أهلنا المزارعين الشايلين هم الغير والسعيه والطير_ _ عوافي
‏*‏ المخازن الكانن بتملن عيش وقمح_الليله مليانات لمبات جاز قديمه وكرعين بنابر_(وابقوا عشره علي البنابر)

‏*قانون ٢٠٠٥ الحكومه رفعت إيدا والبنك الزراعي نزل بجماعتو و(شبير شد)

‏*موية العين السالت علي مشروع الجزيره هي المحتاجه لي مؤتمرات ما مياه النيل(كان مساح دمع البكا حي_كان بكا)

‏* نسألكم من الخير_أولاد القناطر وين؟

‏*‏ ال نسمع لي زول يقول عندي حقوق في مؤسسة مزارعي الجزيره والمناقل(بقطع ضنبو)

شكرا ليك علي الموضوع
والله لا جاب ليها قطع ضنب
لكن دحين بدور اسالك
انت الضنب( بضم الضاد والنون) دي مش انواع
يعني ضنب البقره مازي ضنب الفار
يعني بس لو تورينا انت تخصصك في ياتو ضنوبه في ديل
ههههههههههههههههههه
دمت
تقبل تحياتي

‏*‏ الجنابيه الكانت بتجيب موية البوقه والترده_ياربي مابتنفع كمينه؟(سؤال إستثماري)

‏*‏ القنطره كانت عامره_ فيها ست التسالي والراجين البص وسفع الكمبو وغنماية الكراكه أم دلو

‏*‏ جملة أولاد الجزيره الكانوا إتوظفوا في المشروع سته وسابعهم من نهر النيل_ _هو النيل دا بودي وللا بجيب؟

ياحبيبنا ود الياس شكرا علي المرور والزاكره المعفره بالبرجوب ومسنوده بي جنكابه عودا عديل_المشروع يامحمد بقا زي الديك الرقباني راسو مكسي والرقبه عريانه_

‏ ‏* في علاقه بين الخطه الخمسيه والدوره الخماسيه وقانون ألفين وخمسه ؟ وللا دا كلام الخمسه ورقات؟

‏*‏ السيد المفتش كان مصدق إنو سيد بخلاف درجتو الوظيفيه

‏*‏ مشروع كحيله _واحد من مشاريع سد مروي_الجا يكحلا عماها_ _بتبدلو الحاضره بالغايبه):؟

‏*‏ التنميه واقعه شمال بس_الارض دي ميلت وللا إنتكت؟ النيل زاتو مامقتنع بقا يرجع ورا ورا

‏*‏ {كلام دقندي}_كنا بندنقد لي أولاد البلد_الشغله حتجيب أجانب

‏*‏ المصريين إستصلحوا الصحرا_ونحن نصحر المستصلح_كان هم بنوا الإهرامات_عماره دنقس دا كان مدنقس راسو؟ماعمل حضاره وتاريخ؟ أرفعوا راسكم ياناس

حسن إسماعيل شكرا علي الطله وشكرا عربت إسمك _مابعرف أتعامل مع المشفرين_بعدين ماتنزعج للضنبه_عاجبني الضب_ مابقطع ضنبو إستهبال_لانو الضنب لايحتمل_فمابالك بالازيال البشر؟

اخونا سراج ركاب السروج
سلام من هنا لي هنااااااااااااااااااااااااااااك
سرد جميل ماكنت عايز ادخل لكي لاافسد السرد
ولكن الكيبورد ابى عديييل الا يدخل حروفو دي
عجبتني حكاية المصريين استصلحو الصحراء ونحن نصحر المستصلح
واصل وبرضو جاييك تاني

‏*‏ لو حسنا للمزارع كورة العكاره_بدل الارض حيخصب يورانيوم

‏*‏ ياحليل عربية المفتش البنضفوا ليها الشارع

‏*‏ البلد الولدت سيف حمد وأبوعركي والديبه _ياربي مابتلد تفاح وعنب؟

‏* زمن الناس بحفرو المطامير الفار شايل كورتو يشحد_الليله الفار يخزن ونحن نكسر بالملوه

أهلا عادل _يعجبوك أولادك_من باب الجمره بتحرق واطيها_نحن من أرض الواقع بنعكس ليكم جملة الاحوال_أفيدونا بالراي السديد والخبره
شكري لاتحده أمات ستات ولا اللبق الكبار

