الكوارث الطبيعية .. من زلازل وبراكين .. وفيضانات .. تجعل كثير من المناطق في العالم .. محل إغاثــة من الدول الأخرى .. والحمد لله كل حكومات الدنيا بتتبرع لأخوانها في الدول الأخري المنكوبة .. مشكورة حكومة السودان تبرعت نيابة عنا للشعب الياباني الصديق في محنته .. ولكن وبكل الأسف .. ماتبرعت به الحكومة شىء قليل .. يساوي عشر ( أي واحد على عشرة ) من ماتبرعت به النجمة السنمائية الأمريكية ساندرا بولوك ..
بالله دي مش فضيحة .. مائة الف دولار من حكومة بلد بحاله .. مش كان احسن يكملوا الجميل ويساونا بالممثلة الأمريكية .. ؟

و الله مو هينين كتيره منهم تب.....اسسى المية دى كان وزعوها مواد غذائية لناس دارفور ما اخير..

الجود بالموجود

سلام حبيب الشعب طارق المامون
اولا حبيت اسلم عليك لانك مسجل غياب وماعودتنا لكن كتر اخونا ودالياس طمنا عليك ووفر لينا كرت تلفون ههههههه جقت حسن
اهلنا يقول ليك اخوك كان مابتريدو سديوه ايدو
اليابان دي ايام السيول والفيضانان غرقت السودان تبرعات لكن كدي ياطارق راجع الخبر كويس يمكن يكون في صفرين تلاتة مالاحظت ليهم كويس
وادينا خبر

ابو وضاح ,, عساكم بخير

والله المابكفى ناس البيت يحرم على الجيران

والحج بالاستطاعه ,, وياريت يكملوا الشهامه ويوزعوا ان شاء الله النصف

للغلابه الفى السودان المالاقين حق الوجبه

فى السودان مجاعه ولكن الحكومه بعيدة كل البعد

هنالك ارتفاع فى الاسعار للسلع لدرجه لايتخيلها العقل

كل حاجه طارت السماء ,, يعنى المواطن الله يكون فى عونه تعبان حد التعب

من وين ,, ربك يفرج

كل التحايا

الهدف ليس القيمه الماديه ياحيبيب
وانما اعلان المسانده والوقفه بجانب الشعب الياباني الشقيق
وتزداد القيمه عندما تجيك مساهمه من دوله كالسودان يحتاج شعبها الي كل دولار
وزي مابقول المثل ( عيب الزاد ولا عيب سيدو)

اشكر الأخ محمود رحمة
الأخ محمد الطيب ابراهيم
الأخ عادل خياري
الأخت ام ضحى
والأخ حسن اسماعيل

وكل مداخلاتكم في محلها ..
الحكومة اليابانية قدمت الكثير والكثير جدا للسودان .. سيارات اسعاف .. مولدات كهرباءلتوليد الطاقة في مدن كثيرة .. وغيرها الكثيف .. من الحكومة اليابانية لشعب السودان .. وفي دارفور دي رأيت بنفسي وأمام شاشة التلفزيون القومي دا .. السفير الياباني .. في نيالا ومعه قرض كبير ..
يا أخوان نحنا على صعيدنا الشخصي العندو عزومة لمن يدفع .. بنظر من الناس يضاعفوا ليه المبلغ ..
الشعب الياباني أنا بعتبروا من الشعوب القوية .. وسوف يخرج من هذه الأزمة أكثر قوة ومنعة .. ولنا في قنبلة هيروشيما خير مثال ..
هذا المبلغ الذي دفعته الحكومة ممكن جدا يكون نثريات لأي متنفذ من الجماعة يتجول بها داخل ماليزيا أو أي دولة .. يا أخوان نحنا طلبنا بس يكملوا المبلغ مليون وبس زي مافعلت الممثلة الأمريكية ..

طارق مامون كتب:

ماتبرعت به الحكومة شىء قليل .. يساوي عشر ( أي واحد على عشرة ) من ماتبرعت به النجمة السنمائية الأمريكية ساندرا بولوك ..
بالله دي مش فضيحة .. مائة الف دولار من حكومة بلد بحاله .. مش كان احسن يكملوا الجميل ويساونا بالممثلة الأمريكية .. ؟

انت يا طارق ما سمعت بشرى الصادق قال :

التسعين ما بيناتنا .. !!