محمد الطيب ابراهيم كتب:

الاخ ود هنونه
اولا الغياب سببو بط النت وانت عارف النت سوداني تشتري ساعه يدخلوك النت بعد سله روح
وجبنا نت زين قالو سريع وانا وعثمان بنوصيك قبل د.خالد مايجي جهز لينا موبايلات نوكيا حديثه مع وصلات للنت وبعاك اسالنا

حبيبنا ودالطيب ياخوي انت ماعارف الملح بشق اعمل حسابك
لكم مني كل الود

تاني علاء السني فقدناه ياربي الزول ده يكون الجنوب اتفصل وبقى مع الجنوبيين وقاطع الشمال حتى عبر النت
نتمنى عودتك يابطل

وين ولدنا علاء الصديق الخليل
الزول صاحب التوقيع الجميل
كن جميلا ترى الوجود جميلا
اظهر لتجمل لنا صفحات المنتدى

ولدنا الزبير محمد علي العبيد
طال غيابك لعل المانع خير

العامريات
ام نعيم
وام مؤيد
ياربي يكون طارق المامون فزع بيهن لموسم الطماطم والشطة ولا شنو
نتمنى عودة الثنائ ليشع الابداع من خلال مواضيعكن الهادفة

ياجماعه زول يأتر لينا الصادق ودأبوشنب
الزول ده فجاة اختفى ان شاءالله المانع خير

الدكتورة ناهد
لاحس لاخبر
ياسيد حسن الناس دي لسه مضربة ولا شنو

طارق مامون كتب:

الأخت رشا الكناني ..
من فترة وماسمعنا صوتك أذا جاز التعبير . انشاء الله المانع خير .. ورمضان كريم عليكم أجمعين

ياسيد طارق الغريبه الزولة ديي انا لميت فيها حايمة في منتديات برة برة وكتبت ليها وقالت جاية لاهي ولا ايهاب
يكون مالهم الاتنين متفقين علينا ولا شنو

مسرة علي
طبعا يكون البت بقت مسؤلة كبيرة في الحكومة ونست المنتدى
ياعوض الله ماتشوف لينا الحاصل شنو

عادل خياري كتب:

العامريات
ام نعيم
وام مؤيد
ياربي يكون طارق المامون فزع بيهن لموسم الطماطم والشطة ولا شنو
نتمنى عودة الثنائ ليشع الابداع من خلال مواضيعكن الهادفة

والله يا عادل دي زي ما بقولو الجماعة قلبت فيها الهوبا بس ما بتاعته مهند الطاهر

-- العارفو انا المدينة ما فيها طماطم بس فيها بلح وتمر ونعناع و الطائف ورود وزهور وعمك طارق الاتنين ماليهو فيهن هو زول شطة بس ---

الأخ الحبيب ابو الطيب
الأخ الحبيب هيثم

نفخر نحن ابناءالعوامرةبالطماطم والشطة وليس هنالك ما يخجل .. فهي من ثقافتنا .. ومكوناتنا .. وشخصياتنا .. وهي فعلا مواسم للأفراح .. ولها نعشق ونعتز ..
أما عن سؤالكم عن الأختين ام نعيم وأم مؤيد .. فهما بخير .. فضلن متابعةالمنتدى من بعيد ولماما .. وربنا يكفينا ويكفيكم شر الفزع الأكبر ..
وتصحيح للمعلومة يا أخ عادل ..
الفزع( هو النفير ) ولكن دائما تطلق على لم الحطب وليس حصاد الطماطم والرطب والنعناع والتمر والزهور والورود ..

عادل خياري كتب:

وين ولدنا علاء الصديق الخليل
الزول صاحب التوقيع الجميل
كن جميلا ترى الوجود جميلا
اظهر لتجمل لنا صفحات المنتدى

شكرا الغالى عادل خيارى
أول حاجه أنا زعلان
قلت لى عوض صلح لى اسمى
البقى زى العشره جنيه النمرته ناقصه
أنوم وأصحى القى أسمى ناقص
بكون خليتو باب المنتدى فاتح
جاء كديس خمش باقى الاسم
وبقى مارق
يعنى بعد شويه القى نفسى مافى
كان تلقو كن جميلا ترى الوجود جميلا
تعدلو الاسم ولا اجى بى اسم تانى
اجهجه ليكم عبد الرحمن فى البحث فى عمك قوقل
مجددا لك التحيه ربان سفينه المنتدى
أنشاء الى بر الامان

بلال مامون
مالك جافيت الناس
عليك الامان يلااظهر وبان

الأخ حسن إسماعيل

طولت الغيبة إنشاء الله المانع خير ..