سلام سراج
جاى تسال من اولاد القناطر
هو برا اولاد القناطر المصيبه
وين زمان تدقوهم وتاكلو فطورم
وتورمو فشفاشم وقايلنهم نسو
اها كبرو وبقو ----وجوكم
لكن فعلا المشروع وقفه وشجاعه
لكن نبدا من وين
المساهمة مكتوبة بقلم كباشي خياري

أهلا مسره_أولاد القناطر الداروها سووها الكلام الهدي المدينه بها أكثر من ٨٠٠مزارع _ماعندنا ولاملود تمثلنا في إتحاد المزارعين الفرعي_والمبني في الهدي_الوجع راقد ومسئوليتكم مضاعفه_

الاخ سراج ..
الوجع راقد ..
سمح الصبر .. وكعب السكات
التحيه لك بكل نسمات الهدي من ترعة الهداية لي ترعة معايش

[quote="سراج الدين الفاضل"]أهلا مسره_أولاد القناطر الداروها سووها الكلام الهدي المدينه بها أكثر من ٨٠٠مزارع _ماعندنا ولاملود تمثلنا في إتحاد المزارعين الفرعي_والمبني في الهدي_الوجع راقد ومسئوليتكم مضاعفة

ابو مهدي سلام ..انا مالي ومال بوستات الركانة ..تلقانا في بوستات النور والمدارس والمرأة والقصة والكلام الحلو دى
لكن البتجي من السما تحملها الواطة ..نعلم أن المسئولية صعبة ربنا يقدرنا على شيل كل حمول الهدى سوا سوا انشاءالله
ودى كباشي.. طبعاً الجاهز واحد .. وقبل مايعملي خروج دخل رد عليك ونزلت المساهمة باسمي

يامسره ماتنزعجي ونحن أبناء الجزيره لوماناقشنا مشاكل المشروع يبقا نحن ماعندنا إرتباط بالارض والوطن والحق المطلق_وأتمني أن بوست )بين الضحوه والضهريه( يكون حجر في بركة أبناء الجزيره الساكنه_ _الموضوع هم وليس ركن نقاش _أو موضوع إنصرافي_ _وبعدين إنت المرأه القياديه التي نحلم بها _فليكن مشروع الجزيره أحد إهتماماتك_لك التحايا

أهلا أم ضحى_ضحوتنا كربت _والمطره شالت_دايرين البشيلو الشيله_شكرا علي المرور_النسمات البتجي من ترعة معايش شتا_أصبحت صقيع_والبتجي من ترعة الهدايه خريف أصبحت كتاحه وغبار_ _راجين منك الكتير وإنت في أم الدول أفيدينا بكل جديد_ والجمره بتحرق واطيها

‏*‏ الشايلاه سفريات الدبلماسيه يزرع البلد دي زيتون_ زي المغترب سنتين وجا بالدين

‏*‏ شركة مواصلات الجزيره _حوش فاتح علي مقابر ودمدني_الشركه ميته وينتهي العزاء بإنتهاء مراسم الدفن__البركه في ودبدر وفينا وفيكم

‏* الجيمي تكس_إستراحة مؤسسة مزارعي الجزيره والمناقل بالعاصمه_إرتحنا والعفنه طارت

‏*‏ إتحاد المزارعين دا لو إتحاد طلبه كان بكون عندو راي___مرق عمم ساكت

‏*‏ حاجه غريبه أعضاء الإتحاد كلهم عندهم دقاقات_أها بعد دا إلا كان دايرين يدقونا نحن

‏*‏ إتو بركات دي مالا لي جوه كدي والمشروع لي جاي! زي الزول الداير يحسب قروشو

‏*‏ بص رحلات لاسر الموطفين والعمال_نحن ماقلنا وقفوه ولا إتكلمنا عن الرفاهيه_بس جريدة مشروع الجزيره البتتوزع علي الاقسام والمكاتب_المزارعين ديل مابشبهوا القرايه؟ يدفعوا بس؟

