عدل بى راحتك ونحنا بنعدل معاك
والبنلاقاها عديلة كان قلتا نقلبا بنقلبا
بس اوعا ............نقول ليك قلتا الكبرى من وين لى وين

كتر خيرك و



[ندعوك للتسجيل في المنتدى أو التعريف بنفسك لمعاينة هذه الصورة]

عبدالرحمن مدثر كتب:

(1)
الصورة دى مقلوبة .. ومن الصعب نعدلها .............!!!

ما عندك خيارات دى صورة صعبة
انا ما عندى شغلة بالسياسية لاكين كنت بنادى
بى حزب الهدى وإنو مفروض ناس الهدى
اكونو يد واحدة
يعنى الصورة دى ما بتعدل حتى لو بالتمثيل النسبى
رايك شنو فى التشريعى نجى ننزل ( انت وانا ومن حقنا )

عبدالرحمن مدثر كتب:

(2)

الصورة دى ممكن تتعدل .. لكن بمجهود مضاعف

طبعا المشكلة هنا كلها فى النهضة لانو اكتر فريق عندو جماهير
تعجب وعندهم ولاء غير عادى للنادى وعندهم غيرة حلوة
ولكن للاسف معكوسة بى صورة سئية جدا
الحل الاكثار من المباريات الودية وانو الناس تحاول
تمرق من اطار الاندية الضيق وتفكر فى اطار الهدى الكبير
ليه الهدى ما اكون عندها تمثيل فى الممتاز.

اولا نقول للاح العزيز والشاعر الرقيق والكاتب الكبير والعديل ابو تلاته دبابير اخونا وحبيبنا عبدالرحمن عبدالقادر مدثر (ابو مزن) الف الف مرحبا وبمسهماتك

ألف مرحبا بك قلما جسورا وهذا ما نحتاجه وبوست صور مقلوبة من أقوى البوستات واصل ومن خلال النقاش واستفزاز مسببى الصورة المقلوبة سيكون الناتج تعديل هذه الصور
احييك على هذا الطرح المتميز

عوض خيارى كتب:

عبدالرحمن مدثر كتب:

(2)

الصورة دى ممكن تتعدل .. لكن بمجهود مضاعف

طبعا المشكلة هنا كلها فى النهضة لانو اكتر فريق عندو جماهير
تعجب وعندهم ولاء غير عادى للنادى وعندهم غيرة حلوة
ولكن للاسف معكوسة بى صورة سئية جدا
الحل الاكثار من المباريات الودية وانو الناس تحاول
تمرق من اطار الاندية الضيق وتفكر فى اطار الهدى الكبير
ليه الهدى ما اكون عندها تمثيل فى الممتاز.

والمشكلة الاكبر فى الطبقة المتعلمة المنوط بيها التغيير
دى بدل ماتعمل على التوجيه بتصب الموية فى الزيت
ويظل حال البلد واقف
والنتيجة مؤلمة لوتعلمون
شباب فى مقتبل العمر تحيط بهم العطالة من كل اتجاه
لاتنفيس لطاقاتهم ..
وفى النهاية تجدهم على ظهر الترع بالامسيات يتعاطون مالايحمد عقباه

فتح الرحمن عبدالله كتب:

اولا نقول للاح العزيز والشاعر الرقيق والكاتب الكبير والعديل ابو تلاته دبابير اخونا وحبيبنا عبدالرحمن عبدالقادر مدثر (ابو مزن) الف الف مرحبا وبمسهماتك

الفنان الحريف ابوضحى
تحياتى
وزمان كان التركى يفعل العجب وهو يمتعنا
من خلال معشوقة الجماهير
اها جاء دورك من خلال متعة اخرى على هذه المساحات
وماتنسى معاك ودالكنانى

محمد احمد الياس كتب:

