سلام شباب كبار وصغار كبار دي بالجديد لانو الوزن بقى بالكيلو وصغار دي لناس خفيفي الوزن اللي هو الرطل
غايتو جنس لخبتة وخوتة انا مافهمت منها حاجة عشان كدة قلت الجأ ليكم وبالاخص ناس السودان يمكن القى الزيي فيكم يمكن القى الزيي فيكم
ماعارف ويمشي يسأل ويعرف عشان يجي يورينا
اطالع في الاخبار ووقفت عند هذا الخبر تغيير الاوزان واخر يوم هو يوم الثلاثاء القادم وكل من يخالف القانون يعرض نفسه للمُساءلة القانونية
يعني يمكن يودوك البوليس بتهمة انك بتبيع بالرطل بدل الكيلو
طيب ياجماعة فهمونا الفرق شنو يعني مش يفترض تكون النسبة هي هي
انا غايتو ماعارف لكن لو سمحتم لو في زول فاهم يوضح لينا
والثواب من الله
والغريب في الخبر ذكر انو العالم كلو بتعامل بالكيلو و الله انا جيت البلد دي واستغربت انو اللحم ببيعوه بالرطل وليس بالكيلو كما عند عمنا ودالبشير
يعني ماشايلين الكيلو ده ياخي حتى سرعة العربية بالميل مابالكيلو
اتخيل انت سايق في السودان يعني ممكن يوقفك العسكري يقول ليك انت مخالف لانك ماشي بالميل وليس بالكيلو

الاخ عادل لك التحية و الشوق بالكوم مش بالكيلو.
في السابق العالم كان مسيطرة عليه فرنسا و بريطانية المقاييس البريطانية الرطل و الياردة و المقاييس الفرنسية المتر و الكيلو وهذه تسمى النظام العالمي لاتفاق معظم دول العالم عليها . بريطانية لم تعترف بالنظام العالمي و تمسكت بنظامها حتى نظام الحركة في بريطانية و كل دول الكمنولث الحركة شمال يعني السائق باليمين خلافاً لمعظم دول العالم.
اما صاحبتنا امريكا شاقة الهاء متفقة و مختلفة، امثلة نظام قياس الاحزية في امريكا 6،7،8،9 بينما النظام العالمي 45،44،43،42.الجالون الامريكي 3.75 لتر بينما الجالون عالميا 4 لتر.مش كده و بس حتى اللغة الانجليزية يوجد بها اختلاف فالامريكان يقدمون حرف ال E على ال R في بعض الكلمات المنتهية بال re في الانجليزية و كتابة كلمة color التي تختلف عن الانجليزية بحزف حرف ال U .
اما موضوع تغيير الموازيين في السودان قد يكون القصد منه موافقة النظام العالمي او قد يكون تغيير من اجل التغيير كما حدث مع الزمن عندما تم تقديمه ساعة صار التوقيت قديم و جديد مخالفة للحقائق العلمية او تغيير الجنيه قديم و جديد.
الخلاصة النسبة و التناسب ثابتتين ولا توجد مصلحة للمواطن ما لم تتغير الاسعار.

الهادي محمد يحيى

نحييك عادل على التساؤل الذى يجرى فى كثير من الاذهان حيث ما الفرق

فى التحول من الرطل الى الكيلو جرام من الياردة والقدم والبوصة الى المتر والسنتمتر وهكذا ؟؟

ونحيى الاخ الهادى على الإبانة

والتغيير فحواه توحيد المقاييس على نظام واحد ليس إلا كما تفضل ....

الغالي الهادي محمد يحيي
لك التحية تشكر على المرور والاضافة المميزة
كمية الشوق بقدر البون الشاسع الذي يفصل بيننا
وسعيد جدا بتواجدك على صفحات المنتدى والتي تعطرها بمرورك الطيب

وليد يوليد ياحرف العين
انت بتغيب وين
لك التحية والشكر على المرور والذي شرف المموضوع
اوع تطول الغياب وانت عارف شوقنا كم

موضوع رد : تغيير الاوزان للكيلو بدلا عن الرطل

التحية لك اخي عادل والتحية لجميع الاخوة المتداخلين
الموضوع في النهاية ليس هناك اي تغير ولكن يقال ان تغير الاوزان اليوم بقت المواد كلها معبية في اكياس مقفولة حليل ايام زمان كان يرسلوك تجيب سكر نص رطل من الدكان تسف نصووتجري تلعب الكورة نص النهار تحرقوا كلو المشكلة اليوم كان كباية الشاي كترفيها السكر يقولوا ليك حاسب على نفسك من السكري .