‏*‏ في الاخر سعيتنا بقت جداد_ومرحات البقر عند الافنديه__جوا لقاط وبقوا ضباط

‏*‏ الناس ديل دايرين الزول الحواشتو بايره يسجلا في الزواج الجماعي_المأذون واجد والزيجات هبطرش_ _يعني ضربة معلم

‏*‏ تعويض الملاك_الواطه تبقا ميري_ مادايرين زول يكون عندو حجه قانونيه_)المدفونه بتكسر المحرات(
ياناس أصحوا

‏*‏ كبير نقابيي مشروع الجزيره_أكل اللحم ورمى العضم_والان يتلمظ لوجبه جديده::التاكلو ينفعك::

الحواشة بى كم ؟؟
ومشروع الجزيرة ماهى آخر أخباره؟
والبوست لذيذ يا لذيذ

الخواجه الخطط المشروع لوعلمنا معني الوطن ماكان قلعنا السكه حديد ولادمرنا البنيات التحتيه)إتو الخواجه دا مسلم؟(

‏*‏ أمرين أحلاهم مر_يانمشي الغرب ندنقد أرض هناك' مالقينا ارض ندنقد فصيل مسلح_يانمشي سد مروي مفتشين وأفنديه
والمابتسدا يتقدا

‏*‏ إتحاد المزارعين_ _)أبا ديكو محمر(

‏*‏ بين ضحوة باكر وضهريتو كان حيين بنناغمكم

ودالماحي مشتاقين_وألله المشروع ماشي نص بدال زي عجلة الحاج سعيد_غفرا مافي صمد مافي إنتاج مافي كورة عكاره ساي مافي_تحياتنا لكم بقدر لهفتكم علي البلد

حاجة تحير وغريبة فجاءة كدا وبدون مقدمات وبين ضهرية وضحوتها المشروع ماشي يشلع والترع تشقق والوضع فعلا فيهو شغل وترتيب اما لعودة المشروع سيرتو الاولي اوالنهاية المحزنة

تشوف القناطر والسكة جياد والدريسة والمكاتب وحجر البيوت والمخازن نقول الله يكضب الشينة ومن ناحية التركترات الجديده والكراكات اللوج والات اول مرة اشوفا نصدق انو في امل اخضر جاي مع زرقاء اليمامة

الاسفنج بزرعو وين
وجع الضهر من شنو
الحش الناس خلتو
مسعول من الخير
السنة دى مالك ماك
زارع

شيخي كباشي _لمست الداء_وبعض الداء يحتاج كي بالنار _)مابنفع التخدير ولا الطبطبه( شكرا كباشي لتفاعلك_وهيا نبدا التغيير

شيخي كباشي _لمست الداء_وبعض الداء يحتاج كي بالنار _)مابنفع التخدير ولا الطبطبه( شكرا كباشي لتفاعلك_وهيا نبدا التغيير

أستاز عوض الله _ياحليل المرتبه أم خيدرانه _وجع الضهر ياعوض مالا قين البطلق ضهرنا_يعني ضهرنا أعوج

