الناير العميكة طاااااااخ فلق ابوهو بحجر
ابوهو مشى المستشفى قالوا ليهو لازم اورنيك تمانية من البوليس
يا اخوانا دا ولدي وهو عميكة شيل وخت شيل خت ابو اعالجوهو كلو كلو
مشى البوليس
العسكري قاليهو لازم تجيب الولد نتحرى معاهو عشان نتأكد
جاب الناير العميكة
العسكري : فلقت ابوك لشنو ؟
الناير : ما تان إلبد !!!!!!!!! [b]

بخيت العولاق عرسو ليهو النعمة النجيضة كان تجيب منو ولد انفعا لكبرا
.
.
.
بعد يومين تلاتة من العرس اعترض طريقه سليمان المسخوت
اها يا بخيت العرس كيف ؟
فرد بخيت وهو مسرع الحق غنمو واشتت قصبو : سعلوقة سعلوقة ...... لقيتا سعلوقة

العجب امو بسرح بالسعية بالايجار الشهري والعنز البتلد بياخد حق الصابون
علما بانه لم يغسل يدينو بالصابون طول عمر ( الله يرحمه )
وفي آخر الشهر القمري بعرف القمرا بس لمن تطلع وادقش البيوت للحساب
حاج بلوقا زول صعب خلاص اداهو طلاطاشر قرش بس اقل من حسابو بكتير
العجب امو قاليهو ناقصات ودائما يكرر عبارة ناقصات لكي يوحي بانه يعرف الحساب
حاج بلوقا قاليهو ات يا عولاق ان عرفك بالحساب ناقصات ولا تامات ؟
فرد عليه العجب امو ردا ابكى حاج بلقا وكل من حوله
فقال له العجب امو : قول غشتيني انا ... اها الله بتقول ليهو شنو ؟
واخذ باقي حسابه كاملا ونقز اغني لاحق السعية

حكاية مشهورة في منطقتنا كادت ان تتسبب في حالة قتل
جاء ضيف وبونس في الجماعة ومن ضمن ونستو قاليهن نحن بناكل لحم الكديس
اها الدخيري العولاق قاليهو كان جبت ليك اسع كديس بتاكلو
الضيف قاليهو آي جيبو
الدخيري كوفك كوفك كاوش الكديس وخماهو في شوال وجابو هوا
الضيف غمت خشم الجوال وقال للدخيري العولاق جيب عكاز
الدخيري عكازو جاهز جنبو
طبعا الكديس ما بنضبح بنضرب اولا في راسو وبعد داك سريع سريع يضبحو
الضيف : اها ميز ضربك في راس الكديس جوة الشوال
ات يا الدخيري مو عميكة وفاقد توازن وتر هناااااك وطااااااااخ في راس الضيف
جابو للوطا نجيض ضربة العميكة ما ختيرة
عليك امان الله الزول شالوهو المستشفى منتهي
جاتو صحية كلم ناس البوليس قاليهم كان مت عافي للدخيري
بس ايامو كانن طوال
انقر تاني جا حلتنا
والعبارة الاخيرة دي قالها لي الدخيري بنفسو في رمضان الفات دا
عندما سألته عن صاحبه ........

عندنا واحد اسمو ود مرسي والله صحي بنفس الاسم عميكة جانا طاشي ساهي
ما عارفنو جاي من وين عرس الصبر قاسي والله صحي تاني وبنفس الاسم
الصبر قاسي دي بتصنع الدلاليك والله صحي ههههههههههههه
الضحك داير اكتلني خليني اضحك واجي راجع اتمها ليك لاني اتذكرت واحدة تانية ومت بالضحك
ياخي احسن حاجة الواحد اونس روحو براهو

