كان والدنا رحمه الله قلما يوجهنا توجيهاً مباشراً ففي معظم الأحيان يكون ذلك من خلال قصة أوموقف
ذات مرة أرسلني وشقيقي أحمد للحواشة في مهمة (شوفوا العيش لو شرب أقفلوا أب ستة) ذهبنا وقمنا بالمهمة
تماماً كما قال ورجعنا فأبلغناه ونحن عن نفسنا راضون تمام الرضا فسألنا:إن شاء الله الموية ما دخلت علي حواشة الفادني(رحمه الله)فأجبنا: والله ما شفناها! سأل : أها فولكم ما يكون غرق؟(طبعاً مزروع في نفس الحواشة)
أجبنا: والله ما فقدناه! سألنا:بشرى سقي؟(بشرى ود عبدالله)أجبنا: والله ما عارفين! قال طيب دا كله خلوه قطنكم مشيتوا عليهو فأجبنا بالنفي! فقال: أقعدوا والله بقت عليكم قصة الوزيرالوجيه..ثم حكاها لنا
قالوا كان في ملك عنده وزير من عامة الشعب ذكي ودقيق جداً في شغله لكن أعيان البلد والوجهاء ما كانوا راضيين إنه الوزير يكون ما منهم فقالوا للملك نحن شايفين إنه فلان مفروض يكون هو وزيرك زول وجيه ومن أثرياء البلد ففكر الملك وقال ليهم خلاص مافي مشكلة زولكم دا ح نبقيهو وزير لكن بعد ما نمشي رحلة ترفيهية وتكونوا إنتو وهو معانا ففرح القوم وتأهبوا للرحلة في اليوم الموعود وتحرك الجمع وعند وصولهم لغابة بعيدة سمعوا صوت (جريوات)نادى الملك على وزيره القديم أنزل يا فلان شوف ديل جريوات كلب ننزل ولا جريوات أسد نمشي؟ ذهب الوزير ثم رجع وقبل ما يتكلم الملك قال للوزير المقترح أمشي إنت يا فلان شوفن فذهب وفي غيابه سأل الملك وزيره لقيت شنو؟ أجاب جريوات كلب ياحضرة الملك رجع الاخر وقال نفس المعلومة وانبسط أصحابه فسأله الملك كم جرو؟ اجاب والله ما حسبتهم
أرجع أحسب رجع وفي غيابه أجاب الوزير سبعة عادالاخر بنفس المعلومة فسأله الملك ألوانهن شنو؟
:والله ما عارف
أرجع شوف في غيابه أجاب الوزير أربعة بيض وثلاثة حمر رجع الاخر بنفس المعلومة وساله الملك مغمضات ولامفتحات؟
والله ما لاحظت
أرجع لاحظ أجاب الوزير في غيابه خمسة مفتحات رجع الاخر بنفس المعلومة وسأله الملك أناتي ولا ضكور؟
والله ماعارف
أرجع أعرف أجاب الوزير واحدة إنتاية رجع الاخر بالمعلومة وسأله الملك الحفرة لينة ولا ناشفة
والله ما عارف.....ز
وعرفنا أن من يرسل في مهمة ينبغي أن يكون تقريره كاملاً شاملاً من أول مرة
اللهم أرحم والدينا واغفر لهما كما ربياني صغيراً
موضوع: التربية بالحكمة 
الإثنين 19 يوليو 2010 - 19:28