الجميل عبدالرحمن مدثر،الصور المقلوبة كثيرة كما ذكرت،وإذا تفكرنا بتأمل نجد انها جميعها ترجع الى تصلب البنية الثقافية فى المجتمع وعدم قابليتها للاكتساب ،وهذه مشكلة كبيرة تجعل مهمة تلاقح الافكار بالغة الصعوبة ،لان الناس عندنا يعتبرون انهم الاصح والافضل فى كل حاجة ،فى حين اننا لا زلنا بعيدين جدا ،نحن ننظر لجيلكم يا اخ عبدالرحمن لتقودوا دفة تلقيح الافكار وتفتحوا دائرة الحوار لتظهر تلك السلبيات جلية وواضحة للعيان وتتم المعالجة على مهل ،ليصبح مجتمعنا مقبولا ،والدار بكاتلوا فيها اهلا ،الف مرحب بيك قلما شيقا ،رائعا ،ممتعا ومفيدا

الحبيب ودالياس تحياتى
منكم ناخذ البوصلة ونصل للاتجاه الصحيح
من خلال تراكم تجارب وزيادة معرفة
حديثك هذا باعتبار ان الناس عندنا دائما هم الافضل والاصح
بتجربة كانت لرابطة الطلاب كنا وقتها نحلم بتحقيق افكار جديدة
كانت هنالك فكرة زفة الخريج من خلال سلاح موسيقى ونقل الفرحة من الجامعات
الى وسط شوارع الهدى
كانت الفكرة تستحق الوقوف عندها
تذكرت احد القدامىوهو (يسد نفسنا ) بكلمات قاسية باعتبار ان الفكرة لايمكن تحقيقها
لانهم هم الافضل من خلال الدورات الطلابية ولم يقدروا عليها
فقامت الفكرة من خلال عزيمة واصرار وهما السلاح لتحقيق كال الامنيات

صديق الماحي كتب:

ألف مرحبا بك قلما جسورا وهذا ما نحتاجه وبوست صور مقلوبة من أقوى البوستات واصل ومن خلال النقاش واستفزاز مسببى الصورة المقلوبة سيكون الناتج تعديل هذه الصور
احييك على هذا الطرح المتميز

صديق الماحى (سيد السوق)
رايك شنو ياحبيب نشوف حجم تطلعاتنا وصل لوين
ونحن جوووه السوق
طبعا جاءت الكهرباء للهدى وبقت احلامنا اكبر من الاعمدة ذاتها
بقينا نحلم بمصانع حتى مكانها تم تحديده بالقرب من نمرة مكتب شندى
والسوق يبقى سوق عالمى وكبير
من خلال الصناعات الكبيرة والصغيرة
انت عارف الحاجة المؤلمة وين
تمخض (السوق ) فولد (مصنع تلج )
حل محل طاحونة ودالنمير
التقول نحن ناقصين كسير (تلج )

ودمدثر سلام ودي من الصور المعدولة انو الواحد يلاقي ناس كان الظن من المحال ملاقاتم ومش كده وبس وتتواصل ارواحم وتتسالم حتي الفكره مع الفكره ودا المفقود بين الناس والصور جوانا محفوره وبنعدلا ان الله مد في العمر

ضى المصابيح البعيدة اتعب عويناتك وانطفى
الحبيب ودمدثر والاخوة الاعضاء الرجاء استمرار هذا البوست ومااكثر الصور المقلوبة فى هذا الزمن الاغبر
دمتم بصحة وعافية

سلامات ابو مزن
ممكن نعدل الصوره نقعد في الواطه ونخلط الفريقين ونقلب الصوره
ونقسمن علي اتنين ويبقي المشجع محتار من يشجع كدي انقلبت
عليهو الصوره وتتقدم الكوره

التحيه لك وانت لاتستسلم وتحمل سيف الجهاد بضراوه واحيي هذا البوست الرايع جد
اولا بخصوص ممثل للهدي في البرلمان بمستوي الوزير او حتي الرئس نفسه لايحتاج مؤهل و اوراق وليس كل المنتخبين ولاءة .اذا المهم ان يكون ممثل الدائره مننا وهذا يقف علي وحدتنا فالهدي ثقل لا يمكن الاستهانه به اذا اتحد اهله فلابد من شباب جادون واهل احترام في نفوس العامه لربط الوحده لابد من التكاتف والتكافل في وضع الامل في التغير متنحين عن العصبيه القاتله متجهين الي منفعة الوطن الصغير وياليت لو يدلو الكل عسي ان نجد تعديل هذه الصوره

