9:46

ياودالشيخ انا اول حاجة داير اعرف العلاقة

بين حلفا .. والسكر .. وشرقة الشريقاويين

زمان كان خليل الصادق دفعتنا مابخلى ليك استاذ فى الهجرة

من التقليد والمحاكاة .. وكان فنان لدرجة بعيدة فى القصة دى

آل الشريقاوى عموما ارتبطو بخفة الدم .. والحضور الجميل الدائم

من خلال ارتباطنا بهم ..

الصادق خالد من الناس الما احتكيت بيهم كتير بسمع عنو طراطيش كلام ساى

لكن من خلال المنتدى

بتكيف شديد لاى دخلة للصادق لانها بتكون اجمل من الموضوع ذاتو

زمان كان شعروا زى شاورخان وكت المطرة

لكن هسة شكلو كدا زى مشروع الجزيرة

لكن فى العيد بنديك التحميض الكامل للصورة من خلال المشاهدة

والحروف والخروف ذاتو

ياودالشيخ لو جيت العيد انا على الخروف فى غابة قوز الرهيد

لكن سؤالى القائم الصادق الشريقاوى بكون معلم فى تظبيط ام فتفت

فى انتظارك ... حتى تكتمل الصورة

عليك الله يا عبدو يا اخوي بعد ماتكتمل الصوره
تمو لينا امفتفت البداها عادل دي
ههههههههههههههههههههههههههه

هههههههههههههههههههه

بمناسبة ام فتفت ممكن اشارك بكمونية ساخر سبيل (الفاتح جبرا )

