سلام شباب ورمضان مبارك وتقبل الله منا ومنكم واعاننا على ادائه على الوجه المطلوب
جرت العادة عندنا في السودان استعمال هذه الكلمة وهي خم الرماد واستعمالها شائع خصوصا اخر يوم في شعبان
عايزين نعرف اصل الكلمة دي وماتعنيه بالزبط مايجي ناطي لي وليد يقول تضرب المشاوي وام فتفتات وتعمل ليها اخيرا حباسات
هل خم الرماد دي يعني الناس تخم الرماد بتاع النار وماتولع نار تاني بالصباح ولا شنو
طيب مش حيولعوها بالمساء عشان يعملوا الاكل بتاع الفطور والعشاء
ولا استقبال رماد جديد عشان في رمضان بكونوا تعبانين والرماد بكون كتير مابتخم ليهم كلو يخففوه من اسه
نسمع خم رمادكم كيف
وتفسير الكلمة كيف
وطبعا في ناس خامين الجدادة وخامين بيضها
وتصوموا وتفطروا على خير بعد الخم انتهى

اول حاجه رمضان كريم

وتصومو وتفطرو على خير

انا كنت فى طريقى لراكوبه صديق بتاعت الجرسه لكن قلت ماابقى زى حماد

واخم شويه من الرماد .. خم الرماد من منظور ناس كوبار (جيوبهم مقدوده ) فهو انو نفيستك تقع فى كل

باعتبارات انك صائم .. دائر منقه وجوافه وفسيخ .. ودقيق دخن وطابت ودقيق العكار .. اها حتى الصغار

الحلوين بقى يعرفوا خم الرماد بايعاز من تنظيم مضاد ... قبل يومين جاتنى مزونه تنقش تنقش .. وقالت لى

يابابا موش نحن مااااشين نخم الرماد فى امواااج .. ركبت ليك موجه تانيه .. وعملت فيها اضان المفلس

طرشاء .. بجيكم راجع

سلام حبيبنا ود مدثر
رمضانك مبارك وانت ان شاءالله ماتتشارك(مع انو الفطور جماعي ) المهم
والله ليك وحشة عديل كدة وكيف عامل مع القراية ام دق مع انو دي مافيها دق فيها عصر
دعواتنا لك لاتنقطع بالتوفيق يارب ببركة هذا الشهر الفضيل

اقتباس :

يابابا موش نحن مااااشين نخم الرماد فى امواااج .. ركبت ليك موجه تانيه .. وعملت فيها اضان المفلس

طرشاء .. بجيكم راجع

اجيش والله الخم عندكم لكن
منتظرين رجعتك عشان نرجع ليك بالباقي

عادل : جعلك الله من عتقاء الشهر
تطور معني خم الرماد : قيل انه (كما ذكرت) للتخلص من الرماد المكوم من ايام الفطر
و تجديد الكوانين برماد آخر مبارك و من خلاصة عواسة رمضان . . تطور هذا المفهوم
و صار موعدا للقاء المحبوبة و الانس مع الشلة و الاهل و اكل اللحوم و عمل الشيرنق

عبدالرحمن مدثر كتب:

اول حاجه رمضان كريم

وتصومو وتفطرو على خير

انا كنت فى طريقى لراكوبه صديق بتاعت الجرسه لكن قلت ماابقى زى حماد

واخم شويه من الرماد .. خم الرماد من منظور ناس كوبار (جيوبهم مقدوده ) فهو انو نفيستك تقع فى كل

باعتبارات انك صائم .. دائر منقه وجوافه وفسيخ .. ودقيق دخن وطابت ودقيق العكار .. اها حتى الصغار

الحلوين بقى يعرفوا خم الرماد بايعاز من تنظيم مضاد ... قبل يومين جاتنى مزونه تنقش تنقش .. وقالت لى

يابابا موش نحن مااااشين نخم الرماد فى امواااج .. ركبت ليك موجه تانيه .. وعملت فيها اضان المفلس

