مسافره خلاسْ !

ونحنَ الدوبنا

يا دوبْ جينا

شايلينْ فى العُيونْ أمطارْ

وجايينْ

من ليالى الشوقْ

ودايرِنكْ تكونى نهارْ

وجيناكْ

قُلنا نبقى سَوا

ونكون للحبْ أهلْ وديارْ

وجيناكْ

شانْ تكونْ ريدتنا

للعُشَاقْ وطنْ ومزارْ

عشَانْ الدنيا

تبقى حديقه

من أطفالْ .. ومنْ أطيارْ

تقومى تسافرى !

شِنْ يَبْقَالنَا

مِنْ بَعْدِكْ

وشِنْ يَبْقَالنَا من أشعارْ !

مسافره خلاسْ !

ولكينْ كيفْ

مُنو البِكرِمْ

مَعَايا الضيفْ

مُنو البِرْكِزْ

معاىْ فى الحاره

فوق القيفْ

مُنو البتحدى فى تَالاَيا

بردَ الليلْ

وحرَ الصيفْ

مُنو السَّوانى

أبقى جميلْ

بَعَدْ ما كتَ زىَّ الطيفْ

بحبِكْ

أيوه يا حليوه

لأنكْ لىْ دُعاشْ وخريفْ

لأنكْ

لىْ وَطنْ جايى

من التاريخْ ... بحدَّ السيفْ

التحية لشاعرنا الفذ سيد احمد الحردلو ولك اخونا محمد الضاوي

ألف رحمة ونور علي الدبلوماسي الرائع سيد احمد
فقد أتحفنا بروائع ودرر في حياته
وتشكر أخونا ضاوي لتسليط الضو علي أعماله الجميلة
باريت لو عندك قصيدة تقول لي شنو وتقول لي منو

رحم الله شاعرنا الكبير سيد احمد الحردلو
فعلاً اخى عزالدين شاعرنا الحردلو من الافذاذ
اخى عادل خيارى لك خالص تحياتى و طلبك مجاب اليوم لنشر قصيدة الشاعر الحردلو
تقول لي شنو وتقول لي منو