الأخ محمد نور محمد أحمد

لك التحية . ،

منذ فترة طويلة ماشفناك . إنشاء الله خير ..

طارق مامون كتب:

الأخ حسن إسماعيل

طولت الغيبة إنشاء الله المانع خير ..

حبيبنا طارق
تحيه من القلب للقلب
والله اشتقنا لصوتكم
نحن في اتم الصحه والعافيه
واعتذر بشده لعدم ابلاغكم لانني الان خارج السودان
في مدينه بكين
ولكم العتبي حتي ترضو

ياعادل خياري سلامات _ _ _ظروف الشغل خارج الهدي جهجهتنا شويه _ _سوف نعود ويعود المريخ ماردا _ _ويرجع الموج لي جحروا

عثمان الشريف كتب:

ياعادل خياري سلامات _ _ _ظروف الشغل خارج الهدي جهجهتنا شويه _ _سوف نعود ويعود المريخ ماردا _ _ويرجع الموج لي جحروا

يا عثمان عودا حميدا وكيف الأخبار وكل الناس عساهم طيبين وتامين ولامين والشبكة كيف في الهدى النت ميه ميه ولا زي الجماعة ماشي بالبركة وحجاج نيالا

ياجماعة صاحب هذا البوست
وسيد الراكوبة وسيد الناس
وبسال دائما منهم
الليلة سؤالنا عنو

ود الشريف والله مبسوطين بعودتك
اكتر انبساطة من شريف ندى
قلنا الزول ده كتر منالجزر
لدرجة انو غلبوا يقوم لانو حسب كلامك بهدي الاعصاب
لكن ده هداك على الاخر
تعال ومعك كل ايام الغياب تحمل مواضيع واراء تغفر لك غيابك
منتظرنك

الدكتور صاحب المبادرات والذي يحمل الهدى في حدقات العيون
دكتورنا خالد ارباب
واحد يجيب لينا خبرو بي تلفون بعد الساعه 9 الاتصال مجان

جنابو الصادق ودابوشنب
مازال مكانك بيننا شاغرا
واحد يتبرع بي تلفون محلي
ويدينا اخبارو عسى المانع خير

التركى
وين اظهر

هيثم ال _ _ _سلامات _الهلالاب يجدعوا ساي في البلد _ _ _ _ _ _ _ _عادل خياري _د _خالد ارباب كان متوعك شديد والحمد لله تمام هسي ونحن متلومين شديد مااديناكم خبر _كنا بره الشبكه

سلام ودالشريف الشريف
حمدا لله على الظهور والذي ادخل البهجة في نفوسنا وريح هيثم شوية من مناكفة الجماعه كانوا هارينوا كويس انك ظهرت بعد ماكملت الجزر لو تقدر على جماعتك الهلالاب ديل مع انو الايام دي سمهم فاير

اقتباس :

عادل خياري _د _خالد ارباب كان متوعك شديد والحمد لله تمام هسي ونحن متلومين شديد مااديناكم خبر

التحية لود الارباب وقول ليه سلامتك وفي ميزان حسناتك طهور ان شاءالله
لكن ياعثمان كدى عاين لود الارباب دي بتذكرك حاجة الارباب دي ؟

الناس ديل وين؟_عاصم الطيب_حمزه عبدالله_عبدالله شريف(المؤذن)__والناس ديل إختفوا فجأه_محمد عبدالقيوم_الفاضل علي_حسبو الخزين_السرالدسوقي_أحمد الشريقاوي_الصادق الشريقاوي__زياده طلاتك بقت متباعده أنشاءالله عافيه_مسره وين؟ كباشي_محمداحمدعبدالرحمن__ياناس أمرقو جاي

