حكايات حبوبة
هذا البوست مفتوح لحكايات أولئك العظيمات الشامخات نخلا ...الحبوبات
المحبوبات .. ففي حكايهن الدروس والعبر ... يلا
كل من يحفظ حجوة يحجينا ...
حكت لي حبوبتي شامة بت الزين حكاية خلدت في ذهني
...قالت لي : كان زمان في مرة عرسها راجل غني عندو الواطة والعربات والمراح لكن بخيل بخل شديد وماعندو شغلة بناس الحلة .. إن
حصلت وفاة حدو الفاتحة بس وسارح ومشغول مع حقو وكانت السنة سنة مجاعة والراجل دى عندو مخزن كبيييير ..
لى الدقيق والشرموط طابلو فيهو يطلع ليها كل يوم حبة حبة قدر أكلى وشرابا ويمشي
مع مراحو الخلا وما بجي إلا باليل .. وتقوم المبروكة تسوي الأكل وترسل منو لناس أبوها
وتقول ليهم ود الحسن قال لي سوي الأكل وديهو ناس أبوك .. وتدي الجيران باسم راجلها
ود الحسن .. وإن حصلت وفاة تجيب قدحها وتكورك هوي ياجنى تعال شيل الأكل دى ود
الحسن تعبان مع مراحو وقال نسوي القدح ونجيبو للضيوف ..يرد عم أحمد الله يخدر
ضراعو ودالحسن راجلاً كلس واصلو قدحو ماتأخر في السنة الشديدة دي .. وإن جو ضيوف
للحلة تجيب المبروكة الأكل باسم ودالحسن وسبحان الله كراع الشرموط وكورة الدقيق
الله يبارك فيها لمن تفضل . أها الحلة مرقت من السنة الصعبة دي بالسلامة الحمدلله
وقالوا نسويلن حفلة كبيرة وعزمو الناس وكان ودالحسن أول المعزموين ..قال لمرتو :
الحلة دي جنت ولاشنو ؟ أنا مالي ومالهم شافوني يوم واحد مرقتو عليهم .. قالتلو :
كدي أنت أمش عليهم الليلة وكتين عزموك وانبسط وفرق شوية .. وطلعت ليهو العباية
والمركوب والعمة والشال والعصاية الماخمج ... ومشى ود الحسن يتقدل ..ولما أتفرقو
الناس جاها ودالحسن وقال ليها : إتي الحلة دي فيها ود حسناً غيري ؟؟ قاتلو : لا لا
في شنو .. قال ليها : الحلة كلها تتكلم بود الحسن وقدح ودالحسن وجود وكرم ود الحسن
أول حاجة قلت إلا كان زولاً تاني إلا أبوك كان فرحان شديد وبفتخر بي ويقول دى
نسيبي وبعدين شيخ الحلة في كلمتو شكرني شديد والنسوان يزغرتن .. والناس دي تقول
تشيلني من الواطة دي شيل .. وأنا راسي دي مشطوب ... قالت ليهو : عاد ياود الحسن
أعفى لي أنا من وراك بسوي وبسوي وحكت ليهو القصة كلها .. بكى ود الحسن .. وسلم على
راسها وقال ليها: أنتي ياالمبروكة أعفي لي..
ومن يوم الليلة دى مفاتيح المخزن ودى المراح والواطة وكل الحق دى حقك عافي ليك
لوجه الله تدي تأكلي تبيعي مخيرة ....
موضوع: حكايات حبوبة 
الثلاثاء 1 يونيو 2010 - 9:47