الصبر قاسي ماتت الله ارحمها
يا سلام ياخي علي حبوبتي الصبر قاسي كلنا كنا نناديها هكذا
وهي ذاتا انا ما عارفا جاية من وين ياخي الزمن داك كان فعلا زمن جميل
اها بعد ما الصبر قاسي ماتت احتار ود مرسي والقعاد بقى ليهو صعب خلاص من دونا
ضربة الديك اللولاني ود مرسي لملم عفشو في مخلاية وشرقت الشمش قبل الناس تسدر
اتلهم البيوت اودع في الناس بيت بيت
يا ود مرسي ماشي وين ما تقعد معانا ؟
ود مرسي : تاني انا ......... منو ؟؟؟؟؟؟؟ وانفقع بالبكا ... الزول ما عميكة خلاص

سلامات لصاحب البوست الاخ الكريم ود البوش ولضيوفه

لي صديق من احد قرى كردفان حكى لي عن راعي جديد في الحلة به من الخفة والطيش

مما تسبب في فقد عدد كبير من بهائم الحي

وعند المساء اجتمع اصحاب البهائم يقرعونه على عدم اهتمامه وضياع الجزء الاكبر من البهائم

فرد عليهم

( كان حمدتو الله ديل زاتن ما شويه !!)

__ اعلاه مداخلة لاحد الزملاء بسودانيزاولاين _

انا عاجبــانـي حكاية اولاد الجيمو متوكل والنو عشان كدا بكررها كتير
متوكل والنو اولاد الجيمو مشو اشركوا للسمك في الترعة
متوكل مفتح شوية حبس النو الجبادة وقاليهو انا ماشي اقبض القبور
كان غتست كورك لي
قاليهو سمح يا تكل ( متوكل ) اخوي
اها اطمئن متوكل وفوووووو من ضهر الترعة ترتر على ابوعشرين
داير اطفر اب عشرين بحثا عن القبور
ات يا النو كورك ليهو تكل تكل اجر جاي عطست
جدع عصاتو ويا ضهر الترعة جاك زول الطلعة ما قاسية فووووو طلع ونزل على الحيف ممنيا
النفس بسمكة متينة تغدي فكينا والفضلة تجينا
لقى اللستيكة تعوم ولا غطست ولا حاجة
فنهره وقال له اعتس دينك
ارح قدامو قبض القبور يا قبورة

الله عليك يامبدع والله من زمن ماضحكنا تسلم كتتتتتتتتتتتتتتتير

ودالبوش ياغالي لك التحية وكم تجدنا سعدا بطلتك البهية
حقيقة إبداع

طلحة عبدالحليم
تحياتي
شكرا جزيلا ياخي ومبروك عليك الضحك والابتسام
تابع وتقرأ العجب العجيب من هذا العالم الجميل

حبيبنا عادل خياري
سلام واحترام
والله انا الاسعد للحدي...... ث معكم ههههههه غالي غالي
وطلب طلتي معكم هي الارخص ... افرح جدا بوجودي معكم
ونواصل

صديق الماحي صديق الزمن الجميل والله يا حليلكم وحليل زمانكم
يا اخوي انا كتبت تحت العنوان ... لايعرف العمايك علا عميكة
وبالتالي البس الطاقية القدرك
عميكة ونص وخمسة وعماكتك خارعة العادة هههههههه
.
.
قلت لي دقي دقي .... ادقوك الرواعية شاحد ربي ...
بل قاليها خفي خفي الصفقة يما ....
ات كان قايل روحك وقعت من السماء سبعة مرات دفرتك انا ...
شكرا جزيلا ياخي وتابع

ادناه مشاركة من احد الزملاء هناك

.
.
والله يا ود البوش انت قاص بارع ، تمتلك ادوات جيدة تؤهلك لكتابة القصة ، وانا اتابعك دائما ارى اهتمامك بسرد التفاصيل الدقيقة والموحية ، واللغة المبسطة التي تخدم الغرض.
الشخصيات في قصص (العمايك والعولق) الصبرقاسي، الناير ،العجب امو ود مرسي وهي اسماء سائدة في المجتمع ، للوهلة الاولى يتهيأ القارئ ويتعرف على بيئة هذه الشخوص واجواءها وتخدم فكرة بعينها سرعان مايدركها القارئ
الواقعية والصدق في الحكي والاسلوب المسرحي يزيد من فرص التشويق لما سيأتي ، واصل ابداعاتك.
وهاك دي واحدة من قصص العمايك
عندنا واحد قالو ليهو : امك عضتها عقرب
فرد : خاف ما عاست !

