رمضان على الابواب والباقى يوم ونص والدنا حر عشان كدى انا عملت ليكم راكوبة كبيرة فى نص الحلة وجبت دورين رملة بلورى محمد احمد سعيد وطرحتها ليكم ورشيتا ومنتظرين لمتكم والله
رمضان السنة دى حيكون مولع بالذات فى السودان عشان كدى جاتنى فكرة الراكوبة الكبيرة بيها نقصر اليوم وفيها نناقش موضوع نفرة المدارس ونوضبا فيها نتسامر ونتناقش ونتصافى ونتلاقى ونفترق
حيكون عندنا سياسة وثقافة وادب ومديح وغنا ودراما وكل الالوان .
يلا نحنا فى انتظار اللمة

الأخ / صلاح الشيخ

نشكرك على الفكرة الرائعة

وإن شاء الله الراكوبة دائماً عامرة

وتكون فيها تلاوة جماعية وختمة اللُّهم أجعل خير أيامنا خواتمها

نتركم في الهمبريب وريحة الدعاش بعد رش الرملة

لكن يا صلاح البدخل راكوبتك دي ما أظن يناقش ليهو موضوع بعد تجهيزك ليها دا

والكندشة الطبيعية الناس بغلبن النعاس وببقوا ناس نوم

تشكر

الاخ محمد نور نشكر ترحيبك بالفكرة والراكوبة دى حتكون دكان ودالبصير مصقر دى بناقش مشاكل السودان ودى مشاكل الهدى وبدا بالمدارس والمستشفى والزلط وكل المواضيع الهامة بالاضا فة للبرامج الترفيهية
كل الود والتقدير

ياسلام يا ابو الصا

راكوبة عينة ومرشوشة .. أنا حاليا شعرت بالخدر .. مع الهجير الحار دا .. ودردمتا السفة ودنكلتها .. وياريت اكون في عنقريب هبابي .. والتكة محلولة .. عشان نكمل الباقي ويقولوا علينا يازووووول ياكسلان . ونحن يهمنا مايقولوا الدايرين يقولوا .. نحن كدا . هع هع العكدابي ..

سلام لرواد الراكوبة ( مع نصيحة الجلوس في الرواكيب وامام الدكاكين في ضل الضحي و بعد الضهيرية يعد نوع من الكسل والتنظير وهذا ما يعيق التطور والتنمية فالشعوب المتقدمة تجدها في مثل هذه الاوقات في المصانع والحقول وميادين الانتاج ومع هذا نهديكم هذه الطرائف من كتاب طرائف العرب )

من طرائف أعراب العرب


السلام عليكم ورحمة الله وبركاته
==============
من طرائف أعراب العرب


(1)الموت فرحاً


قيل لأعرابي : أتحب أن تموت امرأتك ؟
قال : لا
قيل : ولم ؟
قال : أخاف أن أموت من الفرح ..




(2)أسماء الأقفال


التقى أعرابي بقوم فسألهم عن أسمائهم ، فقال الأول :
اسمي وثيق '
وقال الثاني : اسمي ' ثابت '
وقال الثالث : اسمي ' شديد '
وقال الرابع : اسمي ' منيع '
فقال الأعرابي :
ما أظن الأقفال صنعت إلا من أسمائكم


(3) بوس يد زوجتك ..!!


واحد يقول لمن حوله أوصيكم خيراً بزوجاتكم ولنتفق أن


يقبل كل منا يد زوجته عندما يعود للمنزل ..!!


قال احدهم : ولكن انا لم اتزوج ..!!


قال له : إذاً قبل يدك وجه وظهر ...




(4) ارفق بنفسك


قال : ' الحجاج ' لأعرابي كان يأكل بسرعة على مائدته :


ارفق بنفسك


فقال له الأعرابي :


وأنت ... اخفض من بصرك




(5) ما ذنب الذين معك ؟


صلى أعرابي مع قوم ، فقرأ الإمام :


( قل ارأيتم إن أهلكني الله ومن معي أو رحمنا ) فقال الأعرابي :


أهلكك الله وحدك ، إيش ذنب الذين معك ؟ فقطع القوم الصلاة من


شدة الضحك .




