القوقاية للذين لا يعلمونها ,,
هى من التراث القديم وهى آلة صغيرة عبارة عن محلج يدوى لحلج القطن ( النفش ) بطريقة يدوية بدائية
والقوقاية تتكون من عودين على شكل ارجل العنقريب يتم تثبيتهما فى الارض بعد الحفر
ويجرى فى وسطهما سوطين من السيخ فى شكل منفلة والمسافة الصغيرة بين السوطين يتم حشوها بلفافة اكياس حتى لايبقى بيتهما فراغ
وبعد تثبيها تكون فى شكل القون قوائم وعارضة , والسياط لها امتداد بالجنب كبدال العجلة اليدوى
وتثبت كورة ( طليسة صغيرة ) فى الارض لتجمع بذور القطن ( الغلغل ) بعد الحلج !!
وطريقة عملها :
ان تجلس بنتين متقابلات والقوقاية فى الوسط وكل واحدة تمسك السوط بيدها اليمنى , أحداهما تدخل القطن بين السوطين بيدها اليسرى
والاخرى تقوم باستلام القطن المقوقى او المحلوج وتستمر العملية وفى هذا الاثناء يتساقط الغلغل داخل الطليسة المثبتة فى الارض
فى عملية ديناميكية رائعة جدا وجميلة حيث تجلت فيها عبقرية الحبوبات ..!!
واجمل ما يميزها انها تلم الاهل والجيران كلهم فى بيت واحد يتسامرون ويقضون وقتا ممتعا فى الونسة ونفش القطن , حيث يتم نفش كمية
كبيرة جدا يتم بها عمل المراتب والمخدات ,, ومواسم نشاطها مع لقيط القطن
واحيانا تقوم الحبوبة الكبيرة والمصاحبة لجلسة القوقاية بعمل الخيوط من القطن المنفوش بواسطة المترار..!!
وللمترار فزورة وهى ( عملى الملزم يجرى ويتحزم )
والخيط الذى تمت صناعتة بواسطة المترار يتم بيعة فى ما يسمى الكيفة .. !! والكيفة تباع بمايعادل تقريبا قرش ونص وهى تكفى لشراء
مستلزمات القهوة من بن وسكر ودواء وخلافة ...!!
الحياه فى ذاك الزمان الزمين كانت بسيطة جدا ولكنها مفعمة بالمحبة والمحنة
تطرقنا لهذا الموضوع لاجل الذكرى والتذكر والاضافة من الاخوة المعتقين !!
وطبعا ليس من الضرورة ان يتزامن مع اليوم العالمى للقوقاية

القوقاية دي نجرته من وين دي من زمن حبوباتي_ بت حسابو_وست النساء_وطيب الحجاز_وأم المهدي_ وحبوبي أم روف_وبت الكلي_وأنت فايته عليك كانت معاهن _حبوبتي الشالت الطليح كمان ? ولك التحيه من التراث القديم في أمان الله

يا امجد طالما عرفتها وعرفت تاريخها تبقى دى محمدة ... !!

ونترحم على ارواح حبوباتنا المذكورات اعلاه واللائى لم يقصرن حيث تركن لنا
إرثا جميلا ( قوقاية ومترار ومفحضة وسحارة وووو ....... )
وبالمناسبة حبوبتك الشالت الطليح ,, خبرها شنو ؟؟
ما ضربت ؟؟ ,,,,,,,,,,
ولا مسكلت ساى ؟؟

سلام ياوليد .. يامعتق .. بي دهن الحبوبات .. وياله من زمان .. جميل مفعم بالمحبة والمحنة والبساطة قل أن يعود ..
وهي آلة على الرغم من بساطتها .. غير أنها لا تخلو من عبقرية كبيرة .. حيث أنها ساعدت كثيرا في نفش القطن الذي يعد لعمل المراتب للمناسبات الأسرية.. وهي في نفس اللحظة لمة عامرة بالأنس والقطيعة التى لايخلو منها أي مجتمع نسائي .. مع جبنة .. وودع ..
على فكرة هو اليوم العالمي للقوقاية يصادف يوم كم ؟
على ما أعتقد بعد موسم لقيط القطن بي كم يوم كدا !!
لك التحية يا حبيب .. وطبعا هسع تقولي أنا ما حضرتها لكن حكوا لي عنها ..