بخصوص الرياضه اوافق الاخ محمد الطيب
بس بي صوره اكبر كل فرق الهدي تدمج ويعاد توزيها وتغير اسماؤها
او يتم تطعيم الفرق من بعضها حتي نفقدها هويتها ولا يكون اي الفرق يتبع لقبيله او حي
والله هذه مواضيع لابد من ايجاد الحل الامثل لها
الهم وفقنا علي ذلك
دمت يا ابا مزن

العصبيه ياحبيب اول وباء في المجتمع ولا استثني الهدي يعني الرؤيه بالعاطفه بغض النظر عن اي مبررات تانيه ويظهر جليا في السياسه مما نتج عنه التعصب وعدم الاعتراف بالاخر... ونتاج هذا كان تلاشي نقطه الحوار والنهايه واضحه امامنا...

من يترشح يترشح باسم دايره وليس المنطقه الذي منها دايره الهدي باكملها مسوليه مرشح الدايره بغض النظر عن هل هو من الهدي او من جوبا ودي صوره مقلوبه تانيه

اخي الحبيب الاستاذحسن
اختلاف الوعي السياسي بين الدول باختلاف مفهوم وادراك شعبها وكل ذلك له كبير الاثر في مدي تقدم هذه الدولة التي هي حتما لا تمثل سودان اليوم
اوافقك الراي بان السودان شعب واحد لكن له اختلافاته السياسيه فمن الغير متوقع مرشح من الشيوعيين ينتخب في يومنا هذا في منطقه ذات ثقل ختمي
وهذا الحال في بقية الامثله لهذا الحال من الافضل اذا الاماني تتحقق وحسب التجارب الماضيه التي اتاحت الفرص لابناء القرى المجاوره حين غفلة وشتات ابناءالهدي.
نتمني ان يتحد ابناء الهدي لنيل ذلك المقام
والحق المهضوم.
لا اريد تسيس الموضوع واتمني ان اجد هذا الوطن الذي يحمل لك مرشحيه وسام الوطنيه واللون الاخضر الذي يعني المرور والسلام والذي يتيح لملوال ترشيح نفسه في دنقلا
وعلي علمي التام سوف يقول الفرد منهم صوتي امانه لن امنحه الا للبستاهلو

عندما تمر بأحدهم كل يوم وتراه كل يوم وتألفه ويألفك ويكاد كتفك بلامس كتفه ولا تنبت شفاك او شفاه بالسلام عليكم عندئذ اعلم يقينا ان الصورة اضحت مقلوبة

صورة مقلوبة هنا فى المنتدى دة
معانا ناس اعضاء من الهدى فى امريكا
لم ارى حصر ابناء الهدى فى امريكا فى بوست حصر ابناء الهدى فى الخارج

الاخ ابو مزن
في صورة الرياضه انا اوافق كلام الاخ بلال مامون
وتحدثت كثيراً مع قدامي الاعبين بعمل خليط من جميع الانديه
وتقسم علي اربع فرق ..النصر ..التضامن ..السهم بذكرنا باخونا الحارس العملاق
ودالياس وفريق الوفاق والانديه تكون اجتماعيه وثقافيه حتي يستفيد منها شباب
الهدي وتنمي ثقافتهم وازالة العصبيه ولم اجد اذن ساقيه لهذا الموضوع حتي نعدل الصوره

كباشى خيارى كتب:

ودمدثر سلام ودي من الصور المعدولة انو الواحد يلاقي ناس كان الظن من المحال ملاقاتم ومش كده وبس وتتواصل ارواحم وتتسالم حتي الفكره مع الفكره ودا المفقود بين الناس والصور جوانا محفوره وبنعدلا ان الله مد في العمر

]]ودخيارى الكبير فكرا ومضمونا وانتماء

معاك اكيد الصورة بتكون زاهية بدليل مدد نيالا

ودموع الانتماء الاصيل

معك ومع البقية سنجتهد فى اصلاح كل الحاجات المقلوبة

ونعدلها

صلاح الشيخ كتب:

ضى المصابيح البعيدة اتعب عويناتك وانطفى
الحبيب ودمدثر والاخوة الاعضاء الرجاء استمرار هذا البوست ومااكثر الصور المقلوبة فى هذا الزمن الاغبر
دمتم بصحة وعافية