(6) كأن أمه أرضعتك ....


حضر أعرابي إلى مائدة بعض الخلفاء ، فقدم جدي مشوي، فجعل


الأعرابي يسرع في أكله منه. فقال له الخليفة : أراك تأكله بتشفي كأن


أمه نطحتك ! فقال : أراك تشفق عليه كأن أمه أرضعتك !


(7 ) ليتها كانت القاضية .....


عاد أحد الأعراب نحويا ، فسأل عما يشكو . فقال النحوي : حمى


جاسية ، نارها حاميه ، منها الأعضاء واهية ، والعظام بالية .


فقال الأعرابي : لا شفاك الله بعافية ، يا ليتها كانت القاضية ..




( خرق وترقيع ....


قيل لأعرابي : كيف أنت في دينك ؟ قال : أخرقه بالمعاصي


وأرقعه بالاستغفار









أشهر صفعة ‏(كف)‏ في التاريخ !!


هذه القصه حدثت في أحد القرون الوسطى تقريبا في القرن السادس عشر
وبالتحديد في احدى القرى الألمانية
كان هناك طفل يدعي (جاوس) وكان جاوس طالبا ذكيا وذكائه من النوع الخارق للمألوف
وكان كلما سأل مدرس الرياضيات سؤالا كان جاوس هو السباق للأجابه على السؤال، فيحرم بذلك زملائه في الصف من فرصه التفكير في الإجابه
وفي أحد المرات سال المدرس سؤالا صعبا...
فأجاب عليه جاوس!!..بشكل سريع... مما أغضب مدرسه
فأعطاه المدرس مسأله حسابيه!!!
وقال : اوجد لي ناتج جمع الاعداد من 1 الي 100!!
طبعا كي يلهيه عن الدرس ويفسح المجال للآخرين!!!!!!!
بعد 5 دقائق قال جاوس بصوت منفعل: 5050!!
فصفعة المدرس صفعة قوية!!
وقال: هل تمزح؟!!!!....
أين حساباتك؟
قفال جاوس: اكتشفت ان هناك علاقه بين 99 و1 ومجموعها = 100
وأيضا 98 و 2 تساوي 100
و 97 و 3 تساوي 100
وهكذا الى 51 و 49!
واكتشفت بأني حصلت علي 50 زوجا من الأعداد
وبذلك ألفت قانونا عاما لحساب هذه المسأله وهو
n ( n+ 1) /2
وأصبح الناتج 5050
فاندهش المدرس من هذه العبقريه ولم يعلم انه صفع في تلك اللحظة
العالم الكبير فريدريتش جاوس
احد اشهر ثلاث علماء رياضيات في التاريخ

يا ابو الطا انت مقنطر سفتك كد ا جالدو ولا شنو والله يا طارق مشيت اجدد الاقامة قالوا تامين صحى 1500ريال رسوم تجديد 1500ريال معقب 500 ريال كفيل 3000 الف ريال يعنى يا ابو الطا 6500 ريال يعنى بالقديم خمسة مليون والله تبنى ليها فصل عديل كدا وبعد دى كلوا ناس النفرة يقولوا لينا ادفعوا 150 ريال بس نعمل نايمين دى ما الصورة المقلوبة ذاتا بتاعة الجنى ود مدثر

اخونا صلاح ودهنونة
اخوك مانسي الدنيا رمضان والراكوبة دى رمضانية .. الحمد لله قنطرة السفة دي قبل الصوم.. وإنشاء الله الصوم يجي ونتخلي عن كل العادات السيئة دي .. أدعو لينا معاك .
كان الله في عونك مع التجديد ومشاكلو .. واخوك نفس الفيلم قريب التجديد .. وخليها مستورة .
كدي اخرج من جو الغم والتجديد دا الى قصة طريفة واقعية رايك شنو ؟