الحبيب سراج..
حملت السراج ليضئ العتمة..
سراجك الذى حملته نهارا..لتبحث عن الحقيقة..
الحقيقة الوحيدة..والتى لا جدال فيها..
استهداف المشروع..
الجزيرة التى سدد ت مديونية بناء الخزنات
لما الانجليزطلعوا وقالو دايرين حقنا
الجزيرة التى سددت بناء ميناء بورتسودان
وسددت بناء سكة حديد السودان
وسكة حديد الجزيرة
وسددت تكلفة قيام المشروع
وسددت بناء كل المؤسسات الحكومية
القائمة..المشروع الذى ينفق على الجامعات
والمشروع الذى كان الروح لجسد السودان
الذى كان قبلة لكل اهل السودان
وحتى الدول المجاورة
الارض لن تشيخ وارتباط المزارع بارضه
كارتباطه بابناءه
واستهداف المشروع اسبابه
لا تخفى على احد لانها الجزيرة
كانت الخرطوم التى تسعى لمنافسة الجزيرة
فى كل شئ
كان اول السودان دائما من الجزيرة
عبد الخالق الامين محمد الفضل من السديرة
جاء اول السودان
فى دفعتنا جاء محمد المبارك الطاهر ثانى السودان
وهو من الفريجاب..
فى الكورة الجزيرة تصدر اميز الاعبين
الفاضل سانتو..سنطة ..حمورى..الاسيد
سامى عزالدين..عروه..وحمزة الطيب
ابراهومه المسعودية
حمورى اخوان..دامبة..فتح الرحمن سانتو
صبحى..كندورة
والقائمة تطول..
الفنانين
الاستاذ محمد الامين
والاستاذ ابوعركى
والاستاذ مصطفى سيد احمد
وقبلهم الكاشف
ومحمد مسكين
وعصام محمد نور..وسميه حسن
ونجود
والقائمة تطول
نميرى تربى فى الجزيرة ودرس بحنتوب
البشير من الجزيرة
واهلوا موجودين
عبد الرحيم ابو كان شغال فى الهدى
ابراهيم شمس الدين..
وداد زوجة الرئيس
الدكتور كمال ابوسن
بدر الين طه ..عبد الوهاب عثمان
والدكتور سيف الدين حمد..والبروف مالك حسين
والبروف الزبير بشبر طه وهم من متخذى القرار
انا احى الحبيب كباشى والتخريمة بتاعت اولاد الغفراء
هى دى الحقيقة..ما محتاجة لاخصائى نفسى
لتحليلها..لماذا..تعض اليد التمد ليك
ولا الحسنة فى المنعول زى الشراء فى القندول
وهل جزاء الاحسان الا الاحسان..
ام ان السكن فى القناطر كان مؤلما
وولد الغبن..وحاجات تانية
بالعكس القناطر كانت تتمتع بافضل الخدمات
والغفير نفسه كان وضعوا احسن من المزارع
ولما نجى نشم الهوى بنمشى القناطر
مالها القنطرة عيبها شنو
دى كان فيها تلفونات..
ولا ده جزاء سنمار
قال تعالى ..ولا تقلهما اف ولا تنهرهما وقل ربى ارحمهما كما ربيانى صغيرا
ما يحدث للجزيرة هو العقوق بام عينه..
زما ننتظر الصرف عشان الخيرات بتجى من المكتب
كل الطيبات..وكمان القروش
هسى المزارع بقى يودى القروش للمكتب
اضانك بوين يا جحا..
والباب البجيب الريح سدو واستريح
ولانها الجزيرة اصالة وحضارة
وبدا منها نادى الخريجين..ما بدا من الخرطوم
خلى المناطق التانية..فهى مازالت
صابرة وصامدة وهادئه..وهادئه ..وهادئة
وانا الوم بعض ابناء الجزيرة
الذين..ساهموا فى الوصول بها الى هذا الحال
وهم فى موقع المسئولية..
وسمحوا بتقطيع اوصال المشروع..ومرمطتو
والتاريخ لن يرحم ومافى حاجة بتندس
ويا سراج يا اخوى وباذن الله المركب مهما تلاطمتها الامواج
لن تغرق..لن تغرق..لن تغرق

سراج الدين الفاضل كتب:

أهلنا المزارعين الشايلين هم الغير والسعيه والطير_ _ عوافي
‏*‏ المخازن الكانن بتملن عيش وقمح_الليله مليانات لمبات جاز قديمه وكرعين بنابر_(وابقوا عشره علي البنابر)

‏*قانون ٢٠٠٥ الحكومه رفعت إيدا والبنك الزراعي نزل بجماعتو و(شبير شد)

‏*موية العين السالت علي مشروع الجزيره هي المحتاجه لي مؤتمرات ما مياه النيل(كان مساح دمع البكا حي_كان بكا)

‏* نسألكم من الخير_أولاد القناطر وين؟

‏*‏ ال نسمع لي زول يقول عندي حقوق في مؤسسة مزارعي الجزيره والمناقل(بقطع ضنبو)

هو فضل زول عندو ضنب
قطعوعهن زماآأاااااااان

ياود الفاضل (كان ياماكان في قديم الزمان مشروع سمح وكبير ا)مافرقت معاك حجي بيهو ولدك مهدي قبل النوم

