الغناء يعبر عن الواقع الحالي والمعاش وهو حالة يشعر بها من يكابد شئ معين سواء كان هذا الشئ فرح حُب او موقف بطولي ينم عن بسالة وشجاعه او موقف رجل كريم جواد كالنعيم ود حمد في الكرم والمك نمر في البطولة وودحبوبة الجمع الانصار وفي كتفية ديك كم شبعن صقار
حتى الغناء العاطفي كان يعبر عن الخجل والكتمان ولكن برغم من هذا كان يصل الى الاذان مهذبا منمقا وهل كان ذنبي اذا كنت يوما نسيت الحذر
حبيبة قلبي تفشى الخبر وذاع وعم القرى والحضر
كلمات جميلة محتشمة لاتخدش الحياء بل تطرب الاذن قبل الوجدان
المهم حضرت لي شريط فيديو بتاع عرس فنان اسمو قرقوري قال طبعا انا اول مرة اسمع بيه
لكن مالفت نظر اذني تلك الكلمات التي كان يتغنى بها القرقوري كانت بالنسبة لي غريبة على مسامعي كغناء والاغرب كمية الناس داخل حلبة الرقيص تحس وكانهم في قمة الاستمتاع بهذه الكلمات الغريبة على مفردات الغناء السوداني الاصيل
حبيبي لون براه الخدرة الماحمرة شطة خدرة
والتانية اغنية عجيبة
ماراضي ماراضي الحب بقى كلام فاضي
دي خالطة اتنين تلاتة وداكة محاضراتها ومستمتعه بي حياتها
تجيك قاشرة ونظيفة وتعدمك التعريفة
بلاي تدنى بنا الحال لهذه الدرجة من رخيص القول
وهل هذا مؤشر لتدنى الذوق والاخلاق السودانية
وهل هذا له علاقة بتدني العملة السودانية
مجرد سؤال؟

لا أعتقد له علاقة بتدنى الأخلاق
ممكن يكون الواحد أخلاقه متدنية ويسمع ام كلثوم

سلام ودالماحي
ماهو تدني هذا الاسلوب الغنائي الجديد
الاخلاقو متدنيى ممكن يسمع كلام كويس لانو صادر من ناس كويسين زي ام كلثوم كما تفضلت
لكن المشكلة انو الكلام الهابط صادر من فنان وموجهه الى المتلقي السوداني الذي صار يتقبل كل شئ في صمت

الاخ عادل لك التحية
لا نسميها تدني اخلاق لكن ممكن تكون سطحية المفاهيم..
لان الناس البسمعوا الاغاني دي ناس عاديين و ممكن تجد الشريط ده شغال في اي بيت ولكن الناس ما يتجتهد في تحليل الكلام وادراك معناه المهم الموسيقى حلوه .
و امثال الاغاني دي كتيره. اضربني بمسدسك ، راجل المرا حلو حلا، وما بخلي ان شاء الله راجل اختي و هلم جر.
و المؤسف ان الدخل المادي لهؤلاء الفنانين يعادل دخل عشرة من العمالقة فنانين الزمن الجميل.وكيف كانوا بتعبوا - شعراء و ملحنين و فنانين - حتى يخرجوا اغنية بعد كم شهر
انت تعرف فرفور دة بعد شهرته دي عنده اغنية واحدة حقتوا ملك.
كمان القنوات الكثيرة اعطتهم مجال لنشر هذا الغناء.
سمعت بنجات غرزة و عوضية عذاب وتقلية وغيرهن اسماء عجيبة صارت تظهر في القنوات الخاصة.

لك التحية الحبيب عادل
وعبرك للأخوة صديق الماحي
والهادى محمد يحيي

الغناء والآداب والفنون هي من المكونات الأساسية لثقافة الشعوب . وتعبر بها عن أي حراك إجتماعي .. من شجاعة وحماسة وغناء عاطفي ..
إذا ماتندت ثقافة الشعوب .. فبالتالي تدنى أخلاقياتهم ..
ومانعيشه الآن من ظواهر كثيرة سالبة في حياتنا هي أكبر دليل على تدني الأخلاقيات السودانية ..