اخونا احمد محمد العباس (ود عمتنا ) .. راجل ظريف زوجتو كانت حامل بولدو البكر ( صدام ) .. وهي في مرحلة الوحم وطبعا مرحلة الوحم دي فيها غرائب وطرائف .. وكان وحمها من النوع الصعب عديل .. قالت نفسها في طين او تراب من الترعة .. احمد قال ياخي دي حاجة بسيطة .. احسن ما تقول نفسها في حاجة تانية وتتعبنا بيها ..
قام مشى لحدى الترعة شايل كورة ( طليسة ) ملاها من تراب الترعة وجابها لزوجتو .. قامت اكلت شوية منو .. قالت ليهو .. يا أخي التراب دا مسيخ ماطاعم .. قاليها مافي مشكلة اصلوا التراب دا انا جبتو من ترعة الهداية .. كدى النمشي ترعة معايش امكن ترابها يكون طاعم وحلو .. وعمك شال الكورة وماشي .. وفي الطريق لاقاهو أخونا بلال مامون كان وقتيها بذاكر مع الحبيب الصادق السني .. قال ليهو : مالك يا أحمد شايل كورتك دي وماشي وين .. قام حكى ليهو الحكاية : يا اخي المرة ببتوحم ونفسها في طين من الترعة وجبتا ليها من ترعة الهداية وقالت دا مسيخ وماطاعم قلنا أحسن نمشي ترعة معايش امكن يكون طينها وترابها حلو وطاعم .. بلال ضحك وقال ليهو خلاص انا حا امشي معاك .. ود السني برضو قاليهم انا ذاتي ماشي معاكم .. وكل مايلاقو شلة في الطريق يسألوهم يأخوانا انشاء الله خير.. يحكوا ليهم الحكاية .. أنت عارف العدد وصل كم لما وصلوا الترعة كان عددهم اكثر من 20 شخص .
أجدد لك التحية ولراكوبة الرمضانية كل التوفيق

سلام سباب
وفوق راكبتكم العامره دي
انشا الله تكونو لامين وسالمين
ومبسوطين كمان
وكلكم رايقين ومروقين
والحال عال العال
ويااخونا صلاح ماتنسي تجهز الزير اب مويه بااارده لانو في ناس عندهم اعزار ياخ,,,, وطارق ده عليك الله شوف ليهو عنقريب مطرف كده عشان السفه دي مايجدعا لينا في نص الراكوبه...
وزي مابتفتش للمراقبين للمنتدي كمان ياخي ورينا همتك شويه ورشح لينا لجنه كده عليها نظافه الراكوبه ومتابعه امورا عشان مايجي يوم والجماعه تشرد.... يعني دايرين اشراف كف ولجان محايده مازي لجان الايام دي الواحد يمسكو لجنه اهم حاجه عندو البند المالي هههههههههه اها اخونا عادل ده عليك الله تشوف ليهو برنامج خاص ياخي ناس امريكا ديل السخانه دي بتعمل ليهم اكوله هههههه شوف لينا مكيف مستعمل كده من السعوديه عشان نربطو ليهو في الراكوبه.... دايرنها راكوبه للكل الحنكوش والفنكوش ههههههه
ماتنسي كمان مع التقدم التطور في ناس هيثومه ديل مابعرفو ام الحفره ولا المنقله ولا السيجه يعني كمان شوف لينا بلاي استيشن واتاري كده لزوم اخونا القي راحتو معانا ههههههه بس اوعه تخلو طارق يهبش الحاجات دي عشان ماتضربو كهرياء هههههههههه

ياطارق بتعرف تلعب منقله؟؟؟؟؟؟؟؟؟

يا حسن اسماعيل , اسمى هيثم وليس كما تدعي وتحاول تخفف دمك معاي , انت لا تعرفني اما ان تناديني باسمي عندما تخاطبني او تكتب اي رد تراه موجه او لا تذكره خالص واضح ( انا لااحب المسخرة والهزار البايخ و الدنيا رمضان لا اريد ان ادخل معك في مهاترات ومن حقي ان يكلمني الناس باسمي ولا اقبل اي القاب اخري من اي شخص مهما كان اسمه ووزنه نتحاور ونتناقش معك في حدود ما تكتب ولم اطلق عليك اي لقب او صفة ورجو ان تكون رسالتي واضحة ...)

