ﻣﻨﻮ ﺍﻟﻘﺎﻝ ﺍﻟﺴﻌﺎﺩﺓ ﻗﺮﻭﺵ؟
ﺻﺤﻴﻨﺎ ﻋﻠﻲ ﺯﻣﻦ ﺗﺎﻧﻲ
ﺯﻣﻦ ﻭ ﺍﻟﻠﻪ ﺟﺪ ﻣﻤﺤﻮﻕ ..
ﻭ ﻻ ﺯﻭﻝ ﺑﻔﻘﺪ ﺍﻟﺘﺎﻧﻲ
ﻭ ﻻ ﻓﻴﻬﻮ ﺍﻟﻔﺮﺡ ﻣﻠﺤﻮﻕ ..
ﺯﻣﻦ ﻧﺴّﺎﻧﺎ ﺭﺍﺑﻂ ﺍﻟﺪﻡ
ﺩﺧﻠﻨﺎ ﻋﻠﻴﻬﻮ ﻗﻠﻨﺎ ﻧﺮﻭﻕ ..
ﻟﻘﻴﻨﺎﻭ ﺩﻳﻤﻪ ﺯﺍﻳﺪ ﺍﻟﻬﻢ
ﺑﺒﻴﻊ ﺣﺘﻰ ﺍﻟﻀﻤﻴﺮ ﻓﻲ ﺍﻟﺴﻮﻕ ..
ﺯﻣﻦ ﻣﻤﺤﻮﻕ ..
ﺯﻣﺎﻥ ﻛﺎﻥ ﺍﻟﻮﻃﻦ ﺃﻧﻀﺮ
ﻭ ﻛﺎﻥ ﻛﻞ ﺍﻟﻌﺸﻢ ﺗﺮﺑﺎﻝ ..
ﻳﻠﺒﺴﻮ ﺗﻮﺏ ﺭﺑﻴﻊ ﺃﺧﻀﺮ
ﻭ ﻳﺴﺘﺮ ﺑﺎﻟﻘﻠﻴﻞ ﺍﻟﺤﺎﻝ ..
ﺯﻣﺎﻥ ﻛﺎﻥ ﻛﻞ ﺯﻭﻝ ﺭﺍﺿﻲ
ﻭ ﺃﻗﺼﻰ ﻣﻨﺎﻫﻮ ﻟﻘﻤﻪ ﺣﻼﻝ ..
ﻭ ﻫﺴﻊ ﻳﺎ ﺯﻣﻦ ﻓﺎﺿﻲ
ﺑﻘﻴﺖ ﻣﺎ ﺑﺘﻔﻬﻢ ﺇﻻ ﺍﻟﻤﺎﻝ ؟ ..
ﺯﻣﻦ ﻣﻠﻌﻮﻥ .. ﺯﻣﻦ ﻣﺤﺘﺎﻝ ..
ﻣﺒﺸﺘﻦ ﻭ ﺷﻴﻦ ..
ﺗﻘﺎﺑﻠﻮ ﺗﻐﺸﻚ ﺍﻟﺒﺴﻤﺎﺕ
ﺗﻔﺎﺭﻗﻮ ﺗﺸﻮﻓﻮ ﺑﻲ ﻭﺷﻴﻦ ..
ﺣﻠﻴﻞ ﻳﺎﺑﺎ ﻭ ﺣﻠﻴﻞ ﻳﻤﻪ
ﻭ ﺣﻠﻴﻞ ﺯﻣﻨﺎً ﻋﻠﻴﻨﺎ ﺣﻨﻴﻦ ..
ﺣﻠﻴﻞ ﺣﺒﻮﺑﻪ ﺳﻘﺘﻬﺎ ﻭﻳﻦ ..
ﻋﻴﻮﻧﺎ ﻣﺮﺍﻳﺔ ﺍﻟﻘﻤﺮﺍ
ﻭ ﺩﻣﻮﻋﺎ ﺑﺘﺮﻭﻱ ﻋﻄﺶ ﺍﻟﻄﻴﻦ ..
ﻗﻠﻴﺒﺎ ﺍﻟﻄﻴﺐ ﺍﻟﺪﻓﺎﻱ
ﻭﺷﻴﺸﺎ ﺍﻟﻤﺎ ﺑﺘﺸﻮﻓﻮ ﺣﺰﻳﻦ ..
ﻭ ﺻﻮﺗﺎ ﻛﻤﺎ ﺍﻧﺴﻴﺎﺏ ﺍﻟﻨﺎﻱ
ﺣﻠﻴﻼ ﺍﻟﺪﻳﻤﻪ ﻣﺎﻟﻴﻪ ﺍﻟﻌﻴﻦ ..
ﻫﻴﺎ ﺍﻟﺰﻣﻦ ﺍﻟﻌﻠﻴﻨﺎ ﺃﻗﻴﻒ
ﺩﺣﻴﻦ ﻗﻮﻝ ﻟﻴﻨﺎ ﻭﺍﺻﻞ ﻭﻳﻦ ؟ ..