ما مشيت لى حاجة (سعدية)؟
- مالا عندها شنو؟
- مش وقعت من (الركشة) وإتظلطت و(خيطو) ليها راسا تلاته (غرز)؟
حوار عادى يمكن أن يحدث بين أى زوجين.. زوجة تخبر زوجها بأن جارتهم ترقد مريضة إثر حادث تعرضت له، طيب أيه الغريب فى الموضوع؟ أقول ليكم.. الغريب فى الموضوع أن زوجتى العزيزة كانت تخبرنى بهذا الحادث الذى تعرضت له (حاجة سعدية) وهى غارقة فى (الضحك)!!
- بتضحكى مالك؟ ده هسه موضوع يضحك؟
- خلينى كدى أحكى ليكا وبعدين إنتا براك ح تعرف..
وبعد أن أخبرتنى (حرمنا المصون) بالقصة لم أتمالك نفسى وإنفجرت فى نوبة من الضحك المتواصل كما (أتوقع أن يحدث لك ذلك عزيزى القارئ) وإليك القصة:
بعد أن اكتمل عدد المشتركات فى الصندوق (الماسكاهو حاجة سعدية) قررت أن تذهب لتسليمه إلى صاحبة (الصرفة الأولى) فقامت بوضع (القريشات) فى (كيس نايلون أسود) ولفها بعناية حتى لا يستبين ما بداخلها ثم أوقفت (ركشة)..
- ماشة وين يا حاجة؟
- ماشة ليا يا ولدى لى ناس زيارة قدام محطة (جامسكا) فى الثورة!
وإنطلق سائق الركشة وهو مندمج مع الأغنية التى يبثها (المسجل) بصوت عال وأخذ شارعاً جانبياً ثم آخر حتى صار بعيداً عن شارع الظلط الذى من المفترض أن يسلكه مما حدا بحاجة سعدية أن تقول له:
- يا ولدى إنت ماشى بى وين؟ أنا بى هنا ما بعرف السكة!
- يا حاجة إنتى مش ماشة (جامسكا)؟ أنا خلاص بوصلك!
استمر سائق الركشة فترة من الوقت (يدخل بى زقاق ويطلع بى زقاق تانى) حتى توقف أمام أحد المنازل وقام بالضغط على البورى ففتح باب المنزل (3 ضلف) لتدخل الركشة وبداخلها (الحاجة سعدية)! التى تفاجأت بوجود عدد من (الشباب) يلتفون حولها تفوح منهم رائحة (الخمر) و(الدخان):
- يا وليداتى أنا (مرا كبيرة) عاوزين منى شنو؟
- (مشيراً إلى طشت كبير): ما عاوزين منك شئ يا حاجة بس نضفى لينا (الكمونية) دى!
كان الطشت (مليان لى عينو) بالمصارين و(الكرشة) و(العفشة)، وضعت (حاجة سعدية) الطشت أمام (الماسورة) وهاك يا (نضافة)، على الرغم من أن كمية (الكمونية) التى فى الطشت من الواضح انها لأكثر من (بهيمة) إلا أن (مهارة) حاجة سعدية قد ساعدتها فى إنجاز المهمة فى وقت قياسى مقداره ساعتان بالتمام والكمال!
- (وهى تستعدل ثوبها) أها يا وليداتى رجعونى حتتى!
- (أحدهم يناولها كيس أسود): يا حاجة معقولة تفكينا (عكس الهوا) كده وتمشى؟يعنى (الكمونية) دى ناكلا (نيه)؟
قامت حاجة سعدية بفتح الكيس الذى يحتوى على (الفحم والبصل والصلصة والبهارات)، جلست على (البنبر) المتآكل من جديد، (ولعت نارا) وبدأت فى (حش البصل) ثم (دق التوم) والفلفل..
- أها يا وليداتى.. لى (الصلصة) كبيتا ليكم فيها.. خلاس ودونى لى اهلى الواطه (فللت)!
- خلاس يا حاجة تعالى أركبى نوصلك..
على مشارف الحى قام سائق الركشة بإنزال (حاجة سعدية) التى إتجهت صوب منزلها بينما انطلق (السائق) عائداً إلى ( شلته)..
- مالك يا حاجة إتأخرتى وجاية (فترانة) كده؟
- كيفن ما اجى فترانة وتعبانة؟ ومنضفه (كمونيت) الدنيا والعالمين!!
- أجى (كمونيت) شنو ياحاجة ما قلتى ماشة تودى قروش (الصندوق) الوداك للكمونيات شنو؟
وبعد أن قامت حاجة سعدية بسرد (الحكاية) وسط دهشة الحاضرين خاطبتها حفيدتها (الطالبة) قائلة:
- والله يا حبوبة بركة البقت على (الكمونية) مع الحاجات البنقراها فى الجرائد دى!
لما كان من الضرورى تسليم مبلغ (الختة) لصاحبتها فقد قامت (حاجة سعدية) بإرتداء ملابسها فى عصر اليوم التالى ثم قامت بوضع (القريشات) فى (كيس نايلون أسود) لفته بعناية حتى لا يستبين ما بداخله ثم أوقفت (ركشة)..
- ماشة وين يا حاجة؟
- ماشة ليا يا ولدى لى ناس زيارة قدام محطة (جامسكا) فى الثورة!
وإنطلق سائق الركشة بالشارع الرئيسى الذى بعد أن تحرك قليلاً وجده مغلقاً فى منتصفه بسبب بعض الإصلاحات فاضطر إلى أن ياخذ شارعاً جانبيا ثم آخر وعندما إنتبهت (حاجة سعدية) إنو (الشوارع ما ياها) قذفت بنفسها من الركشة وهى تصيح:
- وحات الله ما بقدر على الكمونية تااانى!!!

نقول شنو في الصورة ما إنت شاعر وتشبيهك بليغ ابدعت في (زي مشروع الجزيرة)دي !فعلاً أصابنا التصحربس محاولاتنا جادة ضد الجفاف ..أركز للخروف نحن أصلنا ناس مرارة وشية ولو لقينا شربوت إلا يكونوا خروفين إن شاء الله ربنا يسهل ونستمتع بي شوفتكم ومؤانستكم . لكم تحياتي أيها الغصن الرطيب.
كتبت الرد وكانت إضاقتك الأخيرة مانزلت حاجة سعدية رهيبة والفاتح جبرا خيالو مبالغة وإختياراتك إبداع ياذواق لك التحية مجدداً.

يا الشريقاوى الخروفين معاهم كمان (قراصة بمخ ساقين ) فاكر ولا نسيت