نعم حباب كل الحبابيب ...حباب كل
الرفقاء ..حباب كل الأخوان


وحباب جميع أبناء الهدى في كل بقاع
العالم بمختلف ألوانهم ..وحباب كل الجانا وشاركنا اللمة والفرحة تحت ضل شجرة الهدى
الواسع وكبير ...


ظللنا إخوتي ولزمن طويل في مدينة الهدى نعاني من العصبية الحزبية والطائفية ... وكنا
نحلم بضل يلمنا كلنا ...تحتو ننسى أحزابنا وطوائفنا ..نشرب قهوتنا ونتخلى عن
عصبيتنا .. وبس نتذكر الشي اللمنا وجمعنا ..الهدى فكان هذا المنتدى حلماً
انتظرناها طويلا ..وماتتصورو فرحتنا لما فتحنا عيونا ولقينا الحلم واقع ..


نحن لانريد لأحد أن يتخلى عن فكره أو
حزبه ولكن فقط شيءُ ُ قليل من هذه الطاقة الفكرية الجبارة تتوجه لمصلحة الهدى
...ولنتوحد فيما اجتمعنا عليه ولنتحاور فيما اختلفنا فيه حوار لايسد الباب امام
الاتفاق ...


مع فائق احترامي وتقديري
..............................

شكراً لك
الاخت الفضلي مسره
هذه دعوة للتحاور والتفاكر وتنقية النفوس والتصالح والتسامح
خيراً فعلتِ
فدعينا ننسي العصبية وللابد ونبغض التعصب الاعمي سوي كان لحزب او قبيلة
ونعلي من شان الانتماء الحزبي القائم علي المبادئ والمثل والاهداف بعيداً عن التمسك بالاشخاص والمصلحة الذاتية ..
اختي الفاضلة ...
لم تكن الطائفية بمعناها الاصلاحي واللغوي يوماً سبباً يعاني منه إنسان الهدي فقد إصبحت جزء من تكوين مجتمع الهدي وساهمت في ربط النسيج الاجتماعي المبني علي المحبة والاخوة الصادقة والإيثار .كما لم يكن بالهدي تباين اضداد وتعدد للمذاهب والتوجهات والتاريخ القريب والبعيد يوكد ذلك والواقع يعضد ذلك فلندعي الشعارات البراقة المستهلكة اعلامياً جانباً ورمي اللوم علي الطائفة او الجماعة في مانحن فيه كحجج اوهن من بيت العنكبوت لايخدم قضية .
فدعينا ونحن نستشرف عهد جديد للهدي(في كل المجالات ) ان نتلمس الخطي بكل اريحية وتفاني ومحبة كقيم مكتسبة من عبق الارث المجيد لإنسان الهدي ..أن ننظر للتاريخ بوفق اوسع والتذود من اشراقاته. ونقيم الحاضر ببصيرة وتاني . وان نرسم معالم المستقبل بتجرد ومسؤلية ...فالاجداد وصلوا ووصلوا وفق معطيات زمانهم وماهومتاح لديهم في تلك الحقبة الناصعة في تاريخ الهدي ..
فماذا نحن فاعلون ؟؟؟
هل نجتري التاريخ ومفارقاته ؟؟..
ام نندب حظنا وخيبة الامل ..
ام نوقد شمعة في الظلام ...
وماذا نقول للاجيال القادمة ؟؟
التي تنظر الينا عن كثب؟؟
فهاهو الضل الضليل قد اوجد بعون الله وفضل نفركريم...
واللمة بدت تتقاطروفودها ..
فلنعمل سوياً القهوة ...
وليشرب منها كل ابناء الهدي بفنجان واحد..
وربنا يحقق الاحلام والامنيات ....
ودعيني اختم بمقولة فولتيرلست على رأيك، لكني على استعداد للتضحية بحياتي من أجل أن تقول رأيك).
لك تحياتي..
ودالامين
ان مرت الايام ولم تروني فهذه مشاركاتي فـتذكروني ، وان غبت ولم تجدوني أكون وقتها بحاجة للدعاء فادعولي

الاخت مسرة .. متعك الله بالصحه والعافيه
كلامك سمح .. ربنا يوفق .. والله المعين
جزاك الله خير