ﺣﻠﻴﻞ ﺍﻟﻠﻤﻪ ﻭ ﺍﻟﺠﻴﺮﺍﻥ
ﺗﺸﻮﻓﻨﺎ ﻋﻠﻲ ﺍﻟﺒﻴﻮﺕ ﺧﺎﺷﻴﻦ ..
ﺑﻨﻔﺮﺡ ﺩﻳﻤﻪ ﺑﺎﻟﻀﻴﻔﺎﻥ
ﻧﻘﻴﻒ ﻧﻨﺪﻩ ﻋﻠﻲ ﺍﻟﻐﺎﻳﺒﻴﻦ ..
ﻧﻘﺎﺳﻢ ﺍﻟﻠﻘﻤﻪ ﺭﻏﻢ ﺍﻟﺠﻮﻉ
ﻣﻊ ﺍﻟﻔﻲ ﺍﻟﺪﻧﻴﺎ ﺣﻈﻮ ﺿﻨﻴﻦ ..
ﻧﻘﺸﻘﺶ ﻣﻦ ﻋﻴﻮﻧﻮ ﺩﻣﻮﻉ
ﻭ ﻛﻨﺎ ﺑﻼ ﻗﺮﻭﺵ ﻋﺎﻳﺸﻴﻦ ..
ﻭ ﻣﺒﺴﻮﻃﻴﻦ ..
ﻣﻨﻮ ﺍﻟﻘﺎﻝ ﺍﻟﺴﻌﺎﺩﻩ ﻗﺮﻭﺵ
ﺷﻨﻮ ﺍﻟﺨﻼﻧﺎ ﻧﺎﺱ ﺗﺎﻧﻴﻴﻦ ..
ﺃﺧﻴﺮﻟﻨﺎ ﻧﻨﺴﺘﺮ ﻳﺎ ﻧﺎﺱ
ﻗﺒﻞ ﻣﻴﻌﺎﺩ ﺭﺣﻴﻠﻨﺎ ﻳﺤﻴﻦ ..
ﻧﺴﻤﻲ ﻭ ﻧﻄﺮﺩ ﺍﻟﻮﺳﻮﺍﺱ
ﻭ ﻻ ﻧﺸﻴﻞ ﻫﻢ ﻧﺠﻴﺐ ﻣﻦ ﻭﻳﻦ ..
ﻧﺴﺎﻧﺪ ﻛﻞ ﺯﻭﻝ ﻣﺤﺘﺎﺝ
ﻧﻤﺪ ﺍﻟﻠﻘﻤﻪ ﻟﻠﻤﺴﻜﻴﻦ ..
ﻧﻜﻮﻥ ﻓﻲ ﺍﻟﺤﺎﺭﻩ ﺟﺪ ﺃﺧﻮﺍﻥ
ﻧﻘﻀﻲ ﺣﻴﺎﺗﻨﺎ ﻣﺘﺼﺎﻓﻴﻴﻦ ..
ﻧﻌﺒﻲ ﻗﻠﻮﺑﻨﺎ ﺑﺎﻹﻳﻤﺎﻥ
ﺃﺧﻴﺮﻟﻨﺎ ﻣﻦ ﻧﻌﻴﺶ ﻣﻴﺘﻴﻦ ..
ﺧﻼﺹ ﻛﻤﻞ ﺍﻟﻜﻼﻡ ﻭ ﺍﻟﻘﻮﻝ
ﻭ ﻋﺬﺭﺍً ﻟﻮ ﻛﻼﻣﻲ ﺣﺰﻳﻦ ..
ﺣﻼﻭﺓ ﺍﻟﺪﻧﻴﺎ ﻃﻴﺒﺔ ﺍﻟﺰﻭﻝ
ﻭ ﺍﻟﻒ ﺳﻼﻡ ﻋﻠﻲ ﺍﻟﻄﻴﺒﻴﻦ

بقيت شاعر يا دكتور والله تمام روعة
لكن يا خوى الزمن مظلوم معانا الزمن ياهو نفس الزمن
الحاجة الما بتقدر تقولها انت ولا غيرك هى ان تكتب بدل الزمن نحن
نحن الممحوقين
نحن اولاد اللذين
نحن اللذين نمارس كل هذه التفاهات
نحن الانضمينا الاصرار والترصد لاكبر قروب في الدنيا قروب كبر مقتا
لا تظلم الزمن يا حبيب وقول لينا للاعور اعور في عينه
لا تشتم الزمن بل اشتمنا نحن فنحن نستاهل كل شتيمة كلنا من كبيرنا لى صغيرنا

تشكر يا ابو وحيد علي اامرور والتعليق
الزمن اصبح كده مافي فدان للجيران ولا التواصل الاحباب
حتي لو اخوك رحل منكم بعيد الوصول ليهو كل عيد او مريض
ولا تلفون . حليل لمه الجيران في العصريه والقهوه .