ياودالشيخ ياحبوب

مادايرين نقول

عدى فات زمن العيون .. والالفة .. والحضن الملاذ

ورهافة الحس البلون ضحكة الناس العزاز

وبعد الحنان الكان زمان

استوطنت حاجات تانية ماحلوة

صورة مجهولة المعالم

ولوحها يرتشها الضباب

لكن موش انتو قاعدين

بوقفاتكم

بتاملكم من اجل حياة جديدة

اكيد قافلة الامنيات ستحط رحالها عندنا

وياتينا المطر

محمد الطيب ابراهيم كتب:

سلامات ابو مزن
ممكن نعدل الصوره نقعد في الواطه ونخلط الفريقين ونقلب الصوره
ونقسمن علي اتنين ويبقي المشجع محتار من يشجع كدي انقلبت
عليهو الصوره وتتقدم الكوره

ابوريان يااصيل

ذكرتنى واحد صاحبى (كبكااااابة ) ايام الجامعة كان ينادى
بانه بدلا من وجع القلب مفروض البنات ديل يختوهم فى كباية واحدة
ويخلطوهم بالخلاطة زى عصير المنقة وبجقمة واحدة ينتهى ليك من عذابات السنين
الخلطة كويسة .. لكن التعصب بظهر فى الخلطة ذاتها زى لما طمبل يجيب قوون مع الفريق
القومى الهلالاب بقولوا بااااايخ

اهلا بالظريف القامة،والشفيف الشامةفوق الخد النايرة دليل وعلامة،فقد طرقت امرا جلل ويحتاج لمراجعة خطوط كثيرة دفاعية وهجومية ووسطية كمان،فقبل ان نجاهد الاخرين فى ايجاد مكانة لقيادة من الهدى دعونا نتفق فى داخل البيت (اهل الهدى نفسهم) وننتخب قائدا او إثنين أو ثلاثة ونقدمهم امامنا فى كل المحافل ولا نرضى بغيرهم حينها سيعرف الاخرون ويحترموا خيارنا،وهنا يأتى السؤال هل هناك من يملأ هذا الفراغ حقا،علما ووعيا؟جيل اليوم يبدو لى لا تلبى طموحاته جودية الاختيار من كبار السن وذوى الإرث ،الامر يحتاج لذوى العقول المفتوحة الذين يضعون مصلحة البلد والمجتمع غاية قصوى،اقترح على الشباب تدوير القضية فى داخل احياء الهدى وفتح الحوار مع المواطنين لوضع تصورا لقيادات الغد المشرق،واتمنى ان نخطو للامام اخى عبدالرحمن من خانة الصفر الكبير المتنح على قولك ،الى خانة موجب واحد وليست سالب ثلاثة،لك التحية ولنكن على تفاؤل ولكن مع العمل

صلاح الشيخ كتب:

عندما تمر بأحدهم كل يوم وتراه كل يوم وتألفه ويألفك ويكاد كتفك بلامس كتفه ولا تنبت شفاك او شفاه بالسلام عليكم عندئذ اعلم يقينا ان الصورة اضحت مقلوبة

الحبيب ود الشيخ اهلنا العرب بقولو(السوس انخر فى العود الندايتو تخر واخوك كان اباك تديهو الحلو ابصق اقولك مر)

بلال مامون البشرى كتب:

التحيه لك وانت لاتستسلم وتحمل سيف الجهاد بضراوه واحيي هذا البوست الرايع جد
اولا بخصوص ممثل للهدي في البرلمان بمستوي الوزير او حتي الرئس نفسه لايحتاج مؤهل و اوراق وليس كل المنتخبين ولاءة .اذا المهم ان يكون ممثل الدائره مننا وهذا يقف علي وحدتنا فالهدي ثقل لا يمكن الاستهانه به اذا اتحد اهله فلابد من شباب جادون واهل احترام في نفوس العامه لربط الوحده لابد من التكاتف والتكافل في وضع الامل في التغير متنحين عن العصبيه القاتله متجهين الي منفعة الوطن الصغير وياليت لو يدلو الكل عسي ان نجد تعديل هذه الصوره

