الذكريات دايما جميلة وبالذات التي تكون صادقة ونبيلة وهي التي تكون محفورة في الذاكرة وان رسم عليها الزمان ملامح من الضبابية ولكنها تكون في مخيلتك ولو كانت في آخر صفحة او آخر سطر في المخيخ
في محادثة اسكايبية مع الاخ الهادي محمد يحيي وذاكرته المتقدة اجتر ذكريات زادت على ال 35عاما ( لكن والله كان كدة نحن كبرنا)
المهم كانت ونسة في ماضي الايام الجميلة وضحكت حد الاستمتاع والنشوى فقلت انشر هذا الفرح الطفولي البرئ عله يدغدغ ذكريات احدكم مثلي
طبعا مااقدر احكي ليكم كل شئ لكن في جزء قابل للنشر وهو
والراجلل جاء من السودان قريب سالتو من اخبار البلد وسالت من ناس بعينهم كانت لهم معزة لانهم اولونا ثقة في زمن لانعرف مامعنى الثقة ولكن ايضا كنا لانعرف الزيف والنفاق
طيب سالت من حاجة حواء ست الفول وهي التي كانت لاتحرجنا ابدا في تسالي بي تعريفة او مدمس ونحن لانملك ثمنه ولكنها ابدا لم تقل لا او تحرج طفلا والغريب في الامر كنا نستدين منها وكانو عندنا ماهية آخر الشهر نجيب ليها من وين ماعارف لكن بنقول ربك بهونا وفعلا ربك بهونا
ومن فصول موقف الحاجات ستات الفول والتسالي امام باب المدرسة هي صلب الموضوع تذكر اخونا الهادي ان هناك اناس كنب او نحل دايما متكلين جنب الحاجات ستات الفول ومان تشتري اي شئ الا كان لهم نصيب مما اكتسبت وفي فسحة الفطور قد يكونوا ظفروا باكثر من المشتريين انفسهم بحساب انهم اخذوا من روضة زهرة ومن كل مشتري شحدة
بقى هنا عشان تتخارج من ديل انت وشطارتك
والمراقات كانت اتين ديل اصلو مابجلن بفكنك بفكنك
الاولى
والله ماحقي مرسل ليه
والتانية
والله ده فطوري مابقدر اديك منو
اخلي اخونا الهادي او شباب المنتدى يكتبوا لينا الناس الكانوا بقيفوا باستمرار جنب الحاجات

ذكريات اللاخ عادل
الابتدايئه ايام الناظر الاستاذ الفاضل ود الفكي عمر وبالمناسبه دي لاقيتو في ربك انا ما عرفتو شوف الدنيا بقي تاجر في الادويه بالصدفه في صيدليه نظر لي شديد وسالني بنفس صوته القديم يا ابني شفتك وين قلت له لنا من الهدي وسلم علي ودموعه علي خده وسالني عن الهدي فردا فرد وبلغ لي سلامي عند دخولك السوق عندما تنزل من المواصلات واخر مره نقل الي الجزيره ابا سنه83 نحن في رابعه وكلماته يا اولاد الجمب ستات التسالي تعالو بي جي والجدوه في جيبه والخوف لايوصف دي خارج النص.
لكن الفرطيقي تلقي حارس ستات الطعميه تشتري لازم تدي ما بعرف ليك عزر بشيل بشيل ..والله يا عادل كبرت خلاص ههههههههههه

هي زكريات جميله بالطبع ولن تنسي لك التحيه اخي عادل وانا طبعا من مواليد الجزيره ابا ونقلت وقتها من مدرسة الجزيره ابا الي الهدي الصف الثالث ابتدائي وكان خالي محمد الحلاوي يعمل في جنينة الفواكه بين البيطري وسوق الهدي ولديه صداقه بالاستاذ والمربي الفاضل عمر امدالله في عمره والرحمه والمغفره للخال محمداحمد الحلاوي واحضرني للمدرسه وتم تسجيلي وحينها كان الاستاذ الفاضل عمر مديرا وكان يدرسنا التربيه الاسلاميه وكنا في حصه من الحصص مع الاستاذ الفاضل عمر وكنا نجلس تحت ظل شجره من الاشجار وفي اثناء الحصه صاح احد الزملاء لاستاذ الفاضل عمر استاذ استاذ دا رفض يديني تسالي وانفجر استاذ الفاضل ضاحكا وعاقبه بالجلد وكنا دائما ماتمتلئ جيوبنا بالتسالي والفول المدمس واللالوب والنبق والقنقليس وكنا ايضا ناكل الطعميه بشهيه مفتوحه وايام زمان كانت ايام

الاخ محمد الطيب لك التحية
وفعلا الناظر الفاضل عمر عبدالحميد
امد الله في عمره تعلمنا منه الكثير وعلمنا المفيد
ولنا ذكريات معه سافرد مساحة ان استطعت الى ذلك سبيلا

االاخ عادل خياري لك التحية
وانت دائماً ترجعنا للايام الحلوه.
الاخ عادل و ما ادراك ما حاجات الفول و التسالي- حاجه امنه ، حاجه فاطمه، حاجه حواء، وحاجه كر محطات لا يمكن تجاوزها من حياتنا وما من قرش او تعريفه تتحصل عليه او عليها الا و جري للحاجات. ومرات كن يهبلنا من غير قروش على سبيل الضواقه هسا بقت ضواقه مافي كلو بقى مكيس يعني لازم تشتري.
لما كنا في الهجرة الوضع اختلف كنا ونحن ذهاباً للمذاكرة نغشى الحاجات في بيوتهن لنتزود بمعينات المذاكرة من فول و تسالي.
وجمال تلك الايام منبعث من بساطة الناس وتماذجهم و تعارفهم واي حاجه ممكن تعرف ده ود منو. وكنا يهبننا احياناً بالمجان رغم بساطة دخلهن وقد يكون منا ود التاجر ولكن نظرتهن مختلفه يقدمن لى قدام.
لك التحية الاخ عادل ونتمنى عودة البساطه و الحنيه و كل الاشياء الجميلة افتقدناها في زماننا هذا.