يا عادل حبينا ندخل علي الرغم من أنك قلت من له علم
التغيير هو من باب شخبط شخابيط لخبط لخابيط
انا حضرت حوار في قناة النيل الازرق مع واحد من ناس الموازيين والمقاييس وسالته المذيعه عن الفرق بين ااستخدام الكيلو والرطل بالنسبه للمستهلك وطبعا صاحبنا تكلم لما بطل وفي الأخير المذيعه خرجت بدون خفي حنين وقعدت تضحك علي ( الشرح الواضح) والذي لا يعني شئ غير انه حب التغيير وشوفونا نحن عملنا ( بالمناسبه الرطل مستخدم في بعض البلدان حتي في بيع اللحمه).
طبعا حجتهم ان الرطل له وحدات صغيره لا توجد في الرطل ( كالجرام وأجزاء الجرام) وفسر صاحبنا ذلك بأنك ممكن تشتري ب قدر-شده مكسوره علي الدال- ظروك (يعني حتي بالمليم) وهذا في رأيك تحسن ولا سؤ للأحوال المعيشية.
نحن في بلد المتناقضات والقادم أحلي ...بس ما تغمض عينيك (عشان ماتفلقك وقيه طايره).
لو عندك باقي رطل تعال غيره بسرعه قبل فوات الأوان...والا...

السعر بتغير والله لا
مافرقت لو السعر ظل ثابتا تبقي بالكيلو بالرطل بالميل

الاخ الرائع عادل خيارى نحييك على الطرح الجميل
واود ان اضيف بعض الاشياء التى كانت تساق فى البرامج التعريفية
كنت قد حضرت حلقة من احدى البرامج الازاعية
وكان سؤالك مطروح من البرنامج والجمهور
وكانت الاجابة كالاتى
1- النقلة الى توحيد النظام التى تساهم فى رفع الاقتصاد القومى بطرق شتى منها توفير الزمن وحفظ الحقوق وذلك بان يلتزم صاحب المنتج من تعبئة الاشياء فى عبوات صغيرة للجمهور وتكون التعبئة مرة واحدة (يعنى بقت من مصنع كنانة هنالك عبوة 5 كيلو للمستهلك ) يعنى وفرت زمن التاجر والمستهلك
وحفظت حق التاجر والمستهلك من فرقت وطففت فى الميزان
2- هنالك فرق علمى واضح فى الموازين التى هى بالرطل (زمان يقوليك 2.25 رطل تعادل كيلو ودا طبعا علميا ماصحيح ) فاستخدام الرطل يجعل هنالك حق ضائع للتاجر والمستهلك
3-فى السوائل استخدام الرطل فية نفس مازكر فى 2 علية اسخدام اللتر يوفر ماسبق ذكرة
4-ضبط الجودة فى الموازين وجعل مصدرها واحدا هى الهيئة القومية للمقاييس والجودة بدلا عن كل حلبى يطق ليك رطل ويحصل الجدل مختوم ومامختوم
5- استخدام المتر فى قياس الطول طبعا اظن لاجديد هنا لانة دا السائد
6- منع اللبس الدائر وتوحيد الجهود فى المشاريع الكبيرة لان فى السودان خلط ولبس كثير خاصة فى موضوع المقاييس فالكل سائد(وقية -رطل -ملوة -ياردة -ميل -كيلو------الخ)
فسوف يعرف عاميا ان السودان يستخدم النظام المترى كالاتى(الطول وحدتة المتر ومشتقاتة)(السوائل وحداتها اللتر ومشتقاتة)(الاوزان وحداتة الكيلو ومشتقاتة) فيزال اللبس عن المستثمر القادم الى السودان فلايحتاج فى عقوداتة ان يكتب ان نتفق على الاوزان والمقاييس وهلم جرا
ارجو ان اكون ازلت بعض اللبس الظاهرى
اما ماخوفى يلعمة علام الغيوب

احي الأستاذ عادل ..
والأخوة المتداخلين جميعا ..
هي دعوة للتغيير .. ومواكبة للمواصفات والقياسات العالمية .. وأعتقد بأنها أكثر دقة .. من الرطل وخلافه .. والمهم في الأمر كما ذكر الأخوة المتداخلين ثبات الأسعار .. ودا هو المهم .. وطبعا إستخدام الكيلو وبالموازين الحساسة يؤدى لشراءات بأوزان جزئية .. وهذه تفيد في حالة السيوبرماركتات الكبيرة .. يعنى عادى ممكن تشتري جزء من البطيخة بدل شراء بطيخة كاملة مثلا .. وجزء من الدجاج بدل دجاجة كاملة وعلى قدر ظروفك .. ومافرقت يا أستاذ عادل .. المهم يثبت السعر عند سقف معين .. ودا المهم ..

شكرا عادل وتسلم الهادي ع التوضيح
ومشتاقين ارطال ارطال بالقديم
ومشتاقين بالكيلو بالاكتر