تسلمي مسرة
على الفكرة الجميلة التي تدعو للوحدة

حباب الاخت مسره
وصباحات مسره ومسرات
وشجرتك دايمه ظليله وجميله وخضره
اها دحين فوق الشجره مابلقي لي معاكم فجه ( بكسر الفاء)
والله عشان نحن ما من الهدي
هسي كدي ياعادل عليك الله تر لي كده شويه شنو شايل ليك مساحه تقعد قبيله
لكن بيني وبينك يا السره اقصد يامسره شعبنا ده لو ما اتكلم في السياسه مابرتاح
اخونا عادل مع اخونا الزبير يقعو ليك في الحكومه
مايخلو ليك ليها حنبه تنوم عليها
تقومي انتي براحه براحه تحاولي تغيري الموضوع عشان الناس كلها تشارك
عادل فرصه زي دي مابفوتا... مابديك فرصه تغيري اي حاجه
تمشي للمجموعه التانيه تلقيهم بتكلمو ليك في ايام زمااااااااااااااااااااان
ياربي انا دخلت برنامج من الارشيف والله شنو
وكلامهم كلو عن الانجليز وكيلو اللحمه وخرفان الغرب اللي كانو مجان
انتي عارفه الناس ديل يكونو مبرمجين علي شفره قديمه
المجموعه التالته دي كمان خليها ساي ديل ناس كوره بس
لكن لو سالتيهم وينا كورتنا..... مافي اجابه
كواريك وصوت يصن الاضان
الناس كلها تنظر
والحال ياهو الحال
وكمان ماشين للخلف
وبسرعه فاقت سرعت الضوء
والصوره عكس كده خالص
ناس اخر نضريات واخر متابعات للاحداث في كل المجالات
لكن التطبيق صفر كبيييييييييييييييييييييييييير
واحد من ناس الكوره يقوم يقاطع اخونا سراج الدين ويعارضو في كلامو ويدافع للحكومه شويه
بس تعالي شوفي تاني
انت ناس الحكومه ديل دافعين ليك والله شنو
وريني بس ادوك كم عشان تدافع عنهم كده
يا استاذ الزبير انا قلت راي بس
لا ده مارايك.... انت الكلام ده محفظنك ليهو .. انا عارف اسلوبهم
ههههههههههههههه
كيف يعني محفطني ليهو.... يعني انا مابفهم في السياسه
اي مابتفهم... لو بتفهم ما كان قلت كلامك ده
لا خلااااص البتفهم انت ... شوف كمان
انت قصدك شنو؟؟؟؟؟؟
قصدي وااااااضح


دحين يابتي يا مسره
فرتقي اللمه دي قبلي ما تقلب مشاكل
هههههههههههههههههههههههههههههه

ودي وتحياتي للحبيب عادل والاخ الزبير

كان النفوس اطايبت الضل بشيل الناس...(علي ذكر الشجر والضل الوقف ماذاد٠ الشجر في الهدي مشكلتوا شنو . مابقوم وكان قام مابزيد .افيديدونا يااهل الاختصاص

اخي عثمان الشريف شجر الهدي شكلو كده كلو مصفر
ههههههههههههههههههه

الاحباب الاعزاء
سلام
دعوة الاخت مسره شكلها حتفتح باب للنقاش في حاجات كتيرة
ودا المقصود
شجر الهدي حكايتو حكاية ...
ربما يكون من تربة الهدي .. او من نوعية الاشجار التي تزرع في بيئة غير ملائمة من معايش وحتي الهداية ومن البطري وحتي القسم الزراعي (سابقاً).
او في مياه الهدي ..
او لحكمة يعلمها الباري ..
وفي اعتقادي ان دعوة مسره ذات مدلول ومعاني في الضل واللمه والقهوة والجو العام لهذه الحالة .
الضل :ممكن يكون ضل ضحي اوضل حائط او راكوبة او هبريب وكندشة وماشرط يكون ضل شجرة فبعض الشجر ذمومة الضل كالعندليب وخلافه.
اللمه : التجمع الهادف والشله الفالحة والنفير والصحبة الفاضلة والهيصة الراشدة .
القهوة : رمزية للمكان والزمان والحال وعبقرية اللحظة وطبيعتها في تناول القضايا(اقصد القهوة ) بقه بقه وجرعة جرعة وفنجان فنجان ..البكر والتني والبركة والصفوفة ولملمة العده والفرتقة بشيش واحد واحد ولسان احال ليتها لم تنتهي ..
الجو العام لهذه اللحظة التاريخية ياحبان ...
بالكاد يتطلب نفوس طيبة نقية من التعصب والخربشة والمناقرة والمشاحنة ...
لان مجتمع القهوة مجتمع مزاجي وذوطقوس محددة فاي كلام من النوعية اياها ونقاش حاد يشنقل الريكة (اقصد كانون الجبنة ) وطير من الراس وتزيد القريفة وتخرب القعدة وتفرتق اللمه ...
لذا فالكل مدعو لهذه اللمه بهذا المفوم الواسع ...
في احد الضللي ..
لتناول قهوة الهدي الماخمج ..
وربنا يخضر الهدي ...
ويبيض النوايا...
ويزين الايام بالبنفسج والبرتقال..
ودالامين
إن مرت الايام ولم تروني فهذه مشاركاتي فـتذكروني ، وان غبت ولم تجدوني أكون وقتها بحاجة للدعاء فادعولي

الفكره جيده والهدف نبيل وممكن نصل وناس المازق الاخلاقي ديل برضوبنحتاج ليهم عشان كده مانتقل عليهم

الأخ محمد الامين جزاك الله خير على المساهمة بفكرك المتجدد في
الموضوع .. .

