يقولون أن الاسماء لاتعلل ولكن لفت نظري اننا كسودانيين لدينا اسماء حقيقة على حيوانات ولا لبس قيها
المك نمر والرئيس نميري تصغير نمر ايضا والمناضلة مهيرة وهي تصغير مُهر ولد الحُصان وود ابوقبورة والتُمساح مشجع المريخ المعروف (عشان وليد مايزعل) واعرف شخصيا حامد الفار وسعد الجمل ومحجوب الضب وعزالدين الدحيش الذي دوخ المريخاب وود الجراد وعادل عبدالله زميلنا الذي يسمى سمكة واسرة الفيل في ام درمان وفي الهدى مع علمي التام انهما اسرتان لاتلتقيان الا في الاسم فقط واسرة عبدالوهاب الاسد في منطقة السقاي الانصار وكذلك الاسيٍد والجقِر الذي يعمل بمطار الخرطوم
والدود
والشافوه خلوه والناس عادة بتخلي الحاجة المش كويسة
السؤال هل لتجديد في الاسماء والابتكار الغير مألوف
ام في الامر عحب في جمادى او رجب
فاصل ونواصل

الأخ عادل
لك التحية ..
هي في الغالب .. القاب ..القصد منها الشجاعة في الغالب الأعم .. زي مايقولو ليك تسماح اب كبلو .. يبلع .. شنو كدا ماعارف الضارب اللية وزي مابقولو ليك صقر البرزن .. وأحيانا تكون من ضمن الأسماء ..
والأمر ليس مقتصر على السودان فقط بل متادول في كثير من البلدان .. مثل .. السبع .. والضبع .. والعوا .. غزالي .. الفهد .. النمر .. الأسد .. الحنش .. الحوت .. وغيرها الكثير
لك التحية .

يقال يا عادل ان الانسان ابن بيئته , لذلك تجد هذه الاسماء مأخوذة من البيئة المحيطة والتى غالبا ما ترتبط بقيم ذات دلالة فى المجتمع كالشجاعة والكرم والمروءة والقوة والحكمة وغيرها , وهذه الاسماء ليست فى السودان فحسب كما تكرم الاخ طارق .. بل فى كل الدول العربية ,,
وهناك اسماء من الجمادات مثل : ود الجبل , السيف بانواعه , دهب , ابوحديد , ام قلــة , وغيرها
والاسماء طبعا بمدلولاتها ..

اقتباس :

والتُمساح مشجع المريخ المعروف (عشان وليد مايزعل)

انا ما بزعل لانو جدى ذاتو اسمو التلب ,, ويعنى جمل الشيل , وشيال التقيلة .. !!

هنالك كثير من الرياضيون يحملون اسماء حيوانات مثل _الثعلب_عادل فار_الجقر_الضب_عبدالله كديسة_فوزي الأسد _الدحيش _ود الدابي _وكما ذكر الإخوة هي أسماء ذات دلالة ومعني أي ثقافة جيل لكن في هذا العصر قلت كثيرا كما قلت معها تلك المعاني الجميلة

التسميه قد تدل علي صفه معينه مميزه للمسمي
يعني الثعلب اكيد بكون بمتاز بالدهاء والمكر زي الثعلب
اما التمساح ده مابقولوها الا للتجار تماسيح السوق
فالفار علي ما اعتقد بكون سيد الاسم اما صغير في الحجم او ضعيفوني كده
ههههههههههه
وعليك ان تقيس علي هذا

الأخ عادل لك التحية
الأسماء تطور بتطور الحياة وهى مرتبطة بالبيئة و الحياة الإجتماعية و متطلباتها فالناس يسمون أبناءهم بحسب هذه المتطلبات و يلجؤون فى ذلك الى البيئة من حولهم والتى هى فى أغلبها من الحيوانات التى تمثل الصفات المرغوبة لديهم مثل القوة والشجاعة والصبر وقوة التحمل والحسن والفال وغيرها.
فمثلا كان العرب فى جاهليتهم يعيشون قسوة وشدة مليئة بالحروبات والغارات والبقاء والسيادة للأقوى , لذلك كانوا يسمون أبناءهم بأسماء تدل على الشجاعة والقوة مثل صخر, حرب , الغضنفر , القعقاع , الهيثم , ضرغام , حنظلة و مرة وغيرها , بينما يسمون عبيدهم بأسماء تدل على اللطف واللين والدعة ورغد العيش والجمال وحسن الفال مثل فرح , سرور , مبرة , قرة العينين , نورالبيت , مستورة وغيرها , ويعللون ذلك بقولهم : إنما نسمى أبناءنا لأعدائنا بينما نسمى عبيدنا لأنفسنا .
أما الآن فقد تطورت الأسماء بتطور الحياة فظهرت أسماء جديدة منها ما هو مقبول ومنها ما يتماشى مع الموضة والتقليد الأعمى دون النظر للمعانى والدلالات خاصة الدينية منها.
على كل خير الأسماء ما حمد وعبد كما قال المصطفى صلى عليه وسلم .
كسرة : _____ واحد تلفونه رن فتح الخط قال : الو معاى منو ?
قاليهو : معاك ود الدابى
قال : يا كبااااشى .. !!

لك التحية الحبيب ابو الطيب
ونستأذنك لفتح البوست الى مجال التسمية بالمهن والأمكنة .. والأسماء المنسوبة
.. مثلا لا حصرا : طارق الخدرجي .. وخالد قهوجي ( دا لاعب في الأهلي ) .. وطبعا نجم المريخ الحضري .. وهيثم السعودي .. والتلفنجي .. والفهكنجي .. وعادل الحلواني .. وماهر طعمة .. وليد قاشيت .. وحيدر بورتسودان .. وبشة .. الطاهر هواري .. ود الحداد ..
وهكذا ..