هيثم إبراهيم محمد الشيخ كتب:

يا حسن اسماعيل , اسمى هيثم وليس كما تدعي وتحاول تخفف دمك معاي , انت لا تعرفني اما ان تناديني باسمي عندما تخاطبني او تكتب اي رد تراه موجه او لا تذكره خالص واضح ( انا لااحب المسخرة والهزار البايخ و الدنيا رمضان لا اريد ان ادخل معك في مهاترات ومن حقي ان يكلمني الناس باسمي ولا اقبل اي القاب اخري من اي شخص مهما كان اسمه ووزنه نتحاور ونتناقش معك في حدود ما تكتب ولم اطلق عليك اي لقب او صفة ورجو ان تكون رسالتي واضحة ...)

اخونا وحبيبنا هيثم
بما انو الراكوبه رمضانيه ومنوعه يعني ممكن ندردش معاك هنا
خلي روحك رياضيه ياخ اقبل المداعبه الصغنونه دي
فرفش شويه .. ماتصرهاش كده خالص
والبوست ده اسمو راكوبه
يعني لمه
يعني ونسه وضحك وفرفشه ونقاش
يعني كلنا سوي اخوي واخوك
شمالي علي جنوبي شرقي علي غربي
الاسم ذاتو انت قايل جه من فراغ
الراكوبه دي ليها مكان في الثقافه السودانيه والهدي منها
لمه حلوه.. وشاي مدور وجبنات ...
احتمال تكون فيها اجاويد كمان
ياخي خليك ريلاكس كده وتعال جيب كرسيك ده
ايوه اقعد جمبي هناوجيب معاك رقعه الشطرنج دي
بتعرف تلعب والله اعلمك
هههه طيب خليناها تعال نلعب بلاي استيشن رايك شنو

حسن اسماعيل كيف حالك وازيك وكل سنة وانت طيب
والله الهدف من البوست ده ونسة بريئة فى رمضان والناس تقضى وقت جميل مع بعض وتحكى باريحية وبود ونقيف كلنا مع الذكريات الحلوة والمواقف الطريفة فى رمضان يعنى مرفا واتكاءة للاعضاء فى الغربة وفى السودان وما احوجنا نحنا فى الغربة للمة الاهل والاحباب وونساتهم الجميلة جمال اهلى وحقيقى اتمنى ان لا ينحرف عن مسارو .
اما بالنسبة لطلباتك على العين والراس ح يكون عندنا عمدة وشيخ وكل مايختر على بالك بس العافية درجات
لك كل الود والتقدير اخى حسن

حبيبنا طارق دى لو جات هنا يجيبو ليها طين ترعة من وين والله حكاية عجيبة والاغرب منها حسن اسماعيل قال اختوا ليك عنقريب مطرف ونحنا عايزنك فى النص عشان انت زول حكاى فلذلك تعمل بوصية ود الياس قال رمضان فرصة طيبة انو الناس تحاول تبطل فيهو السجاير والتنباك ياريت والله
كل الود والتقدير لك اخى طارق

للمرة الاخيرة ياحسن بطل استهتار وسخرية ايه يعني تعرف تلعب ولا اعلمك و بلاي استيشن دى انت فاكر نحن في روضة اطفال ياخي اكرر مارس الهزار والمزح مع من يتقبل انا لا اقبل واكرر لادعي لتلك الاساليب معي

الاخوة والاحباب صباحكم فل وياسمين ولون كل الورود
شهر الصيام شرفتنا والنية ثابتة ممتنة بالله ماتقولوا الزول دا مجرس من رمضان من هسى عمل ليهوا راكوبة والله دا شوق ليكم بس كل سنة وانتوا بالف عافية