: عندنا واحد قالو ليهو : امك عضتها عقرب
فرد : خاف ما عاست !


غايتو يا طلب انا اتخيلتو دعاها قاليها كان ما عستي ان شاء الله تقرصك العقرب
ههههههههههههههه

معليش يا شباب انا بنقل تعليقات الزملاء بسودانيزاولاين لكي تكتمل الصورة وتكون اروع
ادناه مداخلة من زميل

*** ود البوش يا رايع طبعا بضحك من جوووووه

كدي اتخيل معاي واحد في عمايكك ديل دخل هنا

وعرفك بتكشف في حالن وقام فتح بوست

عنوانو حيكون شنو وحيقول فيهو شنو ؟



*** أكتر حاجة وقفت فيها وضحكت فيها ما حتتصورها

(السلما) المتجولة.

: غايتو ناوي احكي حكاية زنبار قداد الهبوب
وحكاية حسبو الشتت قصبو

اعلاه كلامي انا وادناه كلام زميل بهناك



غايتو يا ود البوش كان حكيتها ياني البوراك حاكي قصة العميكه في ليلة الدخلة برضو
أقل حاجة ناخد لينا شهر اجازة من المنبر دا
وننال شـــرف التوقيف من المنبر ... والله صحي
..
..


__
أها قلته شنو آآآآآآآزول؟!
سجن سجن غرامة غرامة يلا ارحكاكا

ود مرسي المذكور اعلاه ... راجل الصبر قاسي
جاتو زينب بت ود النيل اليس ليها الحور والبيت الدردر
ولمن لا يعرف البيت الدردر هو بيت مدور دردر معناة المعنى مو مربع
اها ود مرسي ما صدق طوالي مشى عفن الزبالة ونسبة لانه دايما مفلس
التوم التاني طوالي فتح الزبالة قبل ما تعفن سمح ههههه بالله شفتو ليكن عفن سمح ؟
.
.
.
جات عمتي زينب بت ود النيل الله ارحمها واغفر ليها واغفر لود مرسي حيا او ميتا
وشمت الزبالة لقيتها غير معفنة
هي يا ود مرسي لشنو فتحتها قبل ما تعفن ؟
ود مرسي : بت ود النيل بت ود النيل انخرا ليك فوقا انخرا ليك فوقا يا بت ود النيل !!!!

عبدالله ود البوش كتب:

الصبر قاسي ماتت الله ارحمها
يا سلام ياخي علي حبوبتي الصبر قاسي كلنا كنا نناديها هكذا
وهي ذاتا انا ما عارفا جاية من وين ياخي الزمن داك كان فعلا زمن جميل
اها بعد ما الصبر قاسي ماتت احتار ود مرسي والقعاد بقى ليهو صعب خلاص من دونا
ضربة الديك اللولاني ود مرسي لملم عفشو في مخلاية وشرقت الشمش قبل الناس تسدر
اتلهم البيوت اودع في الناس بيت بيت
يا ود مرسي ماشي وين ما تقعد معانا ؟
ود مرسي : تاني انا ......... منو ؟؟؟؟؟؟؟ وانفقع بالبكا ... الزول ما عميكة خلاص

عميكة وقلبو كبيـــر

كلو إنسانية بكل ماتحمل هذه الكلمة من معني ..

لك التحية الحبيب عبدالله البوشني

وكم أسعدتنا بهذا الحكي الجميل الرائع عن هذا العالم الجميل الأكثر من رائع

وقصص العمايك .. لا تخلو من الطرافة والمتعة

وهذا يقودنا الى سؤال هل الرواشة هي ضرب من ضروب العماكة

وفي الخاطر .. قصة الروشاء التى دفقت أول فنجان بكري من الجبنة لوالدها .. حينما قال لها

هوي .. ياروشة دي .. شوتي الفنجان داا

فلم تتواري .. وتشوت الفنجان هناك توصلوا الباب ..