ويالهادي .. ماسمعت بي حمــادة بت

قال احد الحكماء...: حب الغناء وحب الكتاب ....في قلب امرء ليس يجتمعان الكتاب هو القران الكريم..ولكم ان تحكموا................ولكم الشكر

لك التحيه اخي عادل وانت تبحر بنا في بحورك العزبه دائما وكماتعلم اخي ان الاخلاق قد تدنت واصبحت في الحضيض واصبح الكل يعيش مع الطرب للجبجبه كما يقولون اين نحن اليوم من ايام احمد المصطفي عميد الفن السوداني وحسن عطيه امير العود كانوا يزهبون الحدود السودانيه لرفع معنويات الجيش بالاغاني الحماسيه ولانسي من غني للاستقلال امثال فنان افريقيا الاول محمد وردي والكروان عبد العزيز محمد داوؤد والعطبرواي والكثيرون منهم اصحاب الطرب الاصيل ياحليل ايام زمان كانت ايام هل تعود ماااظن ولكم ودي

الدفعه العجوز
الهادي
لك التحية ويعجبني مرورك زي مرورو الفي العصر لانك بتضيف لمسات سحرية على الموضوع
وياريت تفتش لينا موضوعك الروحو ليك عوض الله داك

اقتباس :

سمعت بنجات غرزة و عوضية عذاب وتقلية وغيرهن اسماء عجيبة صارت تظهر في القنوات الخاصة.

دي اسماء طبعا اول مرة تطرش اضاني لكن قلت لي قنوات خاصة ولا قعدات خاصة فرز الكيمان

سلام حبيبنا طارق
لك التحية وتشكر على المرور والاضافة

اقتباس :

الغناء والآداب والفنون هي من المكونات الأساسية لثقافة الشعوب

لكن والله بعد الغناء السمعتو في السي دي بتاع العرس دة
طلعتنا ماعندنا اي ثقافة عديل كدة
وربك يستر بس

elsadigeltahirkhalid. كتب:

قال احد الحكماء...: حب الغناء وحب الكتاب ....في قلب امرء ليس يجتمعان الكتاب هو القران الكريم..ولكم ان تحكموا................ولكم الشكر

سلام يادكتور
اللهم اجعلنا من اهل القران
طبعا انت جائي من الحج ولسه الاربعين ماتمت عشان كدة دعواتك معانا للتمسك بالجيد من القول والكلام

سلام اخونا عزالدين
لك التحية وتشكر على المرور والاضافة الثرة
وفعلا صرنا نتحسر على الماضي والذي لم نطوره لنطور انفسنا ولم نحافظ عليه ونسير على نهجه
لنتعلم منهم وصرنا كمسلسل لن اعيش في جلباب ابي وفي النهاية لاطلنا المدنية ولاطلنا حياة ابي

اقتباس :

اين نحن اليوم من ايام احمد المصطفي عميد الفن السوداني وحسن عطيه امير العود

ذاك العصر الذهبي للغناء السوداني
والان العصر الانحطاطي للغناء السوداني

لك التحية أبوالطيب ،والتحية لكل أعضاء المنتدى على نغمات الغناء وفنونه ،،
فى تقديرى أن الغناء يعبر عن وجدان الشعوب بمختلف شرائحها ومستويات فهمها ، لذلك ليس صحيحا أن يصنف بالهبوط والعلو طالما هنالك من يجد فيه سلوى ، لأن التعاطى مع الغناء يكون بمبدأ الترويح ولايحدث الترويح إلا فى وجود هامش كبير من الحرية فى التعبير عن مكنون النفس ، إضافة الى التحلل من قيود المجتمع المحافظ زيادة عن اللزوم ،فالمصطلحات التى يراها البعض غريبة هى جزء من جذور الموروث ويتم تداولها فى إطارات ضيقة بدون حرج ، لذلك هو مثل السوق ، أو مائدة الطعام ، كل يشترى أو يأكل ما يحب ، وكلما إرتقت المجتمعات ضاقت دائرة الحرج فى التعاطى مع الفنون بأنواعها
لك الشكر أبوالطيب مجددا على هذا الطرح الرائع المهول