لرمضان حضور كبير فى ذاكرة كل منا فى طفولته
تعلم الصوم نفسه كان كورسا مكثف لامتحان الارادة
لا احد معك ويمكنك ان تتناول جرعة ماء لكنك تظل متشبثا برغم طفولتك تنتظر الاذان البعيد فيغشى عليك من الجوع والعطش ولكنك تصر على بلوغ غايتك
لذلك معنى كبير لتعلم الصبر وقوة الارادة

نحن غايتو كانو يغشونا بالخياطه بقولو لينا صومو نص يوم لحدي 12 وبكره نص يوم تاني وبعدين بخيطوهم ليكم عشان يبقو يوم كامل هههههههههههههه

سلام ودهنونة
ياجماعه راكوبتكم الجميلة دي كفكرة جميلة نحسدكم عليها
لكن طبعا نحن مادافعين عشان كدة ما ح نخش معاكم لكن برضو
ممكن نجيها لزوم الترتيب بس ولو جينا ما حنلقى زول لفرق الزمن وفرق العملة
وطبعا انتو دايما متقدمين علينا بي 7 ساعات يعني وقت السخانة
والزنقة مابنلقاكم طبعا ضاربين الابري والكبسة والمندي والعصاير الماخمج

عادل خياري كتب:

سلام ودهنونة
ياجماعه راكوبتكم الجميلة دي كفكرة جميلة نحسدكم عليها
لكن طبعا نحن مادافعين عشان كدة ما ح نخش معاكم لكن برضو
ممكن نجيها لزوم الترتيب بس ولو جينا ما حنلقى زول لفرق الزمن وفرق العملة
وطبعا انتو دايما متقدمين علينا بي 7 ساعات يعني وقت السخانة
والزنقة مابنلقاكم طبعا ضاربين الابري والكبسة والمندي والعصاير الماخمج

انت ياعادل تعال بعد ما الناس تمشي ورتب الراكوبه وانجم فيها شويه كده... بس الحقه بتاعت طارق دي ماتهبشا,,, والجرائد بتاعت ود مدثر دي برضو ماتحولا من مكانا عشان مايحي اسال منا بكره
لكن اسمع كلام بيني وبينك ماتنسي تجيب لي معاك ساندوتش بيرقر
هههههههههههههههههههههههههههه

حسن اسماعيل قال يغشونا بالخياط والله للشايفو فيك دا ما اظنك كنت بتتغش بعدين تعال هنا سندوتش البيرقر الامريكى دا حتاكلو متين اوع يكون بالنهار اعمل حسابك فى الراكوبة عندنا الفا

الاكرم ود خيارى كل سنة وانت طيب شوف باليل بالنهار بالبر بالبحر بالجو اهم حاجة تشرفنا ما تدفع كفاية الدفعتو ولعلمك الراكوبة دى نحنا عملناها لرغبتنا الملحة جدا فى اكتشاف مخزون الاخرين ولقاءتا بهم عبر الفضاء الاسفيرى وما اجمله لقاء لانو لقة التخاطب فيه بتكون من القلب الى القلب يعنى وجدانية وما اجمل الخطاب الوجدانى

ها ناس الراكوبة سلام عليكم ،والله الضل عندكم بارد وسمح ومع الهجيرة الحارة دى دايرين لينا سدحة ومقيال ،ونحن والله دايرين لينا تبروقة وشوال بذرة ، انا اطلق ضهرى شوية ومعاى أخونا كريشنفة برضو متوك ،وبعد داك نشوف الونسة مع الحبايب الحلوين ،وما تخافوا صايمين صيام السحلية وبعد الاذان عندنا راى

مرحب مرحب بالعمدة كدى يا اخوانا وسعوا شوية للعمدة دا انفرش ليهو البرش دا والله نحنا منتظرنو من قبيل كتر خيرو جانا فى الحر دى والله جنس قهبونة يا اخوى ما غشيت معاك زيادة ود عبدالباقى دا مالك كان جبتو معاك اصلو زول حكاى خلاص والله ياودالياس الصيام دا بدور اللمة 