يا طارق انا حضرتها وكمان قوقيت فيها من باب (الكيور) ..... !!

وطبعا زمان جدى عبدالله ود شرفت له الرحمة والمغفرة كان عندو منسج يدوى لعمل الفراد والدمور والمنسوجات اليدوية ..
وكان كثيرا ما يجتمع نساء الحى فى ذاك المنزل العامر .. وكنت اشهد تلك العملية الجميلة
واليوم العالمى للقوقاية يصادف يوم أن تزكرناها ..
لكن يا خوى ,, بدور أسعلك ,, اليوبيل الماسى للقاشيت متين ؟؟

الاسمها شنو دي ....
بتشتغل بي كهرباء ولا غاز

السر الدسوقي كتب:

الاسمها شنو دي ....
بتشتغل بي كهرباء ولا غاز

لا بالفحم .. بختلوا ليها لداعيــــــات من تحت ... هههههههههههههههههههههها

السر يا السر يا ,,,,,,,,,,,,,,,,, ود القسم

انت عارف نحن كنا زمان بنحسدكم على اكل الرغيف .. !!

,,,, ههههههههههه ,,,,,

لكن ما تقوم تقول لينا اللدايات ديل ذاتهن شنو .......... ؟؟

يا طارق حيرتنا مرة واحد

لدايات وطليسة باقى ليك بس المرحاكا ...!!! لكن السر دا براحة عليهو حاجات ذى دى ما بعرفها .. !!
وكان عرفها ناس القسم بقيموا عليهو الحد ..!!

ياخ مرة ناس السر ديل راحت منهم عجلة ,, والراعى كان مسافر ,, اتفقو يمشوا يفتشوها
السر قال لى تيه ( عثمان) اخوهو الصغير : انا بمشى فريق الحلاوين وانت امشى فريق الكواهلة
عثمان قال : لا لا امشى انت فريق الكواهلة ,, السر رفض وقال ليهو انا اخوك الكبير لازم تسمع كلامى ..
وانا ماداير اتلتلك بسواقة العجلة لانو انا متاكد حا ألقاها فى فريق الحلاوين عشان كدا امشى انت الكواهلة
وطبعا انا عارفو ما داير يمشى فريق الكواهلة لى شنو ؟؟ لكن ما بوريكم ... !!!
أها السر مشى الحلاوين جاب معاهو عجلة وتيه مشى الكواهلة ,, وجنب بيت ناس الضحوية قبض ليهو عجلة جابا معاهو
وبقن فى البيت عجلتين ,, والحل شنووووو ؟؟
السر قال : طالما العجلتين لونهم بيجى بالابيض وبتشابهن ,, انا عندى اقتراح ظريف ( هااااى يجنن ) !!
لمن تجى البقرة الام نفك العجلات للام , , والبتجرى ترضع اول تكون دى عجلتنا
هههههههههههههههههههه
,
,
,
تقول لى لدايات ولى السر ؟؟؟؟؟؟؟

ياحبوبة الله اديك العافية :
والله دايرين الغلغل لى الغنم
والله ياحليل القطن ذاتو.

ياعوض حليل القطن براهو .. ؟؟

برضو حليل الغنم البيأكلن الغلغل .. !!

ياخى الغنم فاضيات من الهجوم على مزارع القرع .. !!

طارق مامون كتب:

السر الدسوقي كتب:

الاسمها شنو دي ....
بتشتغل بي كهرباء ولا غاز

لا بالفحم .. بختلوا ليها لداعيــــــات من تحت ... هههههههههههههههههههههها

طيب يا عموكدا البتاعات ديل بتحرق القطن ...