ده عيب السودانيين باكملهم
ونتاج طبيعي عن التربيه القديمه
الحنين للماضي
مابفيد ولا بقدم ولا باخر
لو الماضي ممكن يقدم اوروبا تاريخا كلو انجازات ولكنها تتلفت للمستقبل
لم نسمع باحدهم يقول كنا كذا وكذا
فما بال قومي لا يبارحون محلهم
افيقو ,,,, ايئتو لنا بالجديد من الافكار
ارونا نظراتكم الثاقبه تجاه مستقبل مشرق للمشروع
افيدونا في مستقبل خصخصه المشروع ولمن الفايده

اعكسو لنا ماذا سيكون غدا في امر مشروع هو الاكبر في افريقيا
الا ترون ان سياسه اتجاه المشروع هو انعكاس عاااااااااام عن حاله السياسه في وطني
من عدم تخطيط وعدم كفاءه حتي

ودمتم

لي كم ضحوه مالاقيتكم اهامع الخراب الشفناهو ده وقبال مايجي الجديد المامعروف شنو بعاتي ولاغيرو يابقيناناس عديل يانبقى ناس ؟نعاين للقديم وبركاتكم وكهربتاومويتاوالفواتير والتلفون وعربات المفتشين ومفتشين العربات واسطول الصيانه والورش وحوافز الاداره وادارة الحوافز وشركة الاقطان وجييك وجاك وده كلو البدفعو منو ومن وين