السلام عليكم يا ناس الراكوبة

قعدتكم دي في الراكوبة ذكرتني مصلى كنا عاملنو في محطة أبحاث الضأن يحلو لنا تسميتها بالبطري عاملنو من الحصير والحصير ملبس بالخيش نظام تهوية

ومفروشة الأرضية بالرملة ومن الصباح بنرش الأرضية _الرملة - وبعد الساعة 12 بنرش الجدار- الخيش -

يازول الهواء بدخل المصلى بااااااااارد السؤال موجه لي أخي عثمان الشريف مازال المصلى في نفس

الموقع أم حدث تغيير . بنَّاقش فيه المواضيع المهمة بعد أداء الصلاوات وهذه طرفة زمن دكتور

آدم وبتحكي عن تواضع الرجل الموسوعة العالم زارني أحد الأصدقاء وكان ما عندو معرفة بالدكتور

آدم ونحن جالسين في المصلى بعد أداء صلاة الظهر كل العاملين موظفين وعمال بناقشون في موضوع

الزراعة في نمرة (1) شندي ونمرة (11) الهدايا صاحبي حسب نظرته للموضوع سألني بصوت عالي

قال لي إت وينو المدير يحل ليهم مشكلتهم دي ؟ لي سوء حظ صاحبي أنا كنت جاس بينه وبين المدير

فقلت له هذا هو المدير وجه له السؤال ؟ إرتسمت إبتسامة عريضة على وجه الدكتور آدم ،

وأخونا طبعاً دخل في أظافره . وهذا مشهد من مشاهد تواضع العلامة البروفيسورآدم حسن سليمان الله

يطراه بالخير. والحقيقة تعلمنا منه الكثير .

شنو يا جماعة قاعدين برانا نقوم على العنقريب الهبابى دا نديها رقدة لحدى ما يجينا زول

هناك بعض الاماكن عندما تمر عليها تشتم فيها رايحة ماضيك فكأنها تعيد الزمن اليك بطقوسه بذكرياته بأناس قاسموك يومها كل شى حتى انفاسك ومن هذه الاماكن المدرسة الابتدائية اولاد فى صيف 1986 وقتها كنا ندرس فى كورصات التقوية للشهادة السودانية التى كانت تقيمها رابطة طلاب الهدى بالجامعات واذكر منهم على سبيل المثال لا الحصر الاساتذة والاخوة الاعزاء صديق المهل . خالد الشريف محمد احمد الياس . صديق خالد عوض الكريم . عبدالقادر جابر . مهدى بابكز . بشرى عبدالحليم فيا لهم من صفوة كانوا لنا عطاءا لامحدود قدموا لنا من كل ضروب المعرفة وكان كورسا اكاديمى ثقافى اجتماعى تربوى بحت حقيقة لا ابالغ لو قلت ليكم بفضل مجهودم الخارق تميزت دفعتنا كان منهم محمد الطيب ادم ومحى الدين وبابكر امام ومحمد بلة وعصام محمود و عثمان مساعد وعلاء الدين عبدالرؤوف والمرحوم الهادى محمد على ادريس والمرحوم انس محمدنور لهم المغفرة وحسن الجوار وشخصى الضعيف وكمية من البنات ومن هنا نرسل لهم التحاية العطرة للاساتذة الاجلاء وكل الزملاء ولنا عودة

بإسم كل من ورد ذكرهم من سفر ذاكرتك الرحيبة،أتقدم اليك بالشكر الجزيل وأهنيك على إمتلاكك لقلب ينبض حباوصفاءوحنينا بلا حدود ،تلك أيام جسدت معنى الإخاء،والحنين اليها يطفى شيئا من المتعة التى سرعان ماتزول بفعل واقعنا الحاضر الملىء بالتراكمات ،ومن خلال هذه الراكوبة الماتعة أدعوكم جميعا إخوتى لتناول الحياة بفلوب صافية،فلنترفع عن حساسية النفس ونجاهدهابكل مانملك لنظل محبين لبعضنا رغم الظروف والمتغيرات لأن ذاك هو الطريق الوحيد للشعور بطعم الحياة والاستمتاع بها