...نعم جمعت بين أفراد الهدى في تلك الفترة المحبة
والإخاء لأنهم ينتمون لطائفة واحدة ولكنا نريد أن تظل تلك الرابطة وإن تعددت
المذاهب وأختلفت الأراء لأن الذي جمعنا أولاً عقيدة ثم حبنا للهدى وسعينا للنهوض
بها في كل المجالات ، التعصب لطائفة او حزب او جماعة أو لفرد تجعلُ الإنسان يحيدُ
عن الحق كثيرا ...وأيضاً التعصب يجعلك تنظر لمن هو مخالف لك على أنه عدوك..أما العبارات الإعلامية لاذنب
لها غير أنها مشكورة ساعدتني في نقل إحساسي بهذا الامر ورأي في الموضوع.وكما قلت دعنا ونحن نستشرق عهد جديد للهدى نتلمس الخطى
بكل اريحية وتفاني ومحبة كقيم مكتسبة من ديننا الحنيف .. فاقول أخيراً مايجمعنا أكثر مما يفرق

الأخت مناسك تشكري على المرور ..

الله يسلمك ودخياري ..وعلى حس اللمة مبروك لرفيدة وماشاءالله كانت لمة كبيرة ربنا يحفظ

حسن ..حبابك .والله تقعد الدار دارك ياعادل جر البمبر داك وكبي يامناسك فنجان قهوة
ونحن دايرين الناس كلها تنضم وتقول الكلام السمح البودي لقدام

ود الشريف صُح كلامك وعشان الضل يشيلنا كلنا دايرين الناس تطيب نفوسها، والشجرة يابا ماظنيتكون سقيتوها

كباشي كتر خيرك والناس كلها نحنا محتاجين ليها

االاخت مسرة جزاك الله خيـــــــــــــــــــــــــــــر اطرقتـــــــــــــــي لي موضوع مهـــــــــــــــم جـــــــــــــــدآ

مداخلات طاعمة جداً بطعم طيبة أهل الهدي وراتبهم- دي ما سياسة- .
تحية لكل المداخلين وتحية بصورة أخص للأخ حسن. ويا كباشي خلي مطاعنات الكيزان دي!. نحنا في النهاية مهما كان توجهكم بنعتبركم أخيار لأنه إتربيتوا تربية أنصارية. فالخيرية ماتزال فيكم وإنتو في نظرنا أولادنا لكن ضليتوا الطريق!- بفهمنا طبعاً- لكن علي أي حال التنوع جيد. ونتمني أن تكونوا داخل الموتمر الوطني من دعاة الإصلاح لا المطبلاتية ودعاة السلطة.
شكلي طشيت شبكة وزغت من الموضوع الرئيسي، وعلي أي حال أوكد علي فكرة المداخلين وأزيد إقتراحاً بأن نشكل منتدي ثقافي /إجتماعي نواته أعضاء المنتدي الإلكتروني، ويسعي المنتدي الثقافي لإستقطاب آخرين بهدف إشراك ألوان الطيف المختلفة.

حمد حبابك سعدنا بجيتك وانضمامك لي لمة الهدى وتحايانا عبرك للأسرة الكريمة وكتر خيرك على المشاركة

الاخ الزبير مشكور على المرور والحمدلله اجتمعنا على حاجة وهي أن نجتمع ..وعلى حال الخلاف سنة كونية والحوار الهادف أمر رباني قال تعالى : (وجادلهم بالتي هي أحسن)

الاخ محمد الامين مشكور على توضيح الفكرة ونقول آمييييييين لكل الدعوات الجميلة وربنا يخضر الهدى ويبيض النوايا

نظريا فكره حلوه وجميله كما اثني عليها الاعضاء الكرام
عمليا واااااااااضحه وضوح الشمس في كل حياتنا اليوميه
سياسه
رياضه
اقتصاد
وغيرو

ناس الشدرة دايرين لينا فنجان ننتظركم بتجوا راجعين ولا خلاص اللمة اتفرتقت
عودوا اخوتي للشدرة ومعاكم اخبار جميلة عن الهدى

عادل خياري كتب:

ناس الشدرة دايرين لينا فنجان ننتظركم بتجوا راجعين ولا خلاص اللمة اتفرتقت
عودوا اخوتي للشدرة ومعاكم اخبار جميلة عن الهدى

قلت بمناسبة مرور عام على المنتدى كدي نقلب الصفحات ونتذكر بوستات السنة الماضية
ياود خياري الخبر الجميل أنو اللمة دي انشاءالله تبقى حقيقة تحت ضل نيميا كبيرة

[مليون سلام


بعد اللمه الحلوه دي والكلام الجميل ده مافي كلام







خالص الود