الاخ سراج
لك ودي وتحياتي وحاجات تانية انت عارفها براك
الكلام خش الحوش
وقد هبشت وتر حساس وهم كبير حول مصير قاتم
فالصحة التي تتحدث عنها ام ضحي والمدارس التي ارقت مسره والسوق الذي تسال عنه ودالياس والكهرباء والمياه وغيرها من القضايا التي تبحث عن حلول كلها كوم لان المعني بها ابناء الهدي ويمكن ان تتحقق بمذيد من التعاون والتفاعل والتنسيق .ولكن مشكلة الزراعة والحنين للحواشة بالمفهوم القديم والمزارع ذو الصولة والجولة ومشروع الجزيرة ومالت اليه الاوضاع هم فوق طاقة الجميع (ابناء الهدي) وانما هم عام ومشكلة امن قومي وقضية عادلة تشكو الي الله الضياع مابين البائع والمشتري والضحية الذي لم يحرك ساكن وقبل ايام دعيت لمنتدي اتحاد الصحفيين وكان حول الموضوع وتحدث فيه المتعافي والشريف بدر وغيرهم واكدوا جميعهم رفع الحكومة يدها تماما من المشروع وكلام كثير يفقع المرارة ويورم الفشفاش ...
اليك اخي رائي الذي نشر بصحيفة الصحافة قبل الانتقال للحقيقة :
تحت عنوان: مشروع الجزيرة من الخصخصة الي المنهبة
التحرير الاقتصادي والخصخصة ذلك الشبح المدمر طالت يده اضخم المشاريع الاقتصادية والاجتماعية (مشروع الجزيرة) ضمن سلسلة من الخصخصة والتي تعنى لدينا في السودان (التصفية) والبيع لكل مقومات دولة الرعاية الاجتماعية ليحل محلها اقتصاد السوق المتوحش والمشوه في ظل تراجع دول المنبع عنه والاعتراف بالاخفاق في رفاهية الشعوب وازالة الفقر والعطالة وتحنط النقيض (الاشتراكية) عن التطور وتحقيق جنة الله في الارض التي وعدت بها البشرية ونمو اتجاه عالمي للبحث عن طريق ثالث كمخرج من الأزمة الاقتصادية العالمية، في هذه الاجواء التي تستدعى الحفاظ على مقومات الاقتصاد الوطني وركائز التنمية والعمل من اجل اصلاحها، نجد ان الحكومة السودانية اتجهت للعكس والخلط ما بين الخصخصة والتصفية للخروج بشئ مشوه وصفه الامام الصادق المهدي في المؤتمر الخامس لتحالف مزارعي الجزيرة والمناقل بطيبة (المنهبة) لأكبر مشروع زراعي في العالم وعملاق الاقتصاد الوطني مساحةً وعطاءً وانتاجاً. فنهب مشروع الجزيرة بهذه الصورة ذات عدة مؤشرات بما له من أهمية وتاريخ واعتبارية لدى الشعب السوداني، منها ما هو خارجي يتعلق بسياسة التحرير الاقتصادي وفق رؤية وضغوط البنك الدولي وابراز الهيمنة على مكتسبات البلاد، واشارة واضحة لدعاة الرأسمالية (اننا جئنا بما لم تستطعيوه)، ودعوة صريحة للمستثمرين الاجانب، ولعل الجميع قد لاحظ تعدد مؤتمرات الاستثمار في الاونة الاخيرة والاهتمام بالاجنبي أكثر من المواطن السوداني أما المؤشرات الداخلية فتتجلى في افقار وتشريد المزارعين والعاملين (جزاء سنمار) والاستحواذ على مشاريع القطاع العام لقيادات الدولة لخلق ثروة اقتصادية بهدف التمكين، وهذا تنطبق ايضاً عليه سياسة (جوع كلبك يتبعك) وادخال عناصر جديدة في الصراع السياسي وتغيير الولايات السياسية خاصة والانتخابات على الابواب والجزيرة ثالث ولاية من حيث الكثافة السكانية والدوائر الجغرافية (41 دائرة) ، والتعويل عليها في ترجيح الكفة لصالح الحزب الحاكم وفقه هذا المعيار (الخطاب البطني) لذا كان الاستهداف المنظم لأهم ما لدى أهل الجزيرة ومن خلفهم الشعب السوداني وهو مشروع الجزيرة مصدر الرزق والأمن الغذائي.
فمشروع الجزيرة منذ تأسيسه وحتى نهاية الثمانينات يمثل اليد الطولي لمصانع الغزل والنسيج في أوربا وآسيا وعماد الاقتصاد السوداني اذ يمثل 70% من ايرادات خزانة الدولة، وقد قامت على اكتافه المدارس والمستشفيات والوزارات وجامعة الخرطوم وميناء بورتسودان، وظل يساهم بنصيب الأسد في توفير الأمن الغذائي ولقمة العيش لكافة أهل السودان عندما تشتد الحالة المعيشية وخلق استقرار أمني واجتماعي واقتصادي، فقد صهر جميع قبائل السودان في بوتقة واحدة متجانسة وتدفق انتاجه خيراً وفيراً لكل الشعب السوداني، ووفر عمالة وتوظيفا واستقرارا لأسر العاملين بالمشروع والمزارعين والمتعاملين مع الحقل الزراعي، فوفدت إليه جموع الشعب السوداني من الشمال والشرق والغرب والجنوب، وقدم نموذجا اداريا متميزا اداءً وانتاجاً واتاح بحوثا ودراسات علمية مدهشة، هذه الصورة الزاهية عكستها سياسات الانقاذ الطائشة بتبني سياسة السوق الحر والخصخصة منذ العام 1992م بصورة تستهدف المشاريع المنتجة ، ونحن هنا لا نرفض الخصخصة كخيار اقتصادي، فالمشروع نفسه وضعية العلاقة مبنية على شئ من هذا القبيل 40% للمزارع و40% للشركة السودانية و20% للحكومة واستخراج نسبة للرعاية الاجتماعية، ولكن نرفض السياسات الخرقاء باسم الخصخصة وهذا ما خرجت به لجنة خصخصة المشروع برئاسة د. تاج السر مصطفى (التخلص من البنيات الأساسية واعادة الهيكلة)، وتبعتها في ذات المضمار اللجنة الوزارية برئاسة وزير المالية لتنفيذ توصيات لجنة د. تاج السر مصطفى وذلك بضغط من البنك