الفي الراكوبة هوي سلام عليكم راكوبتكم سمحة إلا عناقريبها شوية .. أخير نتوهط في البرش دا.رمضان كريم
حكاية أخونا محمدنور (الله ينور عليه ويمتعه بالصحة والتقوى والعود الحميد)ذكرتني حكاية لي مع العالم المتواضع د.آدم
كنا الأيام ديك في الثانوي . نشاط وحماس وعطاء وكنا عملنا لينا رابطة سميناها( رابطة الهدى للآداب والفنون)وطلعت منها فيما بعد( فرقة الهدى المسرحية)كنا مجموعة أذكر منهم الإخوة المرحوم الفنان مهدي سراج ، الدكتور فضل عبدالباقي ، عصام الفاضل، صديق مساعد،عادل حمدالنيل،أحمد عبد الرحمن الطيب،مهدي خلف الله،حامد عمرحامد،عبدالغفور محمدنور، الصادق خالد(ودالعمدة)،عطا المنان خلف الله ، الهادي عبدالله(ودالتويم)،المرحوم أحمد همام... في مرة كان عندنا حفل تجاري في (مناقزا الحلاوين) أجرنا بوكس وعشان نخفف الايجارقلنا نشحد بنزين وفعلا اتقسمنا مجموعات وكان البطري من نصيبي والاخ عبدالغفور مشينا قابلنا د.آدم وبكل ود وتواضع شرح لينا إنه المحطة بحثية ولذلك ما عندها بند مساهمات لكن ممكن نسلفكم لحوجتكم وترجعوه وفعلاً استلمنا 5جالون بنزين وما عندنا نية ترجيع ومضيت(وقعت)علي ورقة تفيد باستلامي للبنزين كعهدة مستردة .. ومشينا قومنا حفلتنا وتابعنا نشاطاتنا عادي ونسينا خالص موضوع البنزين (الكلام دا تقريبا كان سنة82) وتفرقت بنا السبل..بعد 5سنة وأثناءما العبدلله شغال في الكورس الصيفي يجي مرسال من البطري :عايزينك يا أستاذ
أنا مشغول شوية ممكن يمشي معاكم ودالياس أو ودالبلال
لا هم قالوا إنت بالتحديد... ومشيت معاهم لأفاجأ بورقتي التي وقعتها قبل سنين مضت قاعدة ضمن العهد والأمانات
وغايتو انزعجت جداً لكن باصرناها جاي جاي كلو بالشحدة ورجعناها وأزلنا العهدة. شفتوا الرجل دا دقيق وبحافظ على المال العام كيف؟وكان من امتع الدروس العملية لنا. متعك الله بالصحة والعافية أينما حللت أيها العالم الزاهد

ياجماعه بطلو الذكريات دي شويه وتعالو جهزو الصينيه والمويات عشان نطلع بيهم

الحلو مر ياجماعه داير تلج اضربو لطارق هو وجاي يجيب معاهو تلج من السوق

سلام اهل الراكوبة
تقبل الله منا ومنكم وجعلنا من المغفور لهم باذنه تعالى
اولا ذيركم البارد دى بفطر رجاء ماتملوه تانى

لدى ملاحظة يا اخوة عشان اللمة تكون شاملة

تحديد فروق الوقت لكل منا عشان نحضر فىزمن واحد وماتكون فى قطيعة
ممكن نحضر للراكوبة عند المقيل وعادل خيارى يادوب بتناول فى السحور
كل منا يحدد زمنه ناس الخليج وناس مصر وناس امريكا

تجى وماتلقى زول تقول ممكن انا الماجيت الراكوبة فاضية
دايرين زمن خواجات مازمن سودانيين
تفطروا على خير