كم أنت رائع أخي ود البوشني ..

وفي إنتظار المزيد من هذا العالم الواقعي

اوووو حبيبنا طارق المأمون
تحياتي واشواقي
نعم هناك درجات متفاوتة ... رواشة .. دروشة .. طرطشة .. اندراوة ... عماكة ... تعولق .... ثم الجن الكلكي
.
.
شكرا على المساهمة الجيدة
وحرم ما بتفوت فاضي خلي دي معاك في سرك ... اجغم واسكت
ود اب علالة عميكة كبير جنو عرس
اولادوا حاولوا المستحيل اوقفوا من حكاية العرس دي
ابى كلو كلو وأصر يعرس
اها عرس
واحد من الاولاد مشى للعروس اسلم عليها واعرف البيها والعليها
كيف ان شاء الله تمام
الحمد لله
كيف ابونا ان شاء الله كويس معاك
تمام والله مافي عوجة
اها ان شاء منستر معاك
هنا العروس فهمت مغزى السؤال واجابت والله ابوك كان مشبعني في اللوبة
كيف ؟
اهمزني ... انط ... اقولي اللوبة أتـ
وتاني اهمزني ... انط ... اقولي اللوبة أتـ
اها دا الحال

سلام ودالبوش ياخي فرحانين بعودتك وتجدنا نقرأ ماتكتب مثنى ورباع يعني جوز جوز
وطبعا صاحب المفردة السهلة الممتنعه اي كتابة منك تنعش المنتدى
ياريت تسمع وردة وهي تقول خليك هنا وبلاش تفارق
امتعت الجمهور واهلك وطلعت لينا الناس المستخبيين
واصل في ود امبعلو المرة الجاية باقي انت زول نضام خلاس

ياودالبوش
حكاية السلما دي بالغت فيها ماتسن قلمك شديد للدرجة دي
تسلم تاني على الاطلالة

صديق الماحي يادفعة
سلام واحترام
ياخي ود التاية دا بياخد درجة لكة في العماكة
.
.
الله اديك العافية وانكت السحارة وطلع منها البلحة الملانة سمن وخلينا نقرم ونجغم
.
.
لاحظت حاجة يا صديق
هل هي ود الحنود ؟
ام ود الحنوت ؟
انا سمعتها ود الحنوت رغم انو اصل الكلمة ما عارفها جاية من شنو
شكرا جزيلا ياخي

أخي الرجل الرزين عادل خياري
تحياتي
بصراحة هي مشاغل الدنيا العويصة التي تحجبني عن هذا المنتدى المحبب والاقرب الى قلبي وروحي
واكون سعيد جدا لو شعرت بان اهلي هنا يستمتعون لكتاباتي وانه لفخر وشرف
.
.
ثم انك ياخي تستمتع بالسلما المتجولة وتطفي النور من ناس الدور التاني ههههههههههههه
ان شاء الله ما تنفعك رغم اني متأكد بانك ضحكت
حتى ترترت قفا قفا

اتذكرتها الان يا صديق الماحي ..... ود الحنوت .... هي في الاصل ود الحنوط
يعني ود الميت ههههههههههههههه شفت كيف بالله الكلام دا ؟
ياخي نحن ناس الحلول ديل نضمنا لذيذ وممتع ويحمل دلالات ذكية جدا

لك التحيه اخي وقد امبعتنا بالجد بس ماتطول الغيبه وربنا يديك الصحة والعافيه وطولة العمر وربنا مايحرمنا منك ياغالي وانشاء الله دائما في سعادة وهناء يارب

العزيز عزالدين حسن سلام واحترام واشكرك جدا على لدعواتك الصادقة واتمنى لك اضعافها وانا سعيد جدا بتواجدي بينكم
.
.
واهدي لك البسمة ادناه