جنابو الصادق ود ابوشنب
تم الاتصال به الان في الخرطوم وهو بالف خير ويغريكم السلام
ومشكلتو انو الجهاز عطلان ووعد انو يتواصل معاكم دون انقطاع

الغالي ود الياس سيد الجلد والراس
وينك انت ياشاب الناس تسال منك
واتصل بك عدد من الاخوان بعد ان تعزر الاتصال بك من هنا
فاتصل بك من خلال مكالمتي به الاخ طارق المامون
ومرة اخرى الاخ ابومحمد زيادة
ياريت تطمنا عليك

صلاح الشيخ

اين انت يا رجل ؟ لعل المانع خير ؟ والله افتقدناك كثيرا وتعليقاتك الممتعة .. سمعنا تحت تحت انك مضرب .. وما دايرين نقول ليك كلمنا هيثم عشان ما تشاكلو .. ياخ تعال راجع .. وانت من زمن الإضرابات والله بمبان وااااحد إلا يجيبك !!

حمزه عبد الله

ما ظاهر تب !! وتلفوناتك مقفولة .. خير انشاء الله

الذين رحبنا بهم ولم يظهروا

لو سمحتوا رجعوا لينا تراحيبنا ..!!

وليد التلب كتب:

الذين رحبنا بهم ولم يظهروا

لو سمحتوا رجعوا لينا تراحيبنا ..!!

وليد سلامات ما ظهروا و لا ما ردوا التحية؟؟؟ , حقو نغني ليهم أغنية عائشة الفلاتية عنى مالو ا صدوا و إتوارو خلى سراج يغنى وانا وانت و محمد طيب كوورس , ولو جابت حقها نشتغل حفلات فى أفراح أفراح ....

السيد ود عبدالرحمن النجومي ابووائل
وام وائل
وينكم المنتدى يناديكم

ياعادل يا خياري وينك انت

الأخت ام ضحى واسرتك الكريمة

نسأل عن غيابكم .. وإنشاء الله المانع خير ..
نتمناكم طيبين وجعلها الله عليكم عشرة مباركة ..

الاخ وليد كمال طولت الغيبة اين انت ؟؟

ابو شيبة

اظنك حردان راجى الموبايل لسه

عثمان الشريف

نسيبك قالوا مضرب !! انت مالك؟؟ متضامن ولا شنو؟؟ ياخ بعد يصلكم بالسلامة تعالوا سوا وفكو ا الاضراب

اتروا محمد طيب ياجماعة الزول دا من امس العصر مسكتو ام هلاهلا .. لحدى هسى ما ظهر .. اوع يكون جاتو ام برد !! .. نادى الاتحاد قريب ليهو شيلو منو كاس السيد جلال.. واحد يوديهو ليهو امكن يفتح شوية يفتكرو كاس الكونفدرالية..

وين الاخ الطيب محمد احمد الزول الانيق صاحب الكتابات الانيقة .. لعل المانع الشبكة ؟؟

استاذ مضوى غيابك طال الحاصل شنو؟؟ .. ولا الخروف خرب الميزانية

كل الغائبين
انتم حضورا فى الوجدان .. بس ما تعملوها ظااااااهرة كدا

يا ناس عوووووووووك
وين وليد التلب
ليهو كم مختفي ان شاء الله الداعي خير
أظهر وبان وعليك الأمان

يا جماعة وليد كمال وينو
راح ولا شنو
فتشوا عليهو وادونا خبر

يا جماعة وليد كمال وينو
راح ولا شنو
فتشوا عليهو وادونا خبر

اشكرك استاذ صديق كثيرا
انقطعت عنكم لايام .. وكم انا فى شوق اليكم .. وسر الانقطاعة هو الذهاب للهدى لاداء بعض الواجبات !! وها قد عدنا

يا خواننا سراج دا وين ؟؟ الزول دا يتاوق ويمنعنا المتاوقــــــــة !!

لا ضحوة جابتو .. لا ضهرية مرقتو .. داير يطلبوهو ولا شنو ؟؟