وليد التلب كتب:

يا طارق حيرتنا مرة واحد

لدايات وطليسة باقى ليك بس المرحاكا ...!!! لكن السر دا براحة عليهو حاجات ذى دى ما بعرفها .. !!
وكان عرفها ناس القسم بقيموا عليهو الحد ..!!

ياخ مرة ناس السر ديل راحت منهم عجلة ,, والراعى كان مسافر ,, اتفقو يمشوا يفتشوها
السر قال لى تيه ( عثمان) اخوهو الصغير : انا بمشى فريق الحلاوين وانت امشى فريق الكواهلة
عثمان قال : لا لا امشى انت فريق الكواهلة ,, السر رفض وقال ليهو انا اخوك الكبير لازم تسمع كلامى ..
وانا ماداير اتلتلك بسواقة العجلة لانو انا متاكد حا ألقاها فى فريق الحلاوين عشان كدا امشى انت الكواهلة
وطبعا انا عارفو ما داير يمشى فريق الكواهلة لى شنو ؟؟ لكن ما بوريكم ... !!!
أها السر مشى الحلاوين جاب معاهو عجلة وتيه مشى الكواهلة ,, وجنب بيت ناس الضحوية قبض ليهو عجلة جابا معاهو
وبقن فى البيت عجلتين ,, والحل شنووووو ؟؟
السر قال : طالما العجلتين لونهم بيجى بالابيض وبتشابهن ,, انا عندى اقتراح ظريف ( هااااى يجنن ) !!
لمن تجى البقرة الام نفك العجلات للام , , والبتجرى ترضع اول تكون دى عجلتنا
هههههههههههههههههههه
,
,
,
تقول لى لدايات ولى السر ؟؟؟؟؟؟؟

اتخيل ولاواحده ما طلعت ياها ....ز ههههههههههههههه
زكرتني الممدد .

يا السر ياخوى انا عارفك بتاع ركشات وكدا

عشان كدا اقدم هدية لتحسين النسل الركشاوى

وهاك

يا وليد قشته طيب هي أقصد قيلته طيب قيشنك و قيش أولادك إنشاءالله قوشين ومقشتين ماقشطين اليوبيل المأسي دي تسأل منو ناس طارق ما تسأل عوض الله أنا شفتو سكن في بيوت المدرسه بعد ماباع القرع قالو عمل ليهو بقرات
‏ ‏ هههههههههههههههههههههه

تشكر علي قوقايتك الجميله

نحييك يا امجد برغم الغيابات المتكررة

والقاشيت دا ,, حوبتو جات ,, وخصوصا مع السقطيبة بتاعت اليومين ديل ..!!

حسن اسماعيل كتب:

تشكر علي قوقايتك الجميله

وايضا نشكرك انت يا sehs على التقوقى الاجمل .. !!

وطبعا حق الايجار يكون الغلغل .. !!

يلا شـــيل قطــنك وخلى لينا غــلغــلـنا ... !!!

يا وليد مساء الخير قلقل قطنا حاجزنو لغنمنا ماتجود بحق الناس كان عندك قلقل غيرو وزعو ماحامينك لاكن قلقل حبوبتي دايرنو أنت ياوليد حقو توزع القلقل حق حبوبتنا الشالت ______
عشان يكون ليها صدقه واجر
ههههههههه هههههههههه هههه

امجد مساء النور

والله حبوبتك الشالت الطليح القدامى دى لو جات تانى
انت اول زول تديك ميدالية برونزية ,, لانك ما نسيتها ,,
ومتزكرها طوالى .. !!
غنمك ديل يا أمجد انت لو مولفهن بالغلغل دا ,, كان يقن شبعانات وفالحات ,,
ما كانن مشن اكلن ريكة عمتك ام سلمة ,, وسراج بعد ما جاء من الضهرية
نام بى جوعتو .. !!

القال ليك منو نام جعان أنامشيت لقيتو يأكل في خاطرو لامن فاتح زرائر القميص

يا امجد كيفك ؟؟

قلت لى لقيتو ياكل فى خاطرو .. !!

اها خاطرو ذاتو اكلو بى ملاح شنوووووووووو ؟؟

اوع تقول لى قروض .. !!