لك التحية الطيب الخياري
ويبدو أن الاستعارة مبنية على المشابهة ، وغرضها هو التسمية التصويرية
للحيوانات والطيور لصفاتها الجميلة ،(الاسد لشجاعتة ، الطاوووووس لجمالها)
الله اعلم

سلام

الاخ عادل لك التحية ،،،،
عزراً اسم العنوان الذي كتبته لايوافق مضمون الكلام بداخل النص عندما تقول حيوان هنا تصف الأنسان بانه حيوان (الحيوانات فيها الضار والنافع وهذا الكلام ممكن أن يتاثر به عدد من الناس ) وربنا كرم بني ادم في اي مكان وجاء ذلك في قوله تعالي {وَلَقَدْ كَرَّمْنَا بَنِي آدَمَ وَحَمَلْنَاهُمْ فِي الْبَرِّ وَالْبَحْرِ وَرَزَقْنَاهُم مِّنَ الطَّيِّبَاتِ وَفَضَّلْنَاهُمْ عَلَى كَثِيرٍ مِّمَّنْ خَلَقْنَا تَفْضِيلاً }الإسراء70
لكن ممكن تقول تسمية السودانيين باسماء الحيوانات في هذه الحالة تكون قابلة للنقاش
وشكراً

سلام ابووضاح صباحك زين وسوداني
تشكر على المرور والاضافة

اقتباس :

هي في الغالب .. القاب ..القصد منها الشجاعة في الغالب الأعم

قد تكون مصيبا تماما ولكن مازالت بعض الالقاب او الاسماء تحتاج للاجابة على سبيل المثال ابوقبورة ملك الفكاهة
وتشكر تاني على المرور

وليد الظريف ليك وحشة
ولك التحية وعبرك للاسرة

اقتباس :

انا ما بزعل لانو جدى ذاتو اسمو التلب ,, ويعنى جمل الشيل , وشيال التقيلة

طيب انت جدك ده لاشلت منو الاسم ولا شلت معاه التقيلة
وين شيلك لموضوع التشجير والعينات
ياخ مازلنا منتظرين ولو وشوش صوت الريح في الباب يسبقنا الشوق قبل العينين
ونعاين الشارع نلقاه ماوليد والشارع مامشجر

استاذ مضوي لك التحية وانت تضوي المنتدى باسهاماتك الفاعلة وحرصك على اجتثاث الفساد
لك الله ووفقك في مقصدك للعدالة الناجزة

اقتباس :

لكن في هذا العصر قلت كثيرا كما قلت معها تلك المعاني الجميلة

نعم قلت كثيرا وظهرت تيتي وميمي وجوجو
الله بقويهم

اخونا حسن اسماعيل لك التحية
وحمدا لله على سلامة الظهور وانت الاهم ووجودك مهم

اقتباس :

اما التمساح ده مابقولوها الا للتجار تماسيح السوق

مالك على التمساح وانت عارفو مشجع وليد دايرة تقلبها لينا كورة ولا شنو
مابتستحمل

الاخ صديق التلب لك التحية وتشكر كتير جدا على مرورك الذي عطر البوست واضفى عليه نوع من خفة الدم
واوفقك فيما ذكرت
اما [quote] واحد تلفونه رن فتح الخط قال : الو معاى منو ?
قاليهو : معاك ود الدابى
قال : يا كبااااشى .. !!




[/quote
اما دي والله بالغت فيها ضحكت فيها ملء شدقي
شدقي دي حلوة مش كدة

صديق حماد شرف كتب:

لك التحية الطيب الخياري
ويبدو أن الاستعارة مبنية على المشابهة ، وغرضها هو التسمية التصويرية
للحيوانات والطيور لصفاتها الجميلة ،(الاسد لشجاعتة ، الطاوووووس لجمالها)
الله اعلم

سلام

تشكر يادكتور على المرور
ولك التحايا الاف من ارض الجليد الذي يغطينا هذه الايام لارض الضباب
نعم ماذكرت من امثلة تتجاوب مع ماكتبت ولكن بعض الاسماء مازالت تحتاج الى اجابة
واصل صديق دون انقطاع

سلام الاخ الرشيد
تشكر على المرور والتعليق ونحترم وجهة نظرك

اقتباس :

عزراً اسم العنوان الذي كتبته لايوافق مضمون الكلام بداخل النص عندما تقول حيوان هنا تصف الأنسان بانه حيوان

اعتقد انك فهمت كما فهم كل المتداخلون مالمقصود من هذا البوست وناقش من هذه الزاوية والتي تتحدث عن الاسماء وليس هناك من يتاثر باسمه
مع الشكر

اقتباس :

طيب انت جدك ده لاشلت منو الاسم ولا شلت معاه التقيلة
وين شيلك لموضوع التشجير والعينات
ياخ مازلنا منتظرين ولو وشوش صوت الريح في الباب يسبقنا الشوق قبل العينين
ونعاين الشارع نلقاه ماوليد والشارع مامشجر

يا عادل خيارى سلامات وتحية نصت نهارية .. !!

نعم التلب شال الشيلة لكنه أمال بها لا خيه الخيارى ليس استصعابا للشيل ولكن الاخ عوض ابت نفسه إلا وان يقوم بهذا الامر ..
حيث تم اسناد هذا الملف للاخ عوض الله بالتنسيق مع الاخ حسن , ونحن فى انتظار إفادته , نظرا لمشغوليات الاخ السنى

قلت لى خيارى معناه شنو؟؟ كل واحد يا خد خيارارارارية واحدة بس
من الخيار ؟ فصيلة العجور ؟ يعنى عادل عجوري ؟
لكن برضو القرع من نفس الفصيلة , عشان كدا ود عمك زرعو تيمنا بال ( return to the roots )