كل طموحنا جميعا تقريبا في بداية الأغتراب .. لا تتدعى ان تبني البيت غرفتين معكوسات مع صالات وعربية بوكس .. هذا كل الطموح .. حتى غناء البنات في تلك الفترة مغترب سنتين أو ضابط بي دبورتين ..
علاقة السنتين دي ..شنو ؟ العلاقة ياسادة إنو أي واحد بعد تكملة دراسته بي سنتين فقط من التخرج خلال هذه السنتين يكون استلم راتب معتبر يبني البيت ويتزوج في حياة بسيطة ومستقرة .. ولكن لماذا طالت الغربة .. ؟ هل تغير طموح الناس ؟ .. فلنبحث عن الأسباب التى دعت الغربة تطول وتمتد كل هذه المدة ؟ ..

سلام ابووضاح لك التحية
ورد الله غربة الكل سالما غانما ان شاءالله
والله الحكاية مابقت غربة بقت هجرة وابدأ من نفسك وقس على ذلك او بمن سبقوك اغترابا لترى كمية السنين التي ضاعت من عمر الانسان في الغربة وبعضهم من عاش في الغربة اكثر من السودان

اقتباس :

مغترب سنتين

سنتين زمان السنة بي عشرة اي واحد زاد من كدة رجعوا بالسفارة

السبب القوى هو الغربة داخل السودان
لمن تكون غريب وسط أهلك تختار الغربة
لمن تشوف حالة اهلك
لمن يحترموك برة ويهينوك جوة
وحاجات تانية حاميانى

طارق مامون كتب:

كل طموحنا جميعا تقريبا في بداية الأغتراب .. لا تتدعى ان تبني البيت غرفتين معكوسات مع صالات وعربية بوكس .. هذا كل الطموح .. حتى غناء البنات في تلك الفترة مغترب سنتين أو ضابط بي دبورتين ..
علاقة السنتين دي ..شنو ؟ العلاقة ياسادة إنو أي واحد بعد تكملة دراسته بي سنتين فقط من التخرج خلال هذه السنتين يكون استلم راتب معتبر يبني البيت ويتزوج في حياة بسيطة ومستقرة .. ولكن لماذا طالت الغربة .. ؟ هل تغير طموح الناس ؟ .. فلنبحث عن الأسباب التى دعت الغربة تطول وتمتد كل هذه المدة ؟ ..

تحية طيبة وبعد
فالاغتراب والغربة او الهجرة ظاهرة إنسانية موجودة فى كل المجتمعات
ولكن قبل البدء فى الاجابة على الاسئلة الواردة اعلاه يجب علينا ان نضيف اسئلة أخري هل كانت الغربة اوالهجرة من أجل هدف معين ؟؟؟؟؟؟؟؟؟؟؟؟؟؟ وهل تم تحديد مدى زمني معين لفترة الغربة او الاغتراب والهجرة ؟؟؟؟؟؟؟؟؟؟؟؟؟؟ وماهي الاثار المترتبة على الغربة و االاغتراب ؟؟؟؟؟؟؟؟؟؟؟ وهل مع تحقيق الاهداف التي تغرب الانسان من اجلها لا توجد آثار جانبية ؟؟
فالاجابات على على ما ورد اعلاه هي التي تحدد الاجابة النهائية متى ستنتهي الغربة ............................
جاء فى فى بالى مقال وتحقيق صحفى فى أحدى الإصدارات العربية بعنوان شبهات تحت الجسر ---- ( المقال بتاريخ الاربعاء 6/4/2011) وهو يشير ما آل اليه حال المغترب السوداني .................................
ولنا عودة

الاخ طارق

لك التحية طبعاً انت في طريقك قريباً لان تكون عميد المغتربين لمدينة الهدى.
سؤالك صعبة الاجابة عليه. وكل واحد ممكن تكون عندة اجابة مختلفة
كما اسلفت الطموحات في الاول بتكون بسيطة لان الحسابات نفسها مبنية على معطيات الزمن نفسة لكن الزمن متغير وبتدخل اشياء غير موضوعة في الحسابات الاولية.
في البدء الناس بتتواجه بواقع مختلف من الموجود في مخيلتك وانت في طريقك للاغتراب- سنتين ثلاثة عاطل، الكفيل ، التجديد، التزامات السودان وحاجات تانية.
وبعد التوفيق و الاستقرار ندخل في مرحلة اخرى ذات متطلبات مختلفة.
وجود الابناء واقع جديد له متطلباته هذة المتطلبات مربوطة بمتغيرات عامة حدثت في الجتمع مثالاً لذلك لما انت اغتربت ما كان في مدارس خاصة وتكلفة تعليم ابناءك غير متضمنه في حساباتك. الان صارت حتمية وبمبلغ وقدرة، من الابتدائي الى الجامعي و انت بتدفع . لذلك يتحتم عليك الاستمرار في الاغتراب الى حين للايفاء بهذه المتطلبات . ولما تحققها تلقى نفسك بدل سنتين صارت ثلاثين او اكثر وجاك السكر و الضغط والشوف طشاش السمع تقل.
حكاية واحد بنى البيت وفرشه واشترى غرفة لطفلته على زوق الطفلة ولما حب يستقر الطفلة كانت في الجامعة. اوعى تكون اشتريت سراير لناس وضاح زمان.

رد الله غربتكم وانتم ظافرين الكل له اسبابه المقنعه فهي ليست من فراغ وكمازكر تبدل الحال والعمل عماره داير الثانيه خلق الانسان خلوعا ولقد خلقنا الانسان في كبد الحياه لايوجد بها ضمانات فاغترابكم جهاد تثابو عليه الم تكن ارض الله واسعه فتهاجروا فيها هي عجلة الحياة ردا الله غربتكم حتي تستمتعوا بما حصدتوه

التحية الى الأخوة المتداخلين جميعا :

الأخ الحبيب ابو الطيب
الأخ الحبيب صديق الماحي
الأخ الحبيب عمر خليفة
الأخ الحبيب الهادى محمد يحيى
الأخ الحبيب طلحة عبدالحليم

تعددت اسباب الإغتراب .. وتغيرت طموحات الناس .. وذلك لتغير حياة الإنسان نفسه من فرد واحد الى راعي ومسئول عن أسرة صغيرة وأسر ممتدة .. فكبرت المسئولية ومعها كبرت وتغيرت الطموحات فطالت الغربة .. وما معروف نهايتها متين !!!!
نسأل الله ان يرد غربتنا جميعا .. وقطعا سوف نرى تغيير حتى في حال الناس لأن الأشياء لا تظل بنفس الحال بل تتغيير بتغيير السنين .. ..
اذكر واحد من زملاء الغربة .. سافر ليبيا زمان وطول لمدة ستة سنوات .. ولما رجع جاب لإخواته فنايل برد طبعا على المقاس القديم داك .. ولما فتح الشنطة واعطاها اياهم ضحكوا ضحك شديد .ز لأن الأطفال عمر سبع سنوات + ستة سنوات غربة اكيد جعلت من البنات بالذات حاجة تانية ...
عشان كدا يالهادي محمد يحيى .. انا ما أشتريت سراير .. لأن وضاح وأخوانه معاي على طول .... وطبعا لما تسافر برضوا بتسأل دا ولدوا عمروا .. قبل ما تشتري الأشياء .. وبعد ذلك هنالك أيضا مفارقات ..
أكرر لكم التحية على المرور ..