الدولي ليكون اعداد قانون مشروع الجزيرة 2005م والذي اجيز على عجل ليخدم الغرض، احد المحطات الخطيرة في منهبة خيرات البلاد وفق سياسة البنك الدولي بايدٍ سودانية ليضاف لانجازات الانقاذ ويلحق بقائمة مهزلة التشريد والتصفية لموسسات المشروع (المحالج - المخازن - الهندسة الزراعية - الاتصالات) لصالح التجار والقطاع الخاص (مقاولين ومتعهدين) ، وحلت محلها شركة دال ورونيا والوادي الأخضر والبابونيل ومحفظة البنوك وشركات الترحيل والنقل دون اعتبار لأهل الملكية الذين أسسوا هذه المؤسسات بدمائهم وعرقهم، واكمل بيع المشروع على مرامى ومسمع وفق قانون 2005م والذي يعتبر دساً للسم في الدسم ،فالذي يقرأ اهداف المشروع في القانون وينظر للواقع يجد التناقض البين وما يجري من دمار ونهب للمشروع لا علاقة له البتة بأهداف المشروع، فالقانون غير صيغة التمويل بدلاً من ضمان الانتاج إلى ضمان الأرض ليستهدف بذلك حيازة (حواشة) المزارع، وعمل على تقنين تمليكها للرأسماليين ورفع يده عن كل شئ وترك الحبل على القارب ليواجه المزارع مصيره مع البنك الزراعي، والذي اعطى حق التصرف وبيع الحواشة ،وعمل القانون على اسناد عمليات الري لروابط مستخدمي المياه بدلاً عن وزارة الري وخلق كما هائلا من العطالة لكل العاملين والمتعاملين مع الحقل الزراعي، وذلك بخروج محصول القطن من المشروع ، ومنح المزارع حرية اختيار المحاصيل الزراعية. هذا القانون سبب اساسي في تدهور ونهب المشروع وافقده عافيته فأصبحت حاله أشبه بحال صخر التي وصفتها الخنساء (لا هو حي فيرجى ولا هو ميت فينعى) فهو الآن يحتضر ويعاني من تدهور حاد في بنيات الري مع هدر المياه وتصلد التربة وفقدان خصوبتها وسوء استخدامها وتكاثر الحشائش وتباين وتنوع المحاصيل وتقلص صلاحيات الادارة وانعدام الشفافية والمصداقية والثقة بين المزارع والحكومة وضعف العائد وتدني الانتاجية، هذا الواقع كشفه تقرير لجنة الخبراء التي كونها وزير الزراعة برئاسة السيد عبد الله عبد السلام. وقد أصبح حال العاملين بالمشروع يعانون التشريد والاذلال والهوان وتأخير الاجور والمرتبات التي لم تدفع لأكثر من ثلاثة أشهر وعزف المزارعون عن الارض واصبحوا في هجرة ونزوح للعاصمة والمدن بحثاً عن مصدر آخر للرزق، وقد اجتاحت الولاية وما جاورها موجة كساد عارمة لتصبح الزراعة للتجار لأن كل تمويل العمليات الزراعية على الزراع ومع ذلك يواجه بمشاكل التسويق والترحيل والجبايات. أما عن البنيات التحتية والاصول فحدث ولا حرج فقد بيعت السكة حديد أهم مقومات المشروع (النقل) والتي تقدر بـ 700 مليون دولار فقد بيعت قضبانها وقطاراتها وفلنكاتها إلى شركة جياد بمبلغ زهيد، أما المحالج فقد حولت بثمن بخس إلى شركة أرض المحنة والتي تملكها قيادات من الحزب الحاكم، وأصبحت عمل شهر واحد في السنة نسبة لقلة الانتاج لمحصول القطن. وقد قضت لجنة التخلص من مرافق القطاع العام التابعة لوزارة المالية على جميع آليات ومعدات الهندسة الزراعية بدلالة كبرى وتم بيعها لرجال الأعمال والمقاولين وشرد مهندسوها. وتدهورت قنوات الري بصورة مريعة بفعل تراكم الطمي والاهمال مما اثر على محاصيل العروة الصيفية وقد بنى العنكبوت على التفاتيش والأقسام الزراعية بعد أن سكنتها الحيوانات الزاحفة وتصدعت جدرانها والآن تباشر لجنة فنية من وزارة المالية وادارة المشروع ونقابة العاملين عملها لتمليك المنازل للعاملين بحيث تخصم من سنوات الخدمة اذ تبلغ قيمة هذه المنازل مليار دولار من جملة 13 مليار دولار قيمة أصول المشروع دفع فاتورتها المزارع (المسكين) ، هذا هو وضع المشروع الآن أضف إليه العطش في الموسم الحالي وتأخير الزراعة وقلة الامطار وزيادة التكاليف فالانتاج المتوقع أقل بكثير عن الموسم السابق، الأمر الذي ينذر بنقص حاد في الغذاء هذا العام، هذا الوضع حذرت منه أكثر من جهة (حكومة ومعارضة) (ولا حياة لمن تنادى) مما يتطلب عجلة في تنفيذ توصيات لجنة الخبراء برئاسة عبد الله عبد السلام وقرارات المؤتمر الخامس لتحالف مزارعي الجزيرة والمناقل بالغاء قانون مشروع الجزيرة 2005م ، وايقاف بيع المشروع وممتلكاته (المباني والوحدات الخدمية) وحل مجلس ادارة المشروع واتحاد المزارعين لضلوعهما في المنهبة ومحاسبة كل من شارك فيها… ولإعادة الحياة للمشروع لابد من تمويل كامل للعملية الانتاجية وتأهيل قنوات الري وتدريب عالٍ للمزارعين والعاملين على التقنيات الحديثة وخلق سوق لمنتجات المزارعين ومعالجة أوضاع المعسرين واعادة الدور الاجتماعي والانساني للمشروع، هذه الأشياء ممكن تحقيقها إذا ما تم استغلال أموال البترول لهذا الغرض وتوفرت الارادة السياسية وعين مجلس ادارة بعيداً عن التعيين السياسي بمعيار (الكفاءة بدلاً عن الولاء) ونمو احساس حقيقي بعظمة وأهمية بقاء المشروع والا اتسع الخرق على الراتق وربنا يكذب الشينة.