سلام ياناس الراكوبة
كالعادة نجيكم زيارة في راكوبتكم والدار خلا
اسه انا بخغم لي في لبن ولسه قدامي ساعة زمن من السحور وشايف زيادة بتاوق بالطوالة من خلال الماسنجر
قال صحى من النوم ماشي يديها حمام ويجي راجع اتقول مشى يستحمى في الكنار الغتسة الياها لسه ماجاء مقلع

اقتباس :

تحديد فروق الوقت لكل منا عشان نحضر فىزمن واحد وماتكون فى قطيعة
ممكن نحضر للراكوبة عند المقيل وعادل خيارى يادوب بتناول فى السحور

ياشيخ مهند انت كنت عارف انو الليلة انا شغال ليل ولا شنو
تسلم على توارد الخواطر ياابونية سليمة

سلام ناس الراكوبة ورمضان كريم تصومو وتفطرو علي خير الجمة بندورا بعدالجري الكتير والماعارفين اخرتو شنو بعدين اليومين ديل انا في اجازة يعني مافي دفع ونسة معفية من الضرايب بعدين ياودالشيخ راكوبتك دي مالا زي زي صيوان العرس حبة حلاوة وقزازة ببسي والكشف وربنا يتم بخير وطوالي الواحد يفوت كان كدا انا حدي الفطير باللبن وشعيرية العشا وتور الصباح وام فتفت لك التحية قدر حسنات رمضان

اقتباس :

وتور الصباح وام فتفت

كباشي بتتشهى مالك اليوم الجمعه مايوم السوق
الكلام بخلي ليه زول يتمطق والعجب كان فيها التي

بسم الله كدى الندخل على الاخوان فوق راكوبتكم الحلوه دى باقى عندنا الجمعه دى راحه
وشايف الناس كترت والفضل يرجع لى اخونا ودالشيخ
يا اخوى شوف ليك زياده عيدان وحبه قشات وحصير من المورده
عشان ما نقول ليك الراكوبه كشفنا عيوبه
وعشان ما نقول ليك ما تشكر لينا الراكوبه فى رمضان
الستره والفضيحه متباريات وديا
وتحياتى لى كل ناس الراكوبه
ورمضان كريم
وربنا يتقبل

حضووووووووور ياشباب
راكوبه فاضيه
والوقت وقت عشا
مشيتو وين انتو ياعالم
ياخي متجرسين للدرجه دي

دي ماكانت جرسه دي
ياطارق اقفل التكيف ده وتعال للعنقريب ابو هبابه شويه ياخ

اما اخونا عادل ده حليهو ساي الله اعلم يكون شاف ليهو شمس قريب هههههههههه

الحبيب ود الياس ياخى كيف حالك وكيف اخونا كريشنقا بالله سلم عليهو والليله مشيت موردة عثمان العاقب وجبت لى شوية عناقريب هبابى لانو فى ناس احجامهم عائلية ما بقدروا على قعاد البرش وجبت معاى كمان مشلعيب عشان نعلق فيهو باقى العضة للتاس البجو متأخرين ديل

اخونا الصادق خالد ياخى وينك من زمان ياحليلك وحليل فرقة الهدى المسرحية والله انا حضرت ليكم مسرحية البير والدعاش ومن هنا دى فرصة نترحم على روح الراحل المقيم اخونا مهدى سراج ونرسل تحياتنا للاساتذة فضل عبدالباقى وعادل حمدالنيل وصديق مساعد وعصام الفاضل وعطاالمنان خلف الله وبقية الكوكبة زمان الهدى رياضة وثقافة وادب وفن ومسرح وكل شى جميل ونتمنى دى يرجع والمنتديات فرصة عظيمة لنشر ثقافة الهدى

الحبيب وداسماعيل والله التلج كل يوم بنجيب لوحين من مصنع الهدى بس عا يزين زول يكسرو اوع بس من كسير التلج فى رمضان  

يا عادل انتا دايما نجى متأخر ونحنا بنكون اسحرنا ونمنا كمان