فى السبعينات ناس الخرطوم عندهم كراكة زايدة قالوا نتبرع بيها لناس شندى ..وكلفوا واحد من السواقين عشان يوصل الكراكة لى شندى
قومى انت ياكراكة اتعطلى فى نص الطريق لابقت فى الخرطوم لافى شندى والسواق رسل المساعد عشان يبلغ ناس الخرطوم ...ماقصروا بعد شهرين رسلوا مهندس عشان يعرف الحاصل شنو فحص الكراكة قال محتاجة لاسبير والاسبير مافى فى السودان ..المهم السواق قال ليهم انا مهمتى انتهت ..وجيبو ليكم زول يحرس الكراكة ..وبعد داك عينو غفير للكراكة البين شندى والخرطوم والغفير طالب بغفير اخر ..لانو ماممكن يشتغل دوامين .. والاسيبر رسلو ليهو فى المانيا ماوصل ..والمشكلة محاسب الولاية قال الغفراء ماتابعين ليهو .. عليهم صرف رواتبهم من الخرطوم اتخيلو الحل كان شنو ..فتحو مكتب جديد بالولاية وعينو فيه محاسب وركبو لافتة مكتوب فيها (محاسب كراكة شندى ) ولى يو م الليلة الاسبير ماجا من المانيا ...
هذا القصة هى طبق الاصل لمشكلة مشروع الجزيرة
وهذا والله ماتشأؤم ولكن دى حال البلد ..
لك الله يامشروع الجزيرة الجريح ..
والله يصلح حال البلد ..
نرجوا تعليقاتكم على ذلك
(الاخ ابو النسب سراج الفاضل اثار هذا الموضوع فى المنتدى
ولكن ذكرت ذلك لعظم الامر..)

الشيخ الكراكة دي فيها دلو ولا مافيها
كان فيها دلو بتحتاج عفيرين اشان واحد احرس الدلو والاخر الكراكه هههههه
دى حالنا كدي بلد اغنى بلد وناسا افقر ناس

الأخ / مهند
كويس إنه كراكة شندي فتحوا لها مكتب وعينوا ليها خفيرين ومحاسب
بالرغم من أنه تحصيل حاصل
أحسن من مشروع الجزيرة قفَُّلوا المكاتب وسَّرحُوا الموظفين والخفراء
أكبر مشروع َمْروِي تحت إدارة واحدة في أفريقيا المساحة 2.2 مليون فدان
الجزيرة ترتيبها الولاية الثانية في السودان
بعد دا ترتيبها الثانية من الأخر
الله يكضب الشينة .

لك التحية الاخ محمد نور $$
تقبل فائق تحياتى
يأخى اصلا الكراكة ابت تقوم ..وسكنوا جنبها ناس وسمو حى الكراكة
وبعد شوية مدينة الكراكة وبعدها تبقى ولاية الكراكة
وبعد داك نسمع بحركة الكراكة المسلحة (ويقسمو ليهم الثروة والسلطة)
وغايتو ..دايرة صبر’’

شكرا لك شيخ عوض الله
احييك والتحية ضفاف
كل الود وليك التحايا مطر
بالمناسبة دى الناس زرعوا ولا راجين المطر

شكرا لك شيخ عوض
ليك التحايا مطر

الحبيب الشيخ مهند
الكراكة دى زى ما بقول المثل
( اخ وبركت)
البركة الياها
ياربى دى تكون( الانقاذ)
والا اقتصاد السودان
ولا مشروع الجزيرة
وبكرة الناس تقول
حلو القلوتية دى
( ان شالو ما بنشال وان خلو سكن الدار)
طوالى الناس تقول دى الانقاذ..
كراكة غريبة جد

الجد يد فى المشروع
غايتو كلام جرائد
قال الوالى ( ان ولايته تتجه للدخول فى مجال شراكة خاصة مع الصين شراكة استراتيجية تحقق الاهداف )
وقال هو مستمر فى سياسة اصلاح المشروع
نامل ذلك ......