إن مرت الايام ولم تروني فهذه مشاركاتي فـتذكروني ، وان غبت ولم تجدوني أكون وقتها بحاجة للدعاء فادعولي

من راء ليس كمن سمع ياحسن اسماعيل...........مع محبتي

لكن تمسكنا بهدي النبي والتشبه باخلاقه .مستحيل يكون زي الصحابه الشافوه وعاصروه.....

عثمان الشريف كتب:

لكن تمسكنا بهدي النبي والتشبه باخلاقه .مستحيل يكون زي الصحابه الشافوه وعاصروه.....

اكيييييييييييد مستحيل
لكن عن طريق السمع واحاديث الصحابه والقران كاننا عايشنا العصر
يعني ممكن السمع بس وليس الرؤيه

خصصه المؤسسات رجعت؟ تغير السلم التعليمي رجع؟المفصولين رجعوا؟الساعه رجعت؟مساؤي الحج اتصلحت؟الضرائت نقصت؟مجانيه التعليم رجعت؟ العلاج ؟احلم ياعم وهو الحلم بقروش

ان اى انسان بلا ماضى
هو انسان بلا حاضر وبلا مستقبل ايضا
وبلا هوية.الماضى هو البوصلةالموجهة
من الماضى نستلهم العبر والدروس
هل نسيت اوروبا التى تفخر بها..ماضىها
هل نسىت بريطانيا تشرشل...وحكمها الملكى
امنسى الامريكان جورج واشطن
الم تسمى العاصمة باسمه ويقف تمثاله شاهداعلى التادب الحقيقى..والاحترام..والذى افتقدناه نحن..للجهل والسباحة مع التيار
هل نسوا مارتن لوثر كنج..والاصلاح الاجتماعى
هل نست فرنسانابليون بونابرت
وشارل ديجول..ومتحف اللوفر وبرج ايفل
وماو نسى تونج..فى الصين
وسورهم العظيم
وجوزيف بروز تيتو...وشارل ماركس ولينين
ام هل نسى المصريون الحضارة الفرعونية
والاهرامات..وسر شراء الاوربيون للاثار الفرعونية..والاسلاميه
ام هل نسى المسلمون..صدر الاسلام
والحضارة الاسلامية..التى وصلت اسبانيا
وما زلنا نسترشدونستدل
بهدى سيد الاولين والاخرين
وصحابته الغر الميامين
ونطلق الاسماء تيمنا بهم
كل الحضارة والتقدم الاوروبى الذى تعتز به
مسروق من الحضارة الاسلامية
وما حدث فى القرون الوسطى
هى عصر النهضة الاوروبية
كل النظريات العلمية ترتكز الى نظريات سابقة
تعتبر هى الاساس..
الحلول التى نطرحها لحل مشكلة المشروع
هى ذات الحلول التى طرحتها قوى التحالف الوطنى فى لقاء طيبة الشيخ عبد الباقى