طرشاء .. بجيكم راجع

ههههههههههههههههههههههههههههههههه
هههههههههههههههههه
ود مدثر
كل سنة وانت طيب
التوارد فى الخواطر
نفس ىاللدغة لكن هنا ما بتدر تعمل اضان المفلس طرشا
مواعد ليك وحيد بى خم رماد فى اسكندرية اسبةع من بداية السنة
وكل خميس شابكنى بكرة الجمعة يابابا ماشين البحر ؟
آخر اسبوع وخاشى رمضان قلت ىالولد دة شكلو حا يخلينى اعييد جوة الموية ونفذت الاوامر
لكن كان خم رماد لذيذ
كان ما اكل العيش كان عيدت هناك

salah كتب:

عادل : جعلك الله من عتقاء الشهر
تطور معني خم الرماد : قيل انه (كما ذكرت) للتخلص من الرماد المكوم من ايام الفطر
و تجديد الكوانين برماد آخر مبارك و من خلاصة عواسة رمضان . . تطور هذا المفهوم
و صار موعدا للقاء المحبوبة و الانس مع الشلة و الاهل و اكل اللحوم و عمل الشيرنق

ما تكمل
وشنو تانى ؟
منتظرين بقارغ الصبر

سلام يااخونا صلاح

اقتباس :

عادل : جعلك الله من عتقاء الشهر
تطور معني خم الرماد : قيل انه (كما ذكرت) للتخلص من الرماد المكوم من ايام الفطر
و تجديد الكوانين برماد آخر مبارك و من خلاصة عواسة رمضان

تشكر على المرور والاضافة

ودزروق سلام تربيع
انت عابر سكة فايت ولا جيت قاصد تزورنا الف مرحب بيط حبيبنا حبيبنا
ياخي والله تغمرنا فرحة وبسمة تتخللها اشواق لشخصك الكريم
وانت جائي مع رمضان الكريم
فالف وترليون مرحب بيك اولا
وبعدين

اقتباس :

خم الرماد كناية عن انو ما فعل شىء ذو منفعة
وينوى ان يبدأ فى رمضان

تشكر على الاضافة والتعليق معلومة جديدة لنج

مرحبا ورمضان مبارك عليكم جميعاً
أخي / عادل خياري
خم الرماد حسب ما سمعت من كبارنا وحبوباتنا إنو في آخر يوم من شعبان تستمتع بكل ما لذ وطاب وكل ما تشتهي نفسك يعني شبع عديل من شهوة البطن والفرج وبكرة تصبح صائم .
وأنا أعتقد خم الرماد تطلق علي الشهوة الفرج يعني تكملا تب مع زوجتك وتغتسلوا تصبحوا طاهرين للشهر الفضيل بإعتبار رمضان شهر صوم مما إعتاد عليه العبد فعله في بآقي شهور السنة الاخرى لذلك تجدهم لا يستطيعوا أنا يقولوا أو ينطقوا بعبارة خم الرماد هذه لانها تمس جانب خاص في حياتهم ( بيستحوا ويخجلوا يقولوها في حضرتنا ) والله أعلم .
مع تبريكاتي وتحياتي . ودبتول

لكم التحية جميعا ..
ورمضان كريم عليكم ..
مفهوم خم الرماد ..هو إمتلاء البطون بمالذ وطاب من الأكل .. حتى الإشباع إستعدادا للصوم ..

ولقد أختلفت التسمية الأخ عادل .. فهنا في السعودية يقال لها ( الشعبنـــة ) وغالبا ماتكون بوليمة كبيرة .. وتمتلي فيها البطون ..
ومما ذكر أعلاه .. فأن خم الرماد هي اكلة وداعية للفطر إستعدادا لشهر الصوم وهي شيء مبتدع ليس له أصل
ولكن وبحكم مجاورتي لبعض الأسر هنا .. فهنالك من يخم الرماد بإن يشتري شربة لتنظيف وتطهير المعدة والأمعاء .. بما علق بها من أكل إستعدادا لشهر الصوم ..

الاخ عادل خيارى سلامات

رمضان كريم ونقبل الله منا ومنكم صالح الاعمال

كل ما ذكر صحيح ..

ولكن الخطأ وللاسف الشديد اصبحت هذه الكلمة عند الشباب اليوم

اباحة المحظورات والمحرمات والوقوع فيها قبل تصفيد الشياطين فى يوم الغد

وخم الرماد تجاوز معناهو البرى والعفوى الى معنى يستحق الضرب فى التانك

بيد من حديد مع الاخ طارق مامون