآآآآآآآ

‏*وأنا نايم أحلم بي مزارع عندو فيلا جميله وطائره عموديه صحيت(وجدتني فاقرآ فاهي وهناك زبابه أباتشي تناور لإسقاط حمولة من القنابل المحرمه بقانون الفاو واليونسيف) اللهم أجعله خير
‏*اللوري الكان بجيب لقاطين القطن رفعوه في حجاره ومشوا يكسرو حجارة الجبل

‏*لما يفتحوا المشروع للشركات عمال الكنابي يشتغلوا شركاء المزارع شريك الشركات شريكة الحكومه!!!!(والداير الشبك يجدع شبكتو معانا)
‏*ياحليل البكافحوا الملاريا والكلزار_النجيله والعدار
‏*الناس ديل بودوا القروش وين؟

‏*بعض القبائل الأفريقيه ترقص حول فريستها_هو الرقيص والنقزي الحصل في الجزيره شويه؟
‏*البلد دي بقيت أشوفا خمسه خمسه_الخطه الخمسيه_قانون2005_نيفاشا2005_ولايات الشماليه_نهرالنيل_الخرطوم_الجزيره_سنار_خمسه_البلد دي حتتخمس

السر جيت؟ وين إنت يابشر ؟ رقم التلفوف العندك دا قاعد تقفل بيه الشنطه؟الهدي دي نسيبتك؟ عامل بيات سنوي؟ ركبت قلب مظلل؟ بقيت سمين؟ بقيت مهند؟ ماااالك؟ الفي الصوره دا مهدي سراج وعندنا بطيخه _يازول _حرشت لك ودمدثر يجيبك كان حي كان ميت فيك القلب

كدي قول لي القصيده العملتها في المبيد
بتاع جماعتنا ديلك انشاءالله تكون ما نسيتها ..

سراج الدين الفاضل كتب:

السر جيت؟ وين إنت يابشر ؟ رقم التلفوف العندك دا قاعد تقفل بيه الشنطه؟الهدي دي نسيبتك؟ عامل بيات سنوي؟ ركبت قلب مظلل؟ بقيت سمين؟ بقيت مهند؟ ماااالك؟ الفي الصوره دا مهدي سراج وعندنا بطيخه _يازول _حرشت لك ودمدثر يجيبك كان حي كان ميت فيك القلب

والله ماشاءالله مهدي عسسسسل
ومشتاقيييين ...بالمناسبه انا جاييك الاسبوع القادم .

اخي سراج اضم صوتي واناشد اخونا السر الدسوقي بالتواصل وبنطلب منو التلفون وليك وحشه يازول ياوطن

ملعون الزمن ياالسر___ملعون القطن الجاهل ماعارف ضمه مبيدو
القطن إستاهل
ماتتكلم قول التمك النافد فاشل _قول الدي دي تي ماترفض سم الفار والخيش الغالي_
وفايدتو أيه الخيش ياغافل
يقطع لوزك
كان تتسرب قبل حراتك تمشي جيوب أسيادك
نفس الناس السرقو مبيدك وحرقو عروقك
يقطع لوزك
أفتش ليك الباقي في الورق__

ياالسر فاقدنك بقدرماتخيل وفوق ماتتخيل_تقول لي بجيك الاسبوع الجايي وماتجي زكرتنا علي لسانك
عارفك ماكعب لكين ولوف محل تخزن مابتمرق بي أخوي وأخوك_قاعد أحجي بيك أولاد الحله_وبراي كدا بجتر زكرياتك لمن قربت أصبح من زوات الاظلاف
ياخ أطلع من _بقيت زي نقد لاعمل إنقلاب لاإستقطب ناس جداد

بديك رقمي تاني المره دي أعملو باست ويرد لتلفونك
0919030633

سلام سراج قلنا ونضمنا وفي حاجة دايره فك شفرة والحال ماش وين نسمع نصدق نشوف نكضب لكن حقو نسأل؟
‏-نسأل منو؟
‏- نسأل مولانا