ود خشني السبعيني مزنوق

شايل الموبايل في جيبه ولابس نضارة قليدة

دخل المستراح اتشمر قوم يا الموبايل اقع جوة الحفرة

عاين ليهو النضارة برضو وقعت جوة الحفرة

قام قال

انعل ابو دي خرية

هههههههه ههههههه ههههههه ههه

ود البوش

ود النعمة
سلام

يا ود البوش عليك الشيخ الطيب إنت من وين ياخ ذات اللغه وذات
البشر وذات الأفعال تسود عندنا وتتسيد فالذى لفت نظرى لهذا البوست سرفه
الضحك حتى وقع به على قفاه وعندما وقف على رجليه هاتفنى مخبرا بهذا
البوست فأحدهم من إندنا جاء لعمه الذى يلعب الكنكان فى الصالون
وثلة من الأهل والأصدقاء يتحلقون لتلك اللعبه السخيفه فإذا
بالعميكه يأتى لعمه مناديا أمام الخلق أنا بدور بتك فلانه وكانت
فلانه تنظف فى الحوش من الخارج فقال له عمه هديك فلانه أمش أسعلها
فداس الأبنص وظبط صوت الكوز وأنطلق حتى فرمل بجانبها وقال لها يا
بت أعمى أنا بدورك وكلمت عمى ووافق رايك شنو فقالت له والله
إياك ود أعمى ومانى عزيزه عليك والله أنا بدور أقرأ فذهب مكسوفا
للصالون جالسا فى صمت رهيب وعندما جر عمه الخمسين وإشتعل الصالون
ضحكا قام وخرج ليبصق السفه وعندما عاد رأى إبن أخيه العميكه
فسأله أها بنت أعمك قالت شنو?? يا عمى قالت بتدور تقرأ لكن أنا والله
أمشى الشيخ حسن إلا أجيبا بى جناها ويقولون عندنا فلان مشى الشيخ
إشترالو بقره بى جناها أها دوق لبن عمايكنا يا ود البوش وقل واحد




عبدالمجيد ودنورالدايم راجل حكيم وصاحب نظره وحكمة لله وهو كبرى على أى زول
وقريب أى زول لكن ساخر جبد أساتذتنا الكرام أها مره قال الداير الله يملأ
وشو فى الضان اليديهو عميكه والله صدق حين قال أم رشوم عندها تلاته عمايك
ورواعيتا أربعه وود خالى الجضيع عندو عميكه وضانو يغتن عين الشمس والسمانى
ود عمير الضان رهاب رهاب وود مديحى عندو إتنين عمايك تقول يا دقر من ضانو
إلا المرفعين الليلنا مسوى لغبو اللحمر دا والمرفعين إسم قفر ساكت وما عندو
ضان برد المويه وبشتغل طيانى!!



ود الصح ملعون خلاس وزول دفق عندو زى ظراط الحمير وما بتلفت لها أها مره
البحر قام والكهرباء قطعت والمواسير يبسن من عدم المويه والناس قالو
نكحل بير ود مرتاخ دى أها الناس منزبره فوق البير ونزلو اللطرش جوه
ينظف والنا تنشل أها ود الصح قال لود راهون العميكه عليك الله أمش
ناس اللصم ديك جيب لى مويه بارده أها العميكه دخل شرب لى روحو أتنتحلو بى
جك وشاف حقة اللصم فوق التربيزه سوالو سفه زى التبانه وأنجدع فى الكشاشه
مع اللصم أها بعد ما قيل طب مرق على البير أها ود الصح طوالى جرالو السرى
قالو يا ود راهون المويه وينا ود راهون قالوا ناس اللصم ما عندهم مويه
فقال له ود الصح والله يا وراهون إنت ما أظنك جيت بى السبيل إنت جيت بالردميه.


ونواصل


منصور

هاى بوش مبدع بجد ضحكتنا كتير
لو سمحت من اى البلاد انت؟