لك التحية حبيبنا بلال نطقت بالمطلوب

ونظرت للمستقبل نظرة امل وتفاؤل من خلال مستقبل هذه المدينة

نحتاج لفكر يسمو على الاختلافات .. ويضمد جراحات التشتت وضياع الامنيات

حتى مساجد المدينة اضحت عرضة لهذا الاختلاف وذلك بسبب التركيبة الاقصائية

لاهلنا الكبار ..وبسبب النظر للامور من زاوية واحدة

تعالوا نشيل العصبية للقبيلة او المعتقد او الحزب

الصورة اكيد بتتعدل

ياودمدثر
ابقاك الله زخراً للوطن
وللهدي
الصور المقلوبة في الهدي كثيرة
وطرق واليات تعديلها ماصعبة دائرة ارادة وحسم وعمل جاد واحساس بالصورة بشكلها القديم والمعدل
ورونقها وجمالها
ولكن دعني انقاش معك
بعض النفس الذي ان خرج في صعداء
سيكون له اثار سلبية وربما كارثية
وهوالانحدار المريع للانتماء والتجزية والتبعيض للكتلة الواحدة التي تسمي الهدي
بالمفهوم الواسع المعنوي والتاريخي كمنارة لبقية القري من حولها والمفهوم المحلي حيث الهدي الجمغرافية والهدي الوحدة الادارية والهدي المحلية سابقاً والهدي الرئاسة لاثمتل الهدي من الهداية الي معايش
وانما الهدي الانتماء هي المنطقة جغرافياً وتاريخياً وسياسياً..
فاي انسان من قري الهدي عندما يسال من وين انت ؟؟ يقول من الهدي دون تردد؟
ومع ذلك يطيب لنا التحدث عن الهدي المركز بشي من الخصوصية دون الدخول في تناقض وتجزئة واستقطاب مع ريف الهدي المنتمي روحاً للهدي
وان نمليها مذيدا من الاهتمام لذات الخصوصية المحورية
اتفق معك
قد غابت الشخصية الكارزمية التي تتصد للعمل العام باسم الهدي كمركز سوي السيد:عبدالله بركات مترشحا لمنصب الوالي وغاب التنسيق مما جعل بعض ابناء الهدي يبحثون عن ملء الفراغ ولكن كانت النتيجة تؤكد ان الهدي غير معزولة عن ريفها
اما ان حملة حزب الامة ومرشحه
صحيح هو من العقدة ولكن مرشح الحزب للمجلس التشريعي الولائي كان من حي التعاون عمنا بشري عثمان محمد
في الانتخابات الاخيرة
كان هنالك حراك سياسي في العقدة افرزه الموتمر الوطني لوجود شخصيات كرئيس القطاع وشيخ الامين ونشاط الشيوعيين و للمراة
وتجفيف العمل السياسي في الهدي مسئول عنه الحزب الحاكم بالاساس
ومع ذلك حزب الامة اقام مؤتمراته بالهدي وقدم اربعة مناشط لحملته من الهدي ندوتين ومسيرة ولقاء جماهيري
وهذه الصورة
لم اقل انها عديلة ولكنني لاراها مقلوبة
فحزب الامة مطالب بعمل كبير في الهدي
ويجب ان تكون مساهمته فاعلة ورائدة
وهنالك قصور بلاشك في التعاطي مع كل قضايا الهدي
عندي مقترح
مانمسك صورة صورة نوضبها وبعد داك نشوف البعدا
فما عدا ذلك
اتفق مع كل ماجاء به الاحباب المشاركين في هذا البوست
ولك تحياتي
ودالامين

صورة شافع لابس سفنجة وهدوم المدرسة وشنطة في الواطة والكرعين ممدودات وكرتونة بسكويت مطبقة تاكل عليها يكتب الشق زمان يجيب الضب اسي يمرق الكديسة ، الشافع كان بلمو زال وقلمو كتب يكتب شنو في المسؤليين والناس اجمعين

زول فتش فتش وسأل سأل ورسل مساهمتو للنفرة وزول قريب لليلة ماكشكر ولاقال حاجة ولاوجع ساي ماتوجع ، رايكم شنو في الصورة دي دايره شنو؟

غايتو ياعزيزى الرائع عبدوش
الصور المقلوبة كثيرة وتحتاج الى تضافر الجهود
وزى ماقلت نخت الكورة واطة ونبدا فى الحل من اسع قبل ما تكتر الصور المقلوبة
فنراها عديلة او يصعب علينا التحديد
هل هى عديلة ام مقلوبة