مضوي عبدالرحمن كتب:

اخي سراج اضم صوتي واناشد اخونا السر الدسوقي بالتواصل وبنطلب منو التلفون وليك وحشه يازول ياوطن

البخيت

والله مشتاقين
ياخ خليك في الشعر والنثر والكتابات الجميله ..
انساك من الزول بتاع المشروع دا ... ياحليل المشروع زمن اولاد القسم
بمناسبة اولاد القسم ميرغني كيف ؟؟

الاخ ابو مهدي
تحيه مسائيه معاها شاي ولقيمات
كتبت ليك موضوعين في هذا البوست ياربي يكون اتقلعن مع السكه حديد ولا حجار القناطر . وقفت من الكتابه الا القاهن
مع الشكر والتقدير

أهلنا المزارعين الشايلين هم الغير والسعيه والطير
عواااافي
‏*الشفع الكانو ببيعو عنكوليب شايلين حفاظات أيسكريم
‏*الشركات الي حتستثمر في المشروع أوعا تكي فيها شركة الريان
‏*البلاقي الخير الصديق يسألو من الساعه الكرموا بيها نميري في دوري الاقسام_شغاله وللا بدلا بي زرديه؟_قالو نميري شيوعي هو الدين دا كيف؟

*الدبلوماسيه السودانيه نجحت في كل المجالات إلاتسويق الإنتاج الزراعي والحاصل تسويف_في زمن الحصاد يفتحوا الاستيراد ويفتحوا التصدير بعد جمع المحصول من المزارع_(قرع أستاذ عوض الله بس)
‏*بقينا بين الفندك ويد الفندك_إحساس الزول المفندك زي إحساس الشافع المحندك_كلو إستفزاز
‏*قلنا شركات الاتصالات تتعامل مع المزارعين كقطاع خاص_يشيلوهم جوال بي شوال_قالوالينا ياتو مزارعين

شركة جياد منحت أعضاء اتحاد المزارعين المستقرين أصلا في المدن_منحتهم جرارات (جروره) والمزارع يجرجر كريعاتو لي بيت وكيل عضوالاتحاد عشان يحرت ليه جروره
‏*زمان نلاحق الرهاب نلقاه مويه _الزمن دا نلاحق المويه نلقاها رهاب البلد ياإنسحر ياحتتصحر
‏*دريم لاند _جزيرة الاحلام على أرض كانت تدعى الجزيره__القرش الميت تأكله صغار الاسماك

‏*‏ إدارات الري والغابات والبساتين_إنكسر المرق وإتشتت الرصاص_وينو البلم الناس؟
‏* موية البوقا البنعرفا زي اللبا بتربي وتكبر_موية الزمن دا زايدنها مويه ياربي؟ مامضمونين
‏*‏ بلهارسيا زاتو مافي_في مغص_في مراير_في دهشه_ في سؤال حاير عايزين يعملوا فينا شنو__الناس ديل خيالهم واسع

جتى الطير رحل خلاني
ماطيب لي خاطر

اهديها لي المشروع

الطير ياأستاذ ياكل شنو؟ كل الطير رحل إبتدا باأم بيوض والرهو والجرول والبذ ودخان عزبات وقدوم أحمر والهدهد وام رخم الله نهاية بأبوالسعن_بعض الطيور خشت الدواوين زي أبو الحديدون والقمري _ودابرق أصلو ساكن هنا مازول زراعه وكدا

سراج الدين الفاضل كتب:

الطير الطيور خشت الدواوين زي أبو الحديدون والقمري _ودابرق أصلو ساكن هنا مازول زراعه وكدا

بينك وبينى الدواوين ماناسا هجروها
اها !
دا تساؤل اخر

سراج الدين الفاضل كتب:

الطير الطيور خشت الدواوين زي أبو الحديدون والقمري _ودابرق أصلو ساكن هنا مازول زراعه وكدا

بينك وبينى الدواوين ماناسا هجروها
اها !
دا تساؤل اخر

بين الضحوه والضهريه
*الوحده_الانفصال_الاستفتاء_ترسيم الحدود_ابيي__قضية مشروع الجزيره راحت ساكت_كان قلنا حاجه تقولوا الناس في شنو والحسانيه في شنو؟
*الراجل صليحو مرتو وعدوه مرتو_نحن صليحنا وعدونا المشروع_لاناقة ولابعير لنا فيما يتعارك عليه الشريكان_وياما تعاركوا في قسمة السلطه والثروه ولم يكن المشروع أقل إهتماماتهم_لماذا يلزمنونا بأن تكون إختلافاتهم سقف همومنا؟
*الماإتشرزم وإتشرم وإتقرم شنو!
الشرق_المناصير_أبيي_مشروع الجزيره_حلايب_الجنوب كلو_ولاية النيل الازرق مفاجأة المفاجآت_وماخفي أعظم

*العاقل يحتفظ بي عقلانيتو للزمن الجايي_الزمن دا الفيه إتعرفت
*المشروع دا شرعيتو جات من قبولنا بيه وبإلاجماع_إنتو شرعيتكم جات من وين؟
*قعدت في كم فراش وكذا دكان ماسمعت بالغلط زول جاب سيرة الخلا_حالكم للخلا
*النهضه الزراعيه_للجزيره فكره_ولنهر النيل واقع وإستثمار أجنبي وبنيات تحتيه وطرق مسفلته__بالواضح كدا قسمة الثروه المعنيين بيها أبناء الدينكا جنوبا وأبناءنهر النيل شمالا__أنا مابدفن راسي في الرمال_الشريكان نهر النيل والشماليه مع دينكا الحركه الشعبيه_
تقول لي نعرات قبليه؟
أنا جبتها من الآخر كدا_أصحوا

‏*‏ أبناء القناطر _جاتهم مقنطره_ شركة الهدف يخيل لي إتعملت لهدف واحد_إستيعاب أبناء القناطر والاقسام_يعني أم جركم المابتاكل خريفين ياكلوه أولادا
‏*‏ التأمين الصحي للمزارعين_ جمع من غير طرح_هو ديوان الزكاه بطرح؟
‏* الغابات_ المسؤل من ياجماعة الخير

ياسراج الناس جومن الضحوة انت لسة قاعد ومافطرت
سؤالين :
القمح السنة دى تمويلو كيف?
والمصرين شايتين وين اقصد زارعين وين كان البصل كمل من السوق معناها الصعايده وصلو?

كباشي ياخ إنت جميل_هم الصعايده وصلوا؟؟
ماكلمونا والله كان جهزنا كم فحل بصل وكم فجله كدا

‏*وجانا العيد_كل مؤسسات الدوله عندها منح حج للعاملين وخروف يخصم من الراتب_
المزارع حاله خاصه وشريحه كبيره _ماتدوه خروف منحه لكن السوق_أسعار الخرفان فوق إستطاعة الناس_هل يمكن أن يكون لدوله يد علي السوق مثلما كان لها يد علي دمار المشروع؟

كان المشروع لقا جنا نجيض قلبو محدثو رضع شطة مع الواطة السهلة دي والموية الساهلة كان كل مزارعي يضحي بخروفين خروف ليهو ولاولادو وخروف للمعلمين المامضحين من فقراء بلادى، ول دا كلام زراعة مختلطة ساي والاختلاط .....!

انت يا ابو مهدي ادارة المنتدى ما ثبتت الموضوع
دا لي شنو ؟؟؟؟

البوست با بجيب هوا يالسر

السر الدسوقي كتب:

انت يا ابو مهدي ادارة المنتدى ما ثبتت الموضوع
دا لي شنو ؟؟؟؟

ياالسر
اولا عيدكم مبارك
ثانيا البوست دا نحنا قاصدين
نخلي لافي اشان محل ماتقبل
تلقاهو٠
لاكين